പരമ്പരാഗത പുകവലി നിയന്ത്രണവും സുരക്ഷിത ബദലുകളും സമന്വയിപ്പിച്ച സ്വീഡിഷ് രീതി യുഎഇ അടക്കമുള്ള ഗൾഫ് രാജ്യങ്ങളിൽ പുകവലി കുറയ്ക്കാൻ സഹായിക്കുമെന്ന് വിദഗ്ദ്ധർ
ദുബായ് : പ്രതിദിന പുകവലി നിരക്ക് 3.7 ശതമാനത്തിലേക്ക് താഴ്ത്തി യൂറോപ്യൻ യൂണിയനിൽ പുകവലിമുക്ത പദവി നേടുന്ന ആദ്യ രാജ്യമായി സ്വീഡൻ മാറിയത്, യുഎഇ ഉൾപ്പെടെയുള്ള മിഡിൽ ഈസ്റ്റ് രാജ്യങ്ങളിലെ പൊതുജനാരോഗ്യ നയരൂപീകരണത്തിന് മികച്ച മാതൃകയാണെന്ന് ദുബായിൽ ചേർന്ന ആരോഗ്യ വിദഗ്ദ്ധരുടെ സമ്മേളനം വ്യക്തമാക്കി.
യൂറോപ്യൻ യൂണിയൻ നിശ്ചയിച്ച മാനദണ്ഡപ്രകാരം പുകവലി നിരക്ക് അഞ്ച് ശതമാനത്തിൽ താഴെയായാൽ ഒരു രാജ്യത്തെ പുകവലിമുക്തമായി (Smoke-free) പ്രഖ്യാപിക്കാം. 2040-ഓടെ യൂറോപ്യൻ യൂണിയൻ ലക്ഷ്യമിടുന്ന ഈ നേട്ടം 16 വർഷം മുൻപേ സ്വീഡൻ കൈവരിച്ചു കഴിഞ്ഞു. ഈ വിജയത്തിന് പിന്നിലെ ശാസ്ത്രീയ വശങ്ങളും നയങ്ങളും ചർച്ച ചെയ്യാൻ ‘ക്വിറ്റ് ലൈക്ക് സ്വീഡൻ’ (QLS) ദുബായ് പാം ജുമൈറയിലെ ഹിൽട്ടൺ ഹോട്ടലിൽ സംഘടിപ്പിച്ച സെമിനാറിലാണ് രാജ്യാന്തര ആരോഗ്യ വിദഗ്ദ്ധർ ഒത്തുചേർന്നത്.
പുകവലി പൂർണ്ണമായി നിരോധിക്കുന്നതിന് പകരം, പുകയില ഉപഭോഗം കുറയ്ക്കുന്നതിനുള്ള ലോകാരോഗ്യ സംഘടനയുടെ (WHO) മാനദണ്ഡങ്ങൾ നടപ്പിലാക്കുകയും അതോടൊപ്പം മുതിർന്നവർക്ക് സിഗരറ്റിന് പകരമായി ഉപയോഗിക്കാവുന്ന സുരക്ഷിത ബദലുകൾ ലഭ്യമാക്കുകയും ചെയ്തതാണ് സ്വീഡന്റെ വിജയരഹസ്യം.
സിഗരറ്റ് ബദലുകൾ എളുപ്പത്തിൽ ലഭ്യമാവുക (Accessible), ആളുകളുടെ ശീലങ്ങൾക്കും താല്പര്യങ്ങൾക്കും അനുയോജ്യമാവുക (Acceptable), സിഗരറ്റിനേക്കാൾ വിലക്കുറവുണ്ടാവുക (Affordable) എന്നീ മൂന്ന് ഘടകങ്ങളാണ് സ്വീഡിഷ് വിജയത്തിന് ആധാരമെന്ന് വിദഗ്ദ്ധർ ചൂണ്ടിക്കാട്ടി. ഇവ ഉറപ്പാക്കിയില്ലെങ്കിൽ സിഗരറ്റ് ഉപേക്ഷിക്കാൻ ആളുകൾ മടിക്കുമെന്ന് ആരോഗ്യ പ്രവർത്തകർ വിലയിരുത്തുന്നു.
