മാനസിക-ശാരീരിക ആരോഗ്യം, സാമ്പത്തിക സുരക്ഷിതത്വം, ജീവിത-തൊഴിൽ സന്തുലിതാവസ്ഥ എന്നിവയിൽ ശ്രദ്ധ കേന്ദ്രീകരിച്ച് ഏഴ് സെഷനുകൾ സംഘടിപ്പിച്ചു.
ഷാർജ, യുഎഇ — വനിതകളുടെ ആരോഗ്യവും ജീവിതനിലവാരവും മെച്ചപ്പെടുത്തുന്നതിനായി നാമ വിമൻ അഡ്വാൻസ്മെന്റ് (NAMA Women Advancement) സംഘടിപ്പിച്ച ‘നാമ ടോക്സ് 2026’ (NAMA Talks 2026) സംവാദ പരമ്പരയ്ക്ക് സമാപനമായി. ഷാർജ എമിറേറ്റിലുടനീളം സംഘടിപ്പിച്ച ഏഴ് സെഷനുകളിലായി മുന്നൂറിലധികം വനിതകൾ പങ്കെടുത്തു.
ഖോർഫക്കാൻ, കൽബ, അൽ ദൈദ്, അൽ ഹംരിയ എന്നിവിടങ്ങളിലായി വർഷം മുഴുവൻ നീണ്ടുനിന്ന പരിപാടിയിൽ മാനസികവും ശാരീരികവുമായ ആരോഗ്യം, സാമ്പത്തിക സുരക്ഷിതത്വം, വ്യക്തിപരവും ഔദ്യോഗികവുമായ ഉത്തരവാദിത്തങ്ങൾ ഒരുപോലെ കൊണ്ടുപോകൽ തുടങ്ങിയ വിഷയങ്ങളാണ് ചർച്ച ചെയ്തത്. വിദഗ്ധരുമായി നേരിട്ട് സംവദിക്കാനും അനുഭവങ്ങൾ പങ്കുവെക്കാനും ഈ വേദി അവസരമൊരുക്കി.
വനിതകളുടെ ജീവിതനിലവാരം കുടുംബഭദ്രതയുമായും സാമൂഹിക-സാമ്പത്തിക പങ്കാളിത്തവുമായും അഭേദ്യമായി ബന്ധപ്പെട്ടിരിക്കുന്നുവെന്ന് നാമ ഡയറക്ടർ ജനറൽ മറിയം അൽ ഹമ്മദി പറഞ്ഞു. മാനസിക-ശാരീരിക ആരോഗ്യം, സാമ്പത്തിക ഭദ്രത, കുടുംബ-തൊഴിൽ ഉത്തരവാദിത്തങ്ങൾ എന്നിവയെ പരസ്പര പൂരകങ്ങളായി കണ്ടുകൊണ്ടുള്ള സമഗ്രമായ സമീപനമാണ് ഇതിന് ആവശ്യമെന്നും സ്ത്രീകൾക്ക് വേണ്ടി സ്ത്രീകൾ തന്നെ നയിക്കുന്ന സംവാദ വേദിയാണ് നാമ ടോക്സെന്നും അവർ വ്യക്തമാക്കി.
ഫെബ്രുവരി പത്തിന് ‘വനിതകളുടെ ജീവിതനിലവാരം ഉയർത്തൽ’ എന്ന വിഷയത്തോടെയാണ് 2026-ലെ പരമ്പരയ്ക്ക് തുടക്കമായത്. 67 വനിതകൾ പങ്കെടുത്ത ആദ്യ സെഷനിൽ മാനസിക-സാമൂഹിക ക്ഷേമം, സ്വയം തിരിച്ചറിവ്, മുൻഗണനകൾ നിശ്ചയിക്കൽ എന്നിവ ചർച്ചയായി. തുടർന്ന് ഖോർഫക്കാനിലും കൽബയിലുമായി നടന്ന രണ്ട് സെഷനുകളിൽ 85 വനിതകൾ പങ്കെടുത്തു. വരുമാന നിയന്ത്രണം, സമ്പാദ്യം, നിക്ഷേപം, ചെലവുകൾ ക്രമീകരിക്കൽ എന്നിവയ്ക്കൊപ്പം മാനസിക സമ്മർദ്ദം കുറയ്ക്കുന്നതിനുള്ള മാർഗങ്ങളും ഇവിടെ ചർച്ച ചെയ്തു.


