വയനാട്: വയനാട്-കോഴിക്കോട് ബന്ധിപ്പിക്കുന്ന പ്രധാന പാതയായ താമരശ്ശേരി ചുരത്തിൽ നാളെ (ബുധൻ) ഗതാഗത നിയന്ത്രണം ഏർപ്പെടുത്തും. ആറാം വളവിൽ നവീകരണ പ്രവൃത്തിക്കിടെ കൊക്കയിലേക്ക് മറിഞ്ഞ ഹിറ്റാച്ചി യന്ത്രം ക്രെയിൻ ഉപയോഗിച്ച് ഉയർത്തുന്നതിനാലാണ് നിയന്ത്രണം.
പൊതുമരാമത്ത് വകുപ്പ് നൽകിയ വിവരമനുസരിച്ച്, ഭാരവാഹനങ്ങൾക്കും മൾട്ടി ആക്സിൽ വാഹനങ്ങൾക്കും പൂർണ വിലക്ക് ഏർപ്പെടുത്തും. മറ്റ് വാഹനങ്ങൾക്ക് ഭാഗിക നിയന്ത്രണവും ഉണ്ടായിരിക്കും.
ഇതിനൊപ്പം, ചുരം വ്യൂ പോയിന്റ് സമീപത്ത് പാറ ഇടിഞ്ഞ ഭാഗങ്ങളിൽ സുരക്ഷാ നെറ്റ് സ്ഥാപിക്കുന്നതും ഒമ്പതാം വളവിലെ സംരക്ഷണ ഭിത്തി നിർമാണവും ഒരേസമയം പുരോഗമിക്കുന്നു. കൂടാതെ രണ്ടാം വളവിന് സമീപം കൾവർട്ട് നിർമ്മാണവും ആരംഭിക്കുന്നതിനാൽ പകൽ സമയത്ത് കൂടുതൽ നിയന്ത്രണങ്ങൾ ഉണ്ടാകും.
പ്രധാന ഗതാഗത പാതയായതിനാൽ യാത്രക്കാരും ഡ്രൈവർമാരും മുൻകരുതലുകൾ സ്വീകരിച്ച് മറ്റ് മാർഗങ്ങൾ പരിഗണിക്കണമെന്ന് അധികൃതർ നിർദ്ദേശിച്ചു.
