ദുബൈ: ദുബൈയിൽ പ്രവർത്തന കാലാവധി പൂർത്തിയാക്കുന്ന ഡെലിവറി ബൈക്കുകളുടെ രജിസ്ട്രേഷൻ ഒരുവർഷം കൂടി നീട്ടാൻ തീരുമാനിച്ച് Roads and Transport Authority (ആർ.ടി.എ). നിലവിലുള്ള നാല് വർഷത്തെ പ്രവർത്തന കാലാവധി അഞ്ചാം വർഷത്തേക്ക് നീട്ടാനാണ് തീരുമാനം.
നാല് വർഷം പൂർത്തിയാക്കുന്ന ബൈക്കുകൾക്ക് കർശനമായ സാങ്കേതിക പരിശോധനകൾക്ക് വിധേയമായി അഞ്ചാം വർഷത്തേക്ക് രജിസ്ട്രേഷൻ പുതുക്കി നൽകും. അന്താരാഷ്ട്ര നിലവാരത്തിലുള്ള പുതിയ സാങ്കേതിക പരിശോധനാ മാനദണ്ഡങ്ങളാണ് ഇതിനായി ആർ.ടി.എ നിശ്ചയിച്ചിരിക്കുന്നത്. താൽപര്യമുള്ള സ്ഥാപനങ്ങൾക്കും വ്യക്തികൾക്കും ഈ സേവനം തിരഞ്ഞെടുക്കാം.
ആർ.ടി.എയുടെ ഔദ്യോഗിക വെബ്‌സൈറ്റിലെ ‘Delivery Bikes Operational Life Extension’ ലിങ്ക് വഴിയോ അംഗീകൃത പരിശോധനാ കേന്ദ്രങ്ങൾ വഴിയോ അപേക്ഷ സമർപ്പിക്കാം.
ഡെലിവറി മേഖലയിലെ സുരക്ഷാ മാനദണ്ഡങ്ങൾ കൂടുതൽ ശക്തിപ്പെടുത്തുന്നതിനൊപ്പം ഈ രംഗത്തിന്റെ സുസ്ഥിര വളർച്ച ഉറപ്പാക്കുകയാണ് നടപടിയുടെ ലക്ഷ്യമെന്ന് അധികൃതർ അറിയിച്ചു. രജിസ്ട്രേഷൻ പുതുക്കുന്നതിന് മുമ്പ് ബൈക്കുകൾ ഡെലിവറി ആവശ്യങ്ങൾക്കായി പൂർണമായും സജ്ജമാണെന്ന് സാങ്കേതിക പരിശോധനയിലൂടെ ഉറപ്പുവരുത്തും.
