അബൂദബി: സ്വകാര്യ സ്കൂളുകളിൽ വിദൂര പഠനം (ഓൺലൈൻ വിദ്യാഭ്യാസം) നടപ്പാക്കുന്നതിനിടെയുണ്ടാകുന്ന നിയമലംഘനങ്ങൾക്കെതിരെ കർശന നടപടികൾ സ്വീകരിക്കുന്നതിന് സമഗ്രമായ ചട്ടക്കൂട് പുറത്തിറക്കി അബൂദബി വിദ്യാഭ്യാസ, വിജ്ഞാന വകുപ്പ് (അഡെക്). രേഖാമൂലം നോട്ടിസ് നൽകുന്നതു മുതൽ ലൈസൻസ് പുനപ്പരിശോധന വരെയുള്ള നടപടികൾ ഉൾക്കൊള്ളുന്നതാണ് പുതിയ നിയന്ത്രണ സംവിധാനം.
പുതിയ ചട്ടക്കൂട് പ്രകാരം ശിക്ഷാ നടപടികളെ മൂന്ന് വിഭാഗങ്ങളായി തിരിച്ചിട്ടുണ്ട്. വിദ്യാർഥികളെ നേരിട്ട് ബാധിക്കാത്ത ഭരണപരമായ വീഴ്ചകളാണ് ആദ്യ വിഭാഗത്തിൽ ഉൾപ്പെടുന്നത്. ദിവസേന വിദ്യാർഥികളുടെ ഹാജർ രേഖപ്പെടുത്തുന്നതിൽ വീഴ്ച വരുത്തുക, അംഗീകൃത ടൈംടേബിൾ പാലിക്കാതിരിക്കുക, പാഠഭാഗങ്ങളുടെ വിശദാംശങ്ങൾ സമർപ്പിക്കുന്നതിൽ കാലതാമസം വരുത്തുക തുടങ്ങിയവ ഇതിൽപ്പെടും.
ഇത്തരം നിയമലംഘനങ്ങളിൽ 48 മണിക്കൂറിനുള്ളിൽ പ്രശ്നം പരിഹരിക്കണമെന്ന് ആവശ്യപ്പെട്ട് സ്കൂളിലെ വിദൂര പഠന വിഭാഗം കോർഡിനേറ്റർക്ക് രേഖാമൂലം നോട്ടിസ് നൽകും. കൂടാതെ ഈ വീഴ്ച സ്കൂൾ രേഖകളിൽ രേഖപ്പെടുത്തുകയും ചെയ്യും. നിയമലംഘനം കണ്ടെത്തിയ അടുത്ത ദിവസം തന്നെ നോട്ടിസ് അയക്കുന്നതാണ് വ്യവസ്ഥ.
രണ്ടാം വിഭാഗം ശിക്ഷാ നടപടികൾ വിദ്യാർഥികളുടെ ക്ഷേമത്തെയും വിദ്യാഭ്യാസ നിലവാരത്തെയും നേരിട്ട് ബാധിക്കുന്ന ഗുരുതരമായ നിയമലംഘനങ്ങൾക്കാണ്. വിദൂര പഠനത്തിനിടെ ആവശ്യമായ ഇടപെടൽ ഇല്ലാത്തത്, കുട്ടികളുടെ ക്ഷേമം നിരീക്ഷിക്കുന്നതിൽ വീഴ്ച, ആവശ്യമായ രേഖകൾ സമർപ്പിക്കുന്നതിൽ തുടർച്ചയായ പരാജയം, രക്ഷിതാക്കളിൽ നിന്നുള്ള പരാതികൾ എന്നിവ ഇതിൽ ഉൾപ്പെടും.
ഇത്തരം സാഹചര്യങ്ങളിൽ ഔദ്യോഗിക മുന്നറിയിപ്പ് നോട്ടിസ് നൽകുന്നതിനൊപ്പം അഞ്ച് പ്രവൃത്തി ദിവസങ്ങൾക്കുള്ളിൽ സ്കൂൾ പ്രിൻസിപ്പലുമായി നിർബന്ധ യോഗം ചേർക്കും. കൂടാതെ അംഗീകൃത ഫീസ് ഘടന അനുസരിച്ച് പിഴ ചുമത്തുകയും പത്ത് സ്കൂൾ ദിവസങ്ങൾക്കുള്ളിൽ പരിശോധന നടത്തുകയും ചെയ്യും.
മൂന്നാം വിഭാഗം ഏറ്റവും കർശനമായ നടപടികളാണ് ഉൾക്കൊള്ളുന്നത്. തുടർച്ചയായ നിയമലംഘനങ്ങൾ, വിദ്യാർഥികളുടെ സുരക്ഷയെ ബാധിക്കുന്ന സംഭവങ്ങൾ, തൽസമയ ക്ലാസുകൾ മൂന്ന് ദിവസമോ അതിലധികമോ നൽകാതിരിക്കുക തുടങ്ങിയ ഗുരുതര വീഴ്ചകൾ ഇതിൽപ്പെടും. ഡാറ്റ കൈകാര്യം ചെയ്യുന്നതിലെ പിഴവുകൾക്കും മനപ്പൂർവമായ വീഴ്ചകൾക്കും ഈ വിഭാഗത്തിൽ നടപടി സ്വീകരിക്കും.
ഈ ഘട്ടത്തിൽ സ്കൂളുകൾക്കെതിരെ ഉപരോധം, ലൈസൻസ് പുനപ്പരിശോധന, പരമാവധി പിഴ ചുമത്തൽ, വിദൂര പഠനം അഡെക്കിന്റെ നേരിട്ടുള്ള മേൽനോട്ടത്തിലാക്കൽ തുടങ്ങിയ ശക്തമായ നടപടികൾ സ്വീകരിക്കുമെന്ന് അധികൃതർ വ്യക്തമാക്കി. വിദ്യാർത്ഥികളുടെ വിദ്യാഭ്യാസ നിലവാരവും സുരക്ഷയും ഉറപ്പാക്കുന്നതാണ് പുതിയ ചട്ടക്കൂടിന്റെ പ്രധാന ലക്ഷ്യമെന്ന് അഡെക് അറിയിച്ചു.
Emglish Summary : Abu Dhabi’s Department of Education and Knowledge (ADEK) has introduced a detailed regulatory framework to address violations in remote learning at private schools. The system classifies penalties into three levels, ranging from warnings to fines and license review, ensuring better compliance, student welfare, and quality education standards.
