ട്രാപ്സിലും ലാ വെറിയറിലും നടത്തിയ വെടിവെപ്പിന് പിന്നാലെ 39-കാരനായ പ്രതിയെ പൊലീസ് പിടികൂടി; വംശീയ വിദ്വേഷ ആക്രമണമെന്ന സംശയത്തിൽ തീവ്രവാദ വിരുദ്ധ വിഭാഗം അന്വേഷണം തുടങ്ങി.
ട്രാപ്സ്, ഫ്രാൻസ് — ഒക്ടോബർ 23, 2026 : ഫ്രാൻസിന്റെ തലസ്ഥാനമായ പാരീസിന് സമീപമുള്ള ട്രാപ്സ് മേഖലയിൽ കാറിലെത്തിയ അക്രമി നടത്തിയ വെടിവെപ്പിൽ ഒരാൾ കൊല്ലപ്പെടുകയും 12 വയസ്സുള്ള പെൺകുട്ടിയടക്കം നാല് പേർക്ക് പരിക്കേൽക്കുകയും ചെയ്തു. സംഭവത്തിന് പിന്നിൽ ഭീകരാക്രമണ സാധ്യതയുണ്ടോ എന്നതിനെക്കുറിച്ച് ഫ്രഞ്ച് തീവ്രവാദ വിരുദ്ധ പ്രോസിക്യൂട്ടർമാർ സമഗ്രാന്വേഷണം ആരംഭിച്ചു.
വെള്ളിയാഴ്ച രാവിലെ പത്തരയോടെയാണ് (0830 GMT) പാരീസിൽനിന്ന് ഏകദേശം 20 കിലോമീറ്റർ അകലെയുള്ള ട്രാപ്സിലും സമീപ പ്രദേശമായ ലാ വെറിയറിലും അക്രമം അരങ്ങേറിയത്. ചാരനിറത്തിലുള്ള റെനോ ക്ലിയോ കാറിലെത്തിയ തോക്കുധാരി പെട്രോൾ പമ്പിന് സമീപത്തുനിന്നവർക്ക് നേരെ ഉൾപ്പെടെ യാതൊരു പ്രകോപനവുമില്ലാതെ തുരുതുരെ വെടിയുതിർക്കുകയായിരുന്നു.
സംഭവത്തിന് തൊട്ടുപിന്നാലെ 39 വയസ്സുകാരനായ പ്രതിയെ തൊട്ടടുത്ത പട്ടണമായ കോയ്നിയേഴ്സിൽനിന്ന് സുരക്ഷാസേന കസ്റ്റഡിയിലെടുത്തു.
പരമാവധി ആളപായം വരുത്തുകയെന്ന ലക്ഷ്യത്തോടെയാണ് അക്രമി ജനങ്ങൾക്ക് നേരെ വെടിയുതിർത്തതെന്ന് ട്രാപ്സ് മേയർ അലി റബേ വ്യക്തമാക്കി. കൊല്ലപ്പെട്ടയാൾ ആഫ്രിക്കൻ വംശജനാണെന്നും അതീവ ഗുരുതരാവസ്ഥയിൽ ചികിത്സയിലുള്ള പരിക്കേറ്റ ഒരാൾ വടക്കേ ആഫ്രിക്കൻ പശ്ചാത്തലമുള്ളയാളാണെന്നും അധികൃതർ അറിയിച്ചു. ലാ വെറിയറിൽ എട്ട് തവണ വെടിയേറ്റ 12 വയസ്സുകാരിയുടെ നില നിലവിൽ തൃപ്തികരമാണെന്ന് മേയർ നിക്കോളാസ് ഡെയ്ൻവിൽ സ്ഥിരീകരിച്ചു.
സംഭവത്തെ തുടർന്ന് ‘ഭീകര സംഘടനകളുമായി ബന്ധമുള്ള കൊലപാതകം’, കൊലപാതകശ്രമം എന്നീ വകുപ്പുകൾ ചുമത്തിയാണ് നാഷണൽ ആന്റി-ടെറർ പ്രോസിക്യൂഷൻ (PNAT) അന്വേഷണം തുടങ്ങിയത്. ഇരകളുടെ വംശീയത, ദേശീയത, മതം എന്നിവ ലക്ഷ്യമിട്ടാണോ അക്രമം നടത്തിയതെന്ന കാര്യവും വിശദമായി പരിശോധിക്കുന്നുണ്ട്.
സംഭവം അതീവ ഗൗരവമുള്ളതാണെന്നും സുരക്ഷാ-നീതിന്യായ വിഭാഗങ്ങൾ പൂർണ്ണ സജ്ജമായി രംഗത്തുണ്ടെന്നും ഫ്രഞ്ച് പ്രധാനമന്ത്രി സെബാസ്റ്റ്യൻ ലെകോർണു അറിയിച്ചു. അക്രമത്തിൽ ഇരയായവർക്കൊപ്പമാണ് രാജ്യമെന്ന് പ്രസിഡന്റ് ഇമ്മാനുവൽ മാക്രോൺ വ്യക്തമാക്കി. ഫോറൻസിക് ഉദ്യോഗസ്ഥരും പൊലീസും മേഖല പൂർണ്ണമായി നിയന്ത്രണത്തിലാക്കി തുടർനടപടികൾ സ്വീകരിച്ചു വരികയാണ്.
