ദുബൈ: കഴിഞ്ഞ നാല് ദിവസമായി തുടരുന്ന കനത്ത മഴയെത്തുടർന്നുണ്ടായ പ്രതിസന്ധികളിൽ ജനങ്ങൾക്ക് ആശ്വാസമേകി ദുബൈ പോലീസിന്റെ നൈബർഹുഡ് ടീം (Neighborhood Team). ദുബൈ കമ്മ്യൂണിറ്റി പോലീസ് ഓഫീസർ നാസർ അഹമ്മദിന്റെ നേരിട്ടുള്ള നേതൃത്വത്തിൽ മലയാളി സന്നദ്ധ പ്രവർത്തകർ നടത്തിയ പ്രവർത്തനങ്ങൾ പ്രവാസലോകത്തിന് മാതൃകയായി.
മഴക്കെടുതി രൂക്ഷമായ പ്രദേശങ്ങളിൽ ദുബൈ മുനിസിപ്പാലിറ്റി അധികൃതർക്കൊപ്പം ചേർന്നാണ് ഈ സന്നദ്ധസംഘം പ്രവർത്തിച്ചത്. റോഡുകളിലും ഫുട്പാത്തുകളിലും വീണ മരങ്ങൾ മുറിച്ചുമാറ്റി ഗതാഗതം പുനഃസ്ഥാപിക്കാനും, വെള്ളക്കെട്ടുകളിൽ കുടുങ്ങിയ വാഹനങ്ങൾ സുരക്ഷിതമായി നീക്കം ചെയ്യാനും ഇവർ മുൻകൈ എടുത്തു. കൂടാതെ, ഡ്രൈനേജുകളിലെ തടസ്സങ്ങൾ നീക്കി വെള്ളം ഒഴുക്കിക്കളയുന്നതിലും വീടുകളിൽ വെള്ളം കയറി പ്രയാസമനുഭവിച്ച കുടുംബങ്ങൾക്ക് സഹായമെത്തിക്കുന്നതിലും ഇവർ സജീവമായിരുന്നു.
നൈബർഹുഡ് പോലീസ് ടീം അംഗങ്ങളായ നസീർ ചോക്ലി, ഇല്യാസ് മനങ്ങണ്ടത്ത്, നസീർ മടത്തിൽ, നജീബ് പാറക്കൽ, അഷ്റഫ് ആയിക്കാടി, അലി ബദ്രിയ എന്നിവരടങ്ങിയ സംഘമാണ് ദുരിതാശ്വാസ പ്രവർത്തനങ്ങൾക്ക് നേതൃത്വം നൽകിയത്. മുൻപ് യുഎഇയിലുണ്ടായ പ്രളയസമയത്തും കോവിഡ് കാലഘട്ടത്തിലും സമാനമായ രീതിയിൽ മികച്ച സേവനം കാഴ്ചവെച്ച് ദുബൈ പോലീസിന്റെ പ്രശംസ പിടിച്ചുപറ്റിയവരാണ് ഈ സംഘം. പൊതുജന സുരക്ഷയ്ക്കായി രാപ്പകൽ ഭേദമന്യേ ഇവർ നടത്തുന്ന സേവനങ്ങളെ ദുബൈ പോലീസും മുനിസിപ്പാലിറ്റി അധികൃതരും അഭിനന്ദിച്ചു.
