മസ്കത്ത്: രാജ്യത്തിന്റെ സുരക്ഷയും സ്ഥിരതയും ഉറപ്പാക്കുന്നതിന്റെ ഭാഗമായി ഗവ. കമ്മ്യൂണിക്കേഷൻ സെന്റർ പൊതുജനങ്ങൾക്ക് നിർണായക മുന്നറിയിപ്പ് നൽകി. സംശയാസ്പദമായി പറക്കുന്ന വസ്തുക്കൾ (ഡ്രോണുകൾ ഉൾപ്പെടെ) ശ്രദ്ധയിൽപ്പെട്ടാൽ ഉടൻ അധികൃതരെ അറിയിക്കണമെന്നാണ് നിർദേശം.
പൊതുജനങ്ങളുടെ ജാഗ്രത ദേശീയ സുരക്ഷയ്ക്ക് നിർണായകമാണെന്ന് അധികൃതർ വ്യക്തമാക്കി. സംശയാസ്പദ വസ്തുക്കൾ കണ്ടാൽ സ്ഥലത്ത് നിന്ന് സുരക്ഷിത അകലം പാലിക്കണം. കൂടാതെ, സംഭവസ്ഥലം കൃത്യമായി തിരിച്ചറിയുകയും സാധ്യമെങ്കിൽ ചിത്രങ്ങളോ വീഡിയോകളോ പകർത്തുകയും ചെയ്യാൻ നിർദേശിച്ചു.
എന്നാൽ, ഇത്തരം വിവരങ്ങൾ സോഷ്യൽ മീഡിയയിൽ പ്രചരിപ്പിക്കുന്നത് ഒഴിവാക്കണമെന്ന് പ്രത്യേകം മുന്നറിയിപ്പ് നൽകിയിട്ടുണ്ട്. പകരം, സംശയാസ്പദ സംഭവങ്ങൾ നേരിട്ട് സുരക്ഷാ ഏജൻസികൾക്ക് അറിയിക്കണം.
ഇതിനായി 77720078 എന്ന വാട്സ്ആപ്പ് നമ്പറിലേക്ക് വിവരം കൈമാറാം. അസാധാരണമായി ശക്തമായ ശബ്ദം, താഴ്ന്ന ഉയരത്തിൽ പറക്കൽ, സാധാരണ ലൈറ്റിംഗ് ഇല്ലാതെ മന്ദഗതിയിൽ സഞ്ചരിക്കൽ എന്നിവ സംശയാസ്പദ ഡ്രോൺ പ്രവർത്തനങ്ങളുടെ പ്രധാന ലക്ഷണങ്ങളാണെന്നും അധികൃതർ വ്യക്തമാക്കി.
രാജ്യസുരക്ഷയിൽ പൊതുജനങ്ങളുടെ പങ്ക് നിർണായകമാണെന്നും ജാഗ്രത പാലിക്കണമെന്നും അധികൃതർ ആവർത്തിച്ചു.
