ഷാർജ: ഖോർഫക്കാനിൽ നീല സൈൻബോർഡുകൾ സ്ഥാപിച്ചിരിക്കുന്ന പൊതു പാർക്കിങ് സ്ഥലങ്ങളിൽ പണം അടച്ച് പാർക്ക് ചെയ്യാനുള്ള സമയം ദീർഘിപ്പിച്ചു. Sharjah City Municipality ഖോർഫക്കാൻ മുനിസിപ്പാലിറ്റിയുമായി സഹകരിച്ചാണ് പുതിയ സമയക്രമം പ്രഖ്യാപിച്ചത്. ഫെബ്രുവരി 16 മുതൽ ഇത് പ്രാബല്യത്തിൽ വരും.
പുതിയ തീരുമാനം അനുസരിച്ച് പൊതു അവധി ദിനങ്ങളും വാരാന്ത്യങ്ങളും ഉൾപ്പെടെ എല്ലാ ദിവസവും രാവിലെ 8 മണി മുതൽ രാത്രി 12 മണിവരെ പണം അടച്ച് പാർക്ക് ചെയ്യാം. മുമ്പ് രാത്രി 10 മണിവരെയായിരുന്നു പെയ്ഡ് പാർക്കിങ് സമയം.
നഗരത്തിന്റെ സാമ്പത്തികവും വാണിജ്യപരവുമായ പ്രവർത്തനങ്ങൾ പരിഗണിച്ചാണ് സമയപരിഷ്കാരം നടപ്പാക്കിയത്. വിനോദസഞ്ചാര കേന്ദ്രങ്ങളിലെയും തിരക്കേറിയ പ്രദേശങ്ങളിലെയും പാർക്കിങ് ലഭ്യത മെച്ചപ്പെടുത്തുകയാണ് ലക്ഷ്യമെന്ന് അധികൃതർ അറിയിച്ചു.
പാർക്കിങ് ഉപയോഗ നിരക്ക്, സ്ഥലത്തിന്റെ സ്വഭാവം, ഉപഭോക്തൃ ആവശ്യം എന്നിവ വിലയിരുത്തിയ സമഗ്ര പഠനത്തിനുശേഷമാണ് തീരുമാനം. നിരവധി റസ്റ്റോറന്റുകളും കഫേകളും പ്രവർത്തിക്കുന്ന പ്രദേശങ്ങളിൽ രാത്രി 10 മണിക്ക് ശേഷം പാർക്കിങ് സൗകര്യം ലഭ്യമാകുന്നതിൽ ബുദ്ധിമുട്ടുണ്ടെന്ന താമസക്കാരുടെയും സന്ദർശകരുടെയും പരാതിയും പരിഗണിച്ചിട്ടുണ്ടെന്ന് അധികൃതർ വ്യക്തമാക്കി.
സമയം ദീർഘിപ്പിച്ചെങ്കിലും പാർക്കിങ് ഫീസിൽ മാറ്റമില്ല. സീസണൽ പെർമിറ്റുള്ളവർ നിലവിലെ നിരക്ക് തന്നെ നൽകുകയാൽ മതി. മുൻപ് 14 മണിക്കൂർ ലഭിച്ചിരുന്ന പാർക്കിങ് സൗകര്യം പുതിയ ക്രമീകരണത്തോടെ 16 മണിക്കൂറായി വർധിക്കും.
അതേസമയം, ഖോർഫക്കാനിലെ മറ്റ് പ്രദേശങ്ങളിൽ റമദാനിനുള്ള പ്രത്യേക സമയക്രമം ഒഴികെ പാർക്കിങ് സമയം പഴയ നിലയിൽ തുടരും.
