ദുബായ്: ദുബായ് ഇന്ത്യൻ കോൺസുലേറ്റുമായി സഹകരിച്ച് അസോസിയേഷൻ ഓഫ് കേരള മെഡിക്കൽ & ഡെന്റൽ ഗ്രാജുവേറ്റ്സ് (എ.കെ.എം.ജി എമിറേറ്റ്സ്) നടപ്പിലാക്കുന്ന ഗ്രീഷ്മകാല സാമൂഹിക സേവന പ്രവർത്തനമായ “ബീറ്റ് ദ ഹീറ്റ്” – ഹീറ്റ് സ്ട്രോക്ക് അവബോധ ക്യാംപെയ്ൻ തുടർച്ചയായ രണ്ടാം വർഷവും ആരംഭിച്ചു.
ജൂൺ 7 ഞായറാഴ്ച ജബൽ അലിയിലെ ജി.സി.സി ജിൻകോ ലേബർ ക്യാംപിൽ നടന്ന ഉദ്ഘാടന ചടങ്ങ് ഇന്ത്യൻ കോൺസുലേറ്റിലെ ലേബർ കോൺസൽ ശ്രീമതി അങ്കിത വാകേക്കർ നിർവഹിച്ചു.
എ.കെ.എം.ജി എമിറേറ്റ്സ് പ്രസിഡൻ്റ് ഡോ. സുഗു മലയിൽ കോശിയുടെ അധ്യക്ഷതയിൽ ചേർന്ന യോഗത്തിൽ ജി.സി.സി ജിൻകോ മാനേജർ ഹമദ് മുഹമ്മദ് അൽ ഹമാദി, എ.കെ.എം.ജി റീജിണൽ ചെയർപേഴ്സൺ ഡോ. നിതാ സലാം, ഡോ. നയീം മൊയ്ദീൻ എന്നിവർ പ്രസംഗിച്ചു. ഡോ. അർച്ചന നായർ അവബോധ ക്ലാസ്സുകൾക്ക് നേത്യത്വം നൽകി.
താപനില ഉയരുന്ന സാഹചര്യത്തിൽ ഹീറ്റ് സേഫ്റ്റിയെക്കുറിച്ചുള്ള ബോധവത്കരണ ക്ലാസുകൾ, അവബോധ പത്രികകളുടെ വിതരണം, വിവിധ വിദഗ്ധവിഭാഗങ്ങളിലെ ഡോക്ടർമാരുമായി തൊഴിലാളികൾക്ക് സംവദിക്കാനുള്ള അവസരങ്ങൾ എന്നിവ ക്യാംപെയിന്റെ ഭാഗമായിരിക്കും എന്ന് ഭാരവാഹികളായ ഡോ. ഫിറോസ് ഗഫൂർ, ഡോ. ജമാലുദ്ദീൻ അബുബക്കർ, ഡോ. പങ്കജം ഇന്ദ്രജിത്, ഡോ. നിർമ്മല രഘുനാഥൻ, ഡോ. പ്രേമ എബ്രഹാം, ഡോ. സാജിത അഷ്റഫ്, ഡോ. ഫാത്തിമ ഫയസ് എന്നിവർ അറിയിച്ചു.
കടുത്ത വേനലിൽ തുറന്ന ഇടങ്ങളിൽ ജോലി ചെയ്യുന്ന തൊഴിലാളികളിൽ ഹീറ്റ് സ്ട്രോക്ക് ഉൾപ്പെടെയുള്ള താപസംബന്ധമായ അസുഖങ്ങളെക്കുറിച്ചുള്ള അവബോധം വർധിപ്പിക്കുക, അവ തടയാനുള്ള മാർഗങ്ങൾ പ്രചരിപ്പിക്കുക, സുരക്ഷിതമായ ജോലി സാഹചര്യങ്ങൾ പ്രോത്സാഹിപ്പിക്കുക എന്നിവയാണ് ക്യാംപെയിന്റെ പ്രധാന ലക്ഷ്യങ്ങൾ. അടുത്ത ആഴ്ചകളിൽ യു.എ.ഇയിലെ വിവിധ ലേബർ ക്യാംപുകളും ജോലി സ്ഥലങ്ങളും ഉൾപ്പെടുത്തി പ്രവർത്തനങ്ങൾ നടത്തും.
യു.എ.ഇ സർക്കാരിന്റെ “ഇയർ ഓഫ് ദ കമ്യൂണിറ്റി”, “ഇയർ ഓഫ് ദ ഫാമിലി” എന്നീ പദ്ധതികളോടുള്ള ഐക്യദാർഢ്യം പ്രകടിപ്പിക്കുന്നതിനും ഈ ക്യാംപെയിൻ ലക്ഷ്യമിടുന്നതായി സംഘാടകർ അറിയിച്ചു.
