ഷാർജ: ഷാർജയിലെ അൽ സുയൂഹ് പ്രദേശത്ത്, അൽ ഇഹ്സാൻ വാഹന പരിശോധന കേന്ദ്രത്തിനകത്ത് പുതിയ നമ്പർ പ്ലേറ്റ് പ്രിന്റിംഗ് ഫാക്ടറി പ്രവർത്തനം ആരംഭിച്ചു. ട്രാഫിക് സേവനങ്ങൾ കൂടുതൽ വേഗത്തിലും കാര്യക്ഷമമായും പൊതുജനങ്ങൾക്ക് ലഭ്യമാക്കുന്നതിനുള്ള ശ്രമങ്ങളുടെ ഭാഗമായാണ് ഷാർജ പൊലീസ് ഈ സംവിധാനം ആരംഭിച്ചിരിക്കുന്നത്.
ജനറൽ ഡിപാർട്ട്മെന്റ് ഓഫ് ഓപറേഷൻസ് ആൻഡ് സെക്യൂരിറ്റി സപോർട്ട് ഡെപ്യൂട്ടി ഡയറക്ടർ ജനറൽ ബ്രിഗേഡിയർ ഡോ. ജാസിം ബിൻ ഹദ്ദ അൽ സുവൈദി ഫാക്ടറിയുടെ ഉദ്ഘാടനം നിർവഹിച്ചു. വെഹിക്കിൾ സർവിസസ് ഉപതലവൻ അബ്ദുല്ല ഹുസൈൻ, അൽ ഇഹ്സാൻ കേംബ്രിഹെൻസീവ് സെന്റർ കാർ കെയർ സർവിസസ് ഡയറക്ടർ മുഹമ്മദ് അൽ ദഫ്രി, മറ്റ് മുതിർന്ന ഉദ്യോഗസ്ഥർ, പ്രതിനിധികൾ തുടങ്ങിയവർ ചടങ്ങിൽ പങ്കെടുത്തു.
പുതിയ ഫാക്ടറി ട്രാഫിക് സേവന രംഗത്ത് ഒരു പ്രധാന മുന്നേറ്റമാണെന്ന് അധികൃതർ വ്യക്തമാക്കി. വാഹന രജിസ്ട്രേഷൻ, നമ്പർ പ്ലേറ്റ് നിർമാണം, വിതരണം തുടങ്ങിയ സേവനങ്ങൾ കൂടുതൽ വേഗത്തിലും കൃത്യതയോടെയും നടത്താൻ ഇതിലൂടെ സാധിക്കും. മുമ്പ് പല ഘട്ടങ്ങളിലൂടെ പോകേണ്ടിരുന്ന നടപടിക്രമങ്ങൾ ലഘൂകരിക്കപ്പെടുകയും ഉപഭോക്താക്കൾക്ക് സമയം ലാഭിക്കാനാവുകയും ചെയ്യും.
ബ്രിഗേഡിയർ ഡോ. ജാസിം ബിൻ ഹദ്ദ അൽ സുവൈദിയുടെ അഭിപ്രായത്തിൽ, ഉയർന്ന സാങ്കേതികവിദ്യ ഉപയോഗിച്ച് പ്രവർത്തിക്കുന്ന ഈ ഫാക്ടറി ട്രാഫിക് സേവനങ്ങളുടെ നിലവാരം ഉയർത്തുന്നതിനൊപ്പം ഉപഭോക്തൃ സംതൃപ്തി വർധിപ്പിക്കാനും സഹായിക്കും. കൂടുതൽ ആളുകൾക്ക് വേഗത്തിൽ സേവനം നൽകാൻ കഴിയുന്നതിലൂടെ പൊതുജനങ്ങൾക്ക് സൗകര്യപ്രദമായ അനുഭവം ഉറപ്പാക്കുകയാണ് ലക്ഷ്യം.
ഷാർജ പൊലീസ് തുടർച്ചയായി നടപ്പാക്കുന്ന ഡിജിറ്റൽ-സാങ്കേതിക നവീകരണങ്ങളുടെ ഭാഗമായാണ് ഈ പദ്ധതിയും. ഭാവിയിൽ ട്രാഫിക് സേവനങ്ങൾ കൂടുതൽ ആധുനികമാക്കാനും സേവനങ്ങളുടെ ലഭ്യത വർധിപ്പിക്കാനും ഇത്തരത്തിലുള്ള പദ്ധതികൾ തുടരുമെന്ന് അധികൃതർ അറിയിച്ചു.
