ന്യൂഡൽഹി: കൂടുതൽ നഗരങ്ങളെ ബന്ധിപ്പിച്ച് സർവീസുകൾ വ്യാപിപ്പിക്കാൻ ഇൻഡിഗോ 30 പുതിയ റൂട്ടുകൾ പ്രഖ്യാപിച്ചു. മാർച്ച് 29 മുതൽ ഏപ്രിൽ 23 വരെ ഘട്ടംഘട്ടമായി സർവീസുകൾ ആരംഭിക്കും.
രാജ്യത്തെ പ്രധാന ഗ്രീൻഫീൽഡ് വിമാനത്താവളമായ ഇൻഡിഗോ നിന്നാണ് പുതിയ സർവീസുകൾ ആരംഭിക്കുന്നത്. കേരളത്തിൽ നിന്നുള്ള യാത്രക്കാർക്ക് ആശ്വാസമായി കണ്ണൂരിലേക്ക് നേരിട്ടുള്ള സർവീസും പ്രഖ്യാപിച്ചിട്ടുണ്ട്.
പുതിയ റൂട്ടുകൾ നിലവിൽ വരുന്നതോടെ നവി മുംബൈയിൽനിന്ന് ആഴ്ചയിൽ 400ലധികം സർവീസുകൾ നടത്താനാണ് ഇൻഡിഗോയുടെ പദ്ധതി. കണ്ണൂരിനൊപ്പം ആഗ്ര, അയോധ്യ, ബാഗ്ഡോഗ്ര, ബെൽഗാം, ചണ്ഡീഗഡ്, ദിയു, കൊൽക്കത്ത, പട്ന, രാജ്കോട്ട്, ശ്രീനഗർ, വാരണാസി, വിശാഖപട്ടണം തുടങ്ങിയ നഗരങ്ങളിലേക്കും നേരിട്ടുള്ള വിമാന സർവീസുകൾ ഉണ്ടാകും.
ഗുജറാത്തിലെ വ്യവസായ നഗരങ്ങളിലേക്കുള്ള കണക്റ്റിവിറ്റിയും ശക്തമാക്കി. ഭാവ്നഗറിൽനിന്ന് നവി മുംബൈയിലേക്ക് ദിവസേന രണ്ട് സർവീസുകൾ ആരംഭിച്ചിരിക്കുമ്പോൾ, ജാംനഗറിലേക്കുള്ള സർവീസ് ഏപ്രിൽ 23 മുതൽ തുടങ്ങും. ഇതോടെ അഹ്മദാബാദ്, വഡോദര, സൂറത്ത് തുടങ്ങിയ നഗരങ്ങളുമായി ബന്ധം കൂടുതൽ മെച്ചപ്പെടും.
ഇതിനിടെഅദാനി എയർപോർട്ട് ഹോൾഡിങ്സ് ലിമിറ്റഡുമായി ചേർന്ന് യാത്രക്കാർക്കായി പുതിയ ആനുകൂല്യങ്ങളും പ്രഖ്യാപിച്ചു. ഇൻഡിഗോ ബ്ലൂചിപ്പ് അംഗങ്ങൾക്ക് ഡ്യൂട്ടി ഫ്രീ ഷോപ്പിംഗിൽ പ്രത്യേക റിവാർഡുകളും പ്രീ-ബുക്കിംഗ് സൗകര്യങ്ങളും ലഭിക്കും.
നവി മുംബൈ വിമാനത്താവളം പ്രവർത്തനസജ്ജമായതോടെ ഛത്രപതി ശിവജി മഹാരാജ് വിമാനത്താവളത്തിലെ തിരക്ക് കുറയ്ക്കാനും യാത്രാസൗകര്യം മെച്ചപ്പെടുത്താനും ഇത് സഹായിക്കും.