ഇമാറാത്തി വനിതാ ദിനത്തോടനുബന്ധിച്ച് സംഘടിപ്പിച്ച പ്രത്യേക സെഷനിൽ 71 വനിതകൾ ഭാഗമായി. ജീവിതത്തിന്റെ വിവിധ ഘട്ടങ്ങളിൽ സ്ത്രീകൾ വഹിക്കുന്ന വ്യത്യസ്ത റോളുകൾ, കുടുംബത്തിലും തൊഴിലിടത്തിലും ലഭിക്കേണ്ട പിന്തുണ, വിജയത്തെക്കുറിച്ചുള്ള സ്വന്തം കാഴ്ചപ്പാടുകൾ രൂപപ്പെടുത്തൽ എന്നിവയെക്കുറിച്ച് പ്രമുഖ ദേശീയ സ്ഥാപനങ്ങളിലെ വനിതാ നേതാക്കൾ സംസാരിച്ചു.
സ്തനാർബുദ ബോധവൽക്കരണ മാസത്തിൽ അൽ ഹംരിയയിൽ പൊതുജനാരോഗ്യ വിദഗ്ധ ഡോ. ലാമിയ അബ്ദുൽ ഹാദിയുടെ നേതൃത്വത്തിൽ പ്രത്യേക ബോധവൽക്കരണ ക്ലാസ് നടന്നു. രോഗം നേരത്തെ കണ്ടെത്തേണ്ടതിന്റെ പ്രാധാന്യം, രോഗലക്ഷണങ്ങൾ തിരിച്ചറിയൽ, ആരോഗ്യകരമായ ജീവിതശൈലി, കുടുംബത്തിന്റെ മാനസിക പിന്തുണ എന്നിവയെക്കുറിച്ച് അവർ വിശദീകരിച്ചു.
അൽ ദൈദ് സർവകലാശാലയിലെയും ഷാർജ സർവകലാശാലയിലെയും വിദ്യാർത്ഥിനികൾക്കായി ‘സന്തുലിതാവസ്ഥയും ജീവിതനിലവാരവും’ എന്ന വിഷയത്തിലും പ്രത്യേക സെഷനുകൾ സംഘടിപ്പിച്ചു. പഠനസമ്മർദ്ദം അതിജീവിക്കുന്നതിനും ആരോഗ്യകരമായ ശീലങ്ങൾ വളർത്തിയെടുക്കുന്നതിനുമുള്ള മാർഗനിർദേശങ്ങൾ വിദ്യാർത്ഥിനികൾക്ക് നൽകി. ഷാർജ സർവകലാശാലയിൽ നടന്ന സെഷനോടെയാണ് 2026-ലെ പരിപാടികൾക്ക് ഔദ്യോഗികമായി തിരശ്ശീല വീണത്.
നാമയുടെ ആരോഗ്യ വിഭാഗത്തിന് കീഴിൽ നടപ്പിലാക്കുന്ന ഈ സംരംഭം, ജീവിതത്തിന്റെ വിവിധ ഘട്ടങ്ങളിലുള്ള സ്ത്രീകൾക്ക് പ്രായോഗിക അറിവുകൾ പകർന്നുനൽകുന്നതിലൂടെ അവരുടെ സാമൂഹിക-സാമ്പത്തിക മുന്നേറ്റത്തിന് കരുത്തുപകരുകയാണ് ലക്ഷ്യമിടുന്നത്.










