റോഡിൽ വാഹനം നിർത്തിയിടുന്നവർക്കെതിരെ കർശന നടപടിയുണ്ടാകുമെന്ന് അധികൃതർ; ലംഘിച്ചാൽ വൻ തുക പിഴയും ബ്ലാക്ക് പോയിന്റും.
ദുബായ്, ജൂലൈ 4, 2026: ദുബായ് ജബൽ അലി റോഡിൽ മൂന്ന് ബസുകളും ഒരു കാറും ഉൾപ്പെടെ നാല് വാഹനങ്ങൾ കൂട്ടിയിടിച്ച് 25 പേർക്ക് പരിക്ക്. പാതയിൽ വാഹനം തകരാറിലായി നിർത്തിയതിനെ തുടർന്നുണ്ടായ അപകടത്തിന്റെ പശ്ചാത്തലത്തിൽ, പ്രധാന റോഡുകളിൽ വാഹനങ്ങൾ നിർത്തിയിടുന്നതിനെതിരെ ദുബായ് പോലീസ് വാഹനമോടിക്കുന്നവർക്ക് കർശന സുരക്ഷാ മുന്നറിയിപ്പ് നൽകി.
യാത്രയ്ക്കിടയിൽ ഒരു ബസിന് പെട്ടെന്ന് സാങ്കേതിക തകരാർ സംഭവിക്കുകയും റോഡിന് നടുവിൽ നിന്നുപോകുകയുമായിരുന്നു. പിന്നാലെ അമിതവേഗതയിൽ വന്ന മറ്റ് വാഹനങ്ങൾക്ക് പെട്ടെന്ന് ബ്രേക്ക് ചെയ്യാൻ സാധിക്കാതെ വന്നതോടെയാണ് ഒന്നിനു പുറകെ ഒന്നായി വാഹനങ്ങൾ ഇടിച്ചു തകർന്നത്.
അപകടത്തിൽ പരിക്കേറ്റ 25 പേരിൽ ചിലരുടെ പരിക്ക് ഗുരുതരമാണ്. മറ്റുള്ളവർക്ക് സാരവും നിസ്സാരവുമായ പരിക്കുകളുണ്ട്. പരിക്കേറ്റ എല്ലാവരെയും ഉടൻ തന്നെ പ്രാഥമിക ശുശ്രൂഷകൾ നൽകി വിദഗ്ധ ചികിത്സയ്ക്കായി സമീപത്തെ ആശുപത്രികളിലേക്ക് മാറ്റി.
അടിയന്തര രക്ഷാപ്രവർത്തനം
അപകട വിവരം ലഭിച്ച ഉടൻ തന്നെ ദുബായ് പോലീസിന്റെ കമാൻഡ് ആൻഡ് കൺട്രോൾ സെന്റർ രക്ഷാപ്രവർത്തകരെയും ട്രാഫിക് അന്വേഷണ ഉദ്യോഗസ്ഥരെയും സംഭവസ്ഥലത്തേക്ക് നിയോഗിച്ചു. ട്രാഫിക് പട്രോളിംഗ് സംഘം പ്രദേശം സുരക്ഷിതമാക്കുകയും, അടിയന്തര വിഭാഗങ്ങൾക്ക് വേഗത്തിൽ എത്തിച്ചേരാൻ ഗതാഗതം നിയന്ത്രിക്കുകയും ചെയ്തു. തുടർന്ന് അപകടത്തിൽപ്പെട്ട വാഹനങ്ങൾ റോഡിൽ നിന്ന് മാറ്റി ഗതാഗതം പുനഃസ്ഥാപിച്ചു.
രണ്ടാമതൊരു അപകടം ഉണ്ടാകാതിരിക്കാനും സ്ഥലത്ത് സുരക്ഷ ഉറപ്പാക്കാനും എല്ലാ സുരക്ഷാ മാനദണ്ഡങ്ങളും പാലിച്ചാണ് ട്രാഫിക് വിഭാഗം പ്രവർത്തിച്ചതെന്ന് ജനറൽ ഡിപ്പാർട്ട്മെന്റ് ഓഫ് ട്രാഫിക് ആക്ടിങ് ഡയറക്ടർ ബ്രിഗേഡിയർ ഈസാം ഇബ്രാഹിം അൽ അവാർ വ്യക്തമാക്കി.
നിയമലംഘകർക്ക് വൻ പിഴ
വാഹനങ്ങൾക്കുണ്ടാകുന്ന തകരാറുകൾ, ഇന്ധനം തീർന്നുപോകൽ, ടയർ പഞ്ചറാകൽ എന്നിവ കാരണം റോഡിന് നടുവിൽ വാഹനം നിർത്തുന്നത് അതീവ അപകടകരമായ ട്രാഫിക് ലംഘനമാണെന്ന് അധികൃതർ വീണ്ടും ഓർമ്മിപ്പിച്ചു. യുഎഇ ഫെഡറൽ ട്രാഫിക് നിയമപ്രകാരം ഇത്തരം നിയമലംഘനങ്ങൾക്ക് കടുത്ത ശിക്ഷയാണ് ലഭിക്കുക:
- റോഡിന് നടുവിൽ വാഹനം നിർത്തുന്നതിന് 1000 ദിർഹം പിഴയും 6 ബ്ലാക്ക് പോയിന്റും.
- ഗതാഗതം തടസ്സപ്പെടുത്തിയതിന് ആർട്ടിക്കിൾ 98 പ്രകാരം അഡീഷണലായി 500 ദിർഹം പിഴ.
വേഗതയേറിയ റോഡുകളിൽ വാഹനം നിർത്തുന്നത് പലപ്പോഴും വലിയ ദുരന്തങ്ങളിലേക്കാണ് നയിക്കുന്നതെന്നും, യാത്രയ്ക്ക് മുൻപ് വാഹനങ്ങളുടെ സുരക്ഷിതത്വം ഉറപ്പാക്കേണ്ടത് ഡ്രൈവർമാരുടെ ഉത്തരവാദിത്തമാണെന്നും ബ്രിഗേഡിയർ അൽ അവാർ ഓർമ്മിപ്പിച്ചു.
വാഹനം തകരാറിലായാൽ പാലിക്കേണ്ട സുരക്ഷാ നിർദ്ദേശങ്ങൾ:
- ഉടൻ തന്നെ ഹസാർഡ് വാണിംഗ് ലൈറ്റുകൾ പ്രവർത്തിപ്പിക്കുക.
- യാത്രക്കാരുടെ സുരക്ഷയ്ക്ക് മുൻഗണന നൽകി അവരെ വാഹനത്തിൽ നിന്ന് മാറ്റുക.
- സാധ്യമെങ്കിൽ വാഹനത്തിന് പിന്നിൽ സുരക്ഷിതമായ അകലത്തിൽ വാണിംഗ് ട്രയാംഗിൾ സ്ഥാപിക്കുക.
- റോഡിൽ നിന്ന് മാറി സുരക്ഷിതമായ സ്ഥലത്ത് നിലയുറപ്പിക്കുക.
- സഹായത്തിനായി ദുബായ് പോലീസിനെ ഉടൻ ബന്ധപ്പെടുക.