യുഎഇയിൽ 2019 മുതൽ ഇ-സിഗരറ്റുകൾക്കും, 2025 മുതൽ നിക്കോട്ടിൻ പൗച്ചുകൾക്കും മുതിർന്നവർക്കിടയിൽ നിയമാനുസൃത അനുമതി നൽകിയിട്ടുണ്ട്. ജനസംഖ്യയിൽ 90 ശതമാനത്തോളം വരുന്ന പ്രവാസികൾ തങ്ങളുടെ നാടുകളിൽ നിന്നുള്ള പലവിധ പുകയില ശീലങ്ങളും ഇവിടെ കൊണ്ടുവരുന്നുണ്ട്. വെറ്റില മുറുക്കും നസ്വായും ഇതിൽ ഉൾപ്പെടുന്നു. എന്നാൽ അനുകൂലമായ അന്തരീക്ഷവും ബദൽ മാർഗ്ഗങ്ങളും ലഭിച്ചാൽ ഇത്തരം ശീലങ്ങൾ മാറ്റിയെടുക്കാമെന്നാണ് സ്വീഡനിലെ കണക്കുകൾ വ്യക്തമാക്കുന്നത്. സ്വീഡനിലെത്തുന്ന യൂറോപ്യൻ കുടിയേറ്റക്കാർക്കിടയിലെ പുകവലി നിരക്ക് വെറും 7.8 ശതമാനമാണ്. അവരുടെ സ്വന്തം നാടുകളിലിത് ശരാശരി 24 ശതമാനമായിരുന്നു.
പുകവലി ഉപേക്ഷിക്കാൻ ആഗ്രഹിക്കുന്ന രോഗികൾ നേരിടുന്ന പ്രതിസന്ധികളെക്കുറിച്ച് സൗദി ജർമ്മൻ ഹോസ്പിറ്റലിലെ ഡോ. റേച്ചൽ കാമിൻസ്കി വിശദീകരിച്ചു.
“വളരെ ചെറിയ പ്രായത്തിൽ തന്നെ പുകവലി മൂലം ശ്വാസകോശത്തിന് ഗുരുതരമായ തകരാറുകൾ സംഭവിച്ച ആളുകൾ ചികിത്സ തേടിയെത്തുന്നുണ്ട്. പുകവലി നിർത്താൻ ഒന്നിലധികം തവണ ശ്രമിച്ച് പരാജയപ്പെട്ടവരാണ് പലരും. എന്നാൽ ഇൻഷുറൻസ് പരിരക്ഷയുള്ള കൃത്യമായ കൗൺസിലിംഗും ചികിത്സാ സംവിധാനങ്ങളും ലഭ്യമാകാത്തതാണ് അവർ നേരിടുന്ന പ്രധാന വെല്ലുവിളി. ശരിയായ ബദൽ മാർഗ്ഗങ്ങൾ നൽകിയില്ലെങ്കിൽ രോഗകാരണത്തിന് പകരം രോഗലക്ഷണങ്ങളെ മാത്രം ചികിത്സിക്കേണ്ടി വരും,” ഡോ. കാമിൻസ്കി പറഞ്ഞു.
ഷിഷയും മിദ്‌വാകും സിഗരറ്റിനേക്കാൾ ദോഷം കുറഞ്ഞതാണെന്ന തെറ്റായ ധാരണ ഗൾഫ് മേഖലയിലുണ്ടെന്ന് കൺസൾട്ടന്റ് പൾമണോളജിസ്റ്റ് ഡോ. മുഹമ്മദ് ഫൗസി കത്രാൻജി ചൂണ്ടിക്കാട്ടി. മിദ്‌വാകിൽ ഉപയോഗിക്കുന്ന ദോഖയിൽ സിഗരറ്റിനേക്കാൾ അഞ്ചിരട്ടി നിക്കോട്ടിനും 55 ശതമാനത്തിലധികം ടാറും അടങ്ങിയിട്ടുണ്ട്. ഒരു മണിക്കൂർ നീളുന്ന ഷിഷ ഉപയോഗം 40-ലധികം സിഗരറ്റുകൾക്ക് തുല്യമായ പുക ശ്വാസകോശത്തിലെത്തിക്കുന്നു.
