ദുബായ്: ജീവനക്കാരുടെ സന്തോഷവും ക്ഷേമവും വർധിപ്പിക്കുന്നതിനും ജോലി–ജീവിത സന്തുലിതാവസ്ഥ പ്രോത്സാഹിപ്പിക്കുന്നതിനുമായി ദുബായിലെ ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സ്–ദുബായ് ‘ഹാപ്പിനസ് ഇൻ ട്രാവൽ’ എന്ന പേരിൽ പ്രത്യേക പ്രദർശനം സംഘടിപ്പിച്ചു.
ദുബായ് ജി ഡി ആർ എഫ് എ യുടെ മുഖ്യ കാര്യാലയത്തിലാണ് അഞ്ചുദിവസത്തെ പ്രദർശനം. നടന്നത് .സ്വദേശി ജീവനക്കാരുടെയും ഇന്ത്യക്കാർ അടക്കമുള്ള വിദേശി ജീവനക്കാരുടെയും -ജീവിതനിലവാരം മെച്ചപ്പെടുത്തുകയും, കൂടുതൽ പ്രചോദനാത്മകവും സന്തോഷകരവുമായ തൊഴിൽ അന്തരീക്ഷം സൃഷ്ടിക്കുകയും ചെയ്യുകയെന്ന ലക്ഷ്യത്തോടെയാണ് പ്രദർശനം .ജോലി സംബന്ധമായ ഉത്തരവാദിത്തങ്ങൾക്കൊപ്പം കുടുംബത്തിനും വ്യക്തിജീവിതത്തിനും ആവശ്യമായ സമയം കണ്ടെത്താൻ സഹായിക്കുന്ന തരത്തിലുള്ള ക്ഷേമപദ്ധതികളുടെ ഭാഗമായാണ് ഈ സംരംഭമെന്ന് അധികൃതർ വ്യക്തമാക്കി.
പ്രദർശനത്തിൽ പ്രമുഖ എയർലൈൻ കമ്പനികൾ, ഹോട്ടൽ ശൃംഖലകൾ, ട്രാവൽ ഏജൻസികൾ എന്നിവ പങ്കെടുത്തു. ജിഡിആർഎഫ്എ ദുബായ് ജീവനക്കാർക്കും ദുബായ് സർക്കാരിന്റെ വിവിധ വകുപ്പുകളിലെ ജീവനക്കാർക്കും പ്രത്യേക യാത്രാ പാക്കേജുകൾ, വിമാന ടിക്കറ്റുകളിൽ ആകർഷകമായ വിലക്കിഴിവുകൾ, ഹോട്ടൽ താമസ സൗകര്യങ്ങളിൽ പ്രത്യേക ഓഫറുകൾ, കുടുംബ അവധിക്കാല യാത്രകൾക്കായുള്ള എക്സ്ക്ലൂസീവ് ആനുകൂല്യങ്ങൾ എന്നിവ പ്രദർശനത്തിലൂടെ ലഭ്യമാക്കി.
ജീവനക്കാരുടെ ക്ഷേമം സ്ഥാപനത്തിന്റെ വികസനത്തിന്റെയും സേവനമികവിന്റെയും പ്രധാന ഘടകമാണെന്ന വിശ്വാസത്തോടെയാണ് ജിഡിആർഎഫ്എ ദുബായ് ഇത്തരം പദ്ധതികൾ തുടർച്ചയായി നടപ്പാക്കുന്നത്. സന്തുഷ്ടരും സംതൃപ്തരുമായ ജീവനക്കാർ മികച്ച പൊതുസേവനം നൽകാൻ കൂടുതൽ പ്രചോദനം നേടുമെന്ന സമീപനമാണ് സ്ഥാപനത്തിന്റെ വിവിധ ക്ഷേമപരിപാടികൾക്ക് അടിസ്ഥാനം.ജീവനക്കാരുടെ ശാരീരികവും മാനസികവും സാമൂഹികവുമായ ക്ഷേമം ഉറപ്പാക്കുന്ന നിരവധി സംരംഭങ്ങൾ ഇതിനുമുമ്പും ജിഡിആർഎഫ്എ ദുബായ് നടപ്പാക്കിയിട്ടുണ്ട്. അതിന്റെ തുടർച്ചയായാണ് ‘ഹാപ്പിനസ് ഇൻ ട്രാവൽ’ പ്രദർശനവും സംഘടിപ്പിച്ചിരിക്കുന്നത്. ജീവനക്കാരുടെ തൊഴിൽ സംതൃപ്തി ഉയർത്തുന്നതിനും സ്ഥാപനത്തോടുള്ള പ്രതിബദ്ധത ശക്തിപ്പെടുത്തുന്നതിനും കുടുംബത്തോടൊപ്പം കൂടുതൽ ഗുണമേൻമയുള്ള സമയം ചെലവഴിക്കാൻ അവസരമൊരുക്കുന്നതിനും ഈ പ്രദർശനം സഹായകരമാകുമെന്ന് അധികൃതർ അറിയിച്ചു.
