ദുബായ്: വേനൽക്കാലത്ത് ദുബായിൽ കഴിയുന്ന കുടുംബങ്ങൾക്കും കുട്ടികൾക്കുമായി മികച്ച ഇൻഡോർ വിനോദ പരിപാടികളുമായി ബുർജുമാൻ മാൾ. പ്രശസ്ത നാടക അക്കാദമിയായ ‘ദി ജംഗ്ഷൻ അക്കാദമി’യുമായി സഹകരിച്ച് കുട്ടികൾക്കായി ‘സമ്മർ തിയേറ്റർ ക്യാമ്പ്’ സംഘടിപ്പിക്കുന്നു. ജൂലൈ 6 മുതൽ 24 വരെ ബുർജുമാൻ മാളിലെ ‘ബിഹബിൽ’ (BHub) വെച്ചാണ് ക്യാമ്പ് നടക്കുന്നത്.
4 മുതൽ 16 വയസ്സുവരെയുള്ള കുട്ടികൾക്കായി പ്രതിവാര ബാച്ചുകളായാണ് ക്യാമ്പ് ക്രമീകരിച്ചിരിക്കുന്നത്. അഭിനയം, കഥപറച്ചിൽ, കവിതാലാപനം, തിയേറ്റർ നിർമ്മാണം എന്നിവയിലെല്ലാം കുട്ടികൾക്ക് ഈ ക്യാമ്പിലൂടെ പരിശീലനം ലഭിക്കും. കുട്ടികളുടെ ആത്മവിശ്വാസം വർദ്ധിപ്പിക്കാനും അവരുടെ സർഗ്ഗാത്മകത വളർത്താനും സഹായിക്കുന്ന രീതിയിലാണ് ക്ലാസുകൾ. രണ്ട് പ്രായപരിധിയിലുള്ളവർക്കായി വ്യത്യസ്ത സമയങ്ങളിലാണ് ക്യാമ്പ്:
- 4 മുതൽ 8 വയസ്സ് വരെ: രാവിലെ 9 മണി മുതൽ ഉച്ചയ്ക്ക് 12 മണി വരെ.
- 9 മുതൽ 16 വയസ്സ് വരെ: വൈകുന്നേരം 4 മണി മുതൽ 7 മണി വരെ.
ഒരു കുട്ടിക്ക് ഒരാഴ്ചത്തേക്ക് 300 ദിർഹമാണ് ഫീസ്. ക്യാമ്പിൽ രജിസ്റ്റർ ചെയ്യാനും കൂടുതൽ വിവരങ്ങൾ അറിയാനും 050 724 4823 എന്ന നമ്പറിൽ ബന്ധപ്പെടാം.
ഷോപ്പ് ആൻഡ് വിൻ ഓഫറുകൾ
ഇതോടൊപ്പം മാളിൽ എത്തുന്നവർക്കായി ആകർഷകമായ സമ്മാനങ്ങളും ബുർജുമാൻ മാൾ ഒരുക്കിയിട്ടുണ്ട്. ഓഗസ്റ്റ് 2 വരെ നീണ്ടുനിൽക്കുന്ന ‘സമ്മർ ഷോപ്പ് ആൻഡ് വിൻ’ കാമ്പയിന്റെ ഭാഗമായി, ഒറ്റ ദിവസം 300 ദിർഹമോ അതിൽ കൂടുതലോ ചെലവഴിക്കുന്ന ഉപഭോക്താക്കൾക്ക് ഡിജിറ്റൽ നറുക്കെടുപ്പിലൂടെ പുത്തൻ ‘SOUEAST S07’ സെവൻ സീറ്റർ എസ്യുവി കാർ സമ്മാനമായി നേടാം. നറുക്കെടുപ്പിൽ പങ്കെടുക്കുന്ന എല്ലാവർക്കും ബുർജുമാൻ മാളിന്റെ ലിമിറ്റഡ് എഡിഷൻ ഹാൻഡ് ഫാനും സമ്മാനമായി ലഭിക്കും.