ഇ-സിഗരറ്റുകളെക്കുറിച്ചുള്ള അനാവശ്യ ആശങ്കകൾ അടിസ്ഥാനരഹിതമാണെന്ന് വിദഗ്ദ്ധർ വ്യക്തമാക്കി. 2019-ൽ യുഎസിൽ റിപ്പോർട്ട് ചെയ്ത ശ്വാസകോശ രോഗബാധ (EVALI) വ്യാജമായി നിർമ്മിച്ച കഞ്ചാവ് (THC) കാട്രിഡ്ജുകളിൽ വൈറ്റമിൻ ഇ അസറ്റേറ്റ് കലർന്നതുകൊണ്ടാണ് ഉണ്ടായതെന്ന് ഡബ്ലിനിലെ ലഹരിവിമോചന വിദഗ്ദ്ധൻ ഡോ. ഗാരറ്റ് മക്ഗവേൺ വിശദീകരിച്ചു. നിയമപരമായ നിക്കോട്ടിൻ വേപ്പറുകളുമായി ഇതിന് ബന്ധമില്ല. കൂടാതെ, പോപ്‌കോൺ ഫാക്ടറികളിലെ ഡയാസെറ്റിൽ ശ്വസിച്ച തൊഴിലാളികൾക്കുണ്ടായ ‘പോപ്‌കോൺ ലങ്’ രോഗം വേപ്പിംഗ് മൂലം ഉണ്ടായതായി ഇതുവരെ ശാസ്ത്രീയമായി തെളിയിക്കപ്പെട്ടിട്ടില്ല. സിഗരറ്റ് പുകയിൽ വലിയ അളവിൽ ഡയാസെറ്റിൽ അടങ്ങിയിട്ടുണ്ടെങ്കിലും സിഗരറ്റ് വലിക്കുന്നവരിൽ ഈ രോഗം സ്ഥിരീകരിച്ചിട്ടില്ലെന്നും അദ്ദേഹം ചൂണ്ടിക്കാട്ടി.
നിക്കോട്ടിൻ ശീലമുണ്ടാക്കുന്ന ഘടകമാണെങ്കിലും പുകവലി മൂലമുണ്ടാകുന്ന രോഗങ്ങൾക്ക് പ്രധാന കാരണം പുകയിലെ ടാറും കാർബൺ മോണോക്സൈഡുമാണെന്ന് അമ്പത് വർഷം മുൻപ് ബ്രിട്ടീഷ് ഗവേഷകൻ പ്രൊഫസർ മൈക്കൽ റസ്സൽ വ്യക്തമാക്കിയ കാര്യം വിദഗ്ദ്ധർ അനുസ്മരിച്ചു. ലോകാരോഗ്യ സംഘടനയുടെ അവശ്യ മരുന്നുകളുടെ പട്ടികയിൽ നിക്കോട്ടിൻ ഉൾപ്പെടുത്തിയിട്ടുണ്ട്. കൂടാതെ, നിയന്ത്രിത അളവിലുള്ള സുരക്ഷിത ഉൽപ്പന്നങ്ങൾക്ക് യുഎസ് എഫ്ഡിഎ അംഗീകാരം നൽകിയിട്ടുമുണ്ട്.
മാനസിക സമ്മർദ്ദവും വിഷാദവും നേരിടുന്നവരിൽ പുകവലി നിരക്ക് കൂടുതലാണെന്നും ഇവർക്ക് പ്രത്യേക പരിഗണന നൽകണമെന്നും ഡോ. മക്ഗവേൺ പറഞ്ഞു. സ്വീഡനിൽ പുരുഷന്മാർ പരമ്പരാഗത സ്നൂസ് (Snus) സ്വീകരിച്ചപ്പോൾ, പുകയിലയില്ലാത്ത നിക്കോട്ടിൻ പൗച്ചുകൾ സ്ത്രീകളെ പുകവലി ഉപേക്ഷിക്കാൻ സഹായിച്ചതായി വീ ആർ ഇന്നൊവേഷൻ സിസിഒ ബിയാട്രിസ് സാന്റോസ് ചൂണ്ടിക്കാട്ടി.
“ഓരോ പുകവലി കണക്കിന് പിന്നിലും ഒരു വ്യക്തിയും കുടുംബവുമുണ്ട്,” ക്വിറ്റ് ലൈക്ക് സ്വീഡൻ സ്ഥാപക സൂലി കാസ്ട്രോ പറഞ്ഞു. “പുകവലിക്കുന്ന മുതിർന്നവർക്ക് നിലവാരമുള്ള ബദലുകൾ ലഭ്യമാക്കുകയാണ് യുഎഇയിലും പശ്ചിമേഷ്യൻ രാജ്യങ്ങളിലും ഇനി വേണ്ടത്. സ്വീഡൻ നടപ്പിലാക്കിയ മാതൃക മറ്റ് രാജ്യങ്ങൾക്കും മുന്നോട്ടുള്ള വഴികാട്ടിയാണ്.”
