കൗമാരം മുതൽ ആർത്തവവിരാമം വരെയുള്ള ആരോഗ്യപരിചരണവും സ്തനാർബുദ ബോധവൽക്കരണവും ചർച്ചയായി.
ദുബായ് — സ്ത്രീകളുടെ ശാരീരിക-മാനസിക ആരോഗ്യസംരക്ഷണവും രോഗപ്രതിരോധവും ലക്ഷ്യമിട്ട് ദുബായ് വനിതാ കലാസാഹിതിയുടെ ആഭിമുഖ്യത്തിൽ ‘ബഡ്സ് ടു ബ്ലൂം’ വനിതാ സമ്മേളനവും ആരോഗ്യ ബോധവൽക്കരണ സെമിനാറും സംഘടിപ്പിച്ചു.
പ്രവാസജീവിതത്തിനിടയിൽ സ്ത്രീകൾ നേരിടുന്ന ആരോഗ്യപ്രശ്നങ്ങളും പ്രതിവിധികളും ചർച്ചചെയ്ത സമ്മേളനം മാധ്യമപ്രവർത്തക രശ്മി രഞ്ചൻ ഉദ്ഘാടനം ചെയ്തു. വ്യക്തിജീവിതത്തിലും കുടുംബത്തിലും സ്ത്രീകൾ സ്വന്തം ആരോഗ്യത്തിന് മുൻഗണന നൽകേണ്ടതിന്റെ ആവശ്യകത ഉദ്ഘാടന പ്രസംഗത്തിൽ അവർ ചൂണ്ടിക്കാട്ടി.
ഡോ. ശ്രീലത സെമിനാറിൽ മുഖ്യാതിഥിയായി പങ്കെടുത്ത് ആരോഗ്യ ക്ലാസ് നയിച്ചു. കൗമാരത്തിലെ ശാരീരിക മാറ്റങ്ങൾ, ഗർഭകാല പരിചരണം, ആർത്തവവിരാമം (മെനോപോസ്) സൃഷ്ടിക്കുന്ന ഹോർമോൺ വ്യതിയാനങ്ങൾ എന്നിവയെക്കുറിച്ച് വിശദമായ മാർഗനിർദേശങ്ങൾ നൽകി. സ്തനാർബുദ പ്രതിരോധം, സ്വയം പരിശോധനാരീതികൾ, കൃത്യമായ ഇടവേളകളിലുള്ള വൈദ്യപരിശോധന എന്നിവയെക്കുറിച്ചുള്ള ബോധവൽക്കരണവും സെമിനാറിൽ നടന്നു.
ചടങ്ങിൽ വനിതാ കലാസാഹിതിയുടെ പുതിയ ഭാരവാഹികളെ തിരഞ്ഞെടുത്തു. നിഷ ചന്ദ്രൻ കൺവീനറായും റീന സെബാസ്റ്റ്യൻ, സരിഗ സനോജ് എന്നിവർ ജോയിന്റ് കൺവീനർമാരായും ചുമതലയേറ്റു.
പരിപാടികൾക്ക് സ്മൃതി ധനുൽ, ഫാത്തിമതുൽ ഫസ്ല, ദീപ പ്രമോദ് എന്നിവർ നേതൃത്വം നൽകി.
