റാസൽഖൈമ: പൊതുഗതാഗത രംഗത്ത് പുതിയ ചുവടുവെപ്പുമായി റാസൽഖൈമയിൽ ഇലക്ട്രിക് ബസ് സർവീസുകൾ ആരംഭിച്ചു. പരിസ്ഥിതി സൗഹൃദ യാത്രാ സംവിധാനങ്ങൾ പ്രോത്സാഹിപ്പിക്കുന്നതിന്റെയും പൊതുഗതാഗത സേവനങ്ങൾ കൂടുതൽ കാര്യക്ഷമമാക്കുന്നതിന്റെയും ഭാഗമായാണ് റാസൽഖൈമ ട്രാൻസ്പോർട്ട് അതോറിറ്റി പദ്ധതി നടപ്പിലാക്കിയത്. ആദ്യഘട്ടത്തിൽ ഒരു മാസം പരീക്ഷണാടിസ്ഥാനത്തിൽ യാത്രക്കാർക്ക് സൗജന്യ യാത്രാസൗകര്യവും ഒരുക്കിയിട്ടുണ്ട്.
എമിറേറ്റിലെ പ്രധാന ബസ് റൂട്ടുകളിലൊന്നായ പർപ്പിൾ റൂട്ടിന്റെ നവീകരണത്തിന് ശേഷമാണ് പുതിയ ഇലക്ട്രിക് ബസുകൾ സർവീസ് ആരംഭിച്ചത്. നഖീൽ ബസ് സ്റ്റേഷനിൽ നിന്ന് മനാർ മാൾ വരെ ഏകദേശം 14 കിലോമീറ്റർ ദൈർഘ്യമുള്ള റൂട്ടിലാണ് സർവീസ് നടത്തുന്നത്.
ജനവാസ മേഖലകൾ, ആരോഗ്യ സ്ഥാപനങ്ങൾ, വിദ്യാഭ്യാസ കേന്ദ്രങ്ങൾ, സർക്കാർ ഓഫീസുകൾ എന്നിവയെ ബന്ധിപ്പിക്കുന്ന ഒമ്പത് പ്രധാന സ്റ്റോപ്പുകളാണ് പർപ്പിൾ റൂട്ടിലുള്ളത്. ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്, കസ്റ്റംസ് ആൻഡ് പോർട്ട് സെക്യൂരിറ്റി, ഉബൈദുള്ള ഹോസ്പിറ്റൽ, അമേരിക്കൻ യൂണിവേഴ്സിറ്റി ഓഫ് റാസൽഖൈമ, അൽ സെയ് മേഖല, റാസൽഖൈമ ഹോസ്പിറ്റൽ, പബ്ലിക് ഹെൽത്ത് സെന്റർ, പീപ്പിൾ ഓഫ് ഡിറ്റർമിനേഷൻ സെന്റർ, മനാർ മാൾ ബസ് സ്റ്റേഷൻ എന്നിവയെ ബന്ധിപ്പിച്ചാണ് സർവീസ് ക്രമീകരിച്ചിരിക്കുന്നത്.
യാത്രക്കാരുടെ ആവശ്യകത പരിഗണിച്ച് പ്രതിദിനം 12 ട്രിപ്പുകളാണ് സർവീസ് നടത്തുന്നത്. റാസൽഖൈമയിലെ അഞ്ച് പ്രധാന പൊതുഗതാഗത റൂട്ടുകളിൽ ഒന്നായ പർപ്പിൾ റൂട്ടിന് പുറമെ റെഡ്, ഗ്രീൻ, ബ്ലൂ, ഓറഞ്ച് റൂട്ടുകളും നിലവിലുണ്ട്. എമിറേറ്റിലെ പ്രധാന ജനവാസ-വാണിജ്യ മേഖലകളെ പരസ്പരം ബന്ധിപ്പിക്കുന്നതാണ് ഈ ശൃംഖല.
പെട്രോൾ, ഡീസൽ വാഹനങ്ങളിൽ നിന്നുള്ള ആശ്രിതത്വം കുറച്ച് ഇലക്ട്രിക് ഗതാഗത സംവിധാനങ്ങളിലേക്ക് പൊതുജനങ്ങളെ ആകർഷിക്കുകയാണ് പദ്ധതിയുടെ പ്രധാന ലക്ഷ്യമെന്ന് റാസൽഖൈമ ട്രാൻസ്പോർട്ട് അതോറിറ്റി വ്യക്തമാക്കി. പർപ്പിൾ റൂട്ടിന്റെ നവീകരണത്തോടെ എമിറേറ്റിലെ പൊതുഗതാഗത റൂട്ടുകളുടെ ആകെ ദൈർഘ്യം 215 കിലോമീറ്ററിലെത്തിയതായും 2026 അവസാനത്തോടെ ഇത് കൂടുതൽ വിപുലീകരിക്കുമെന്നും അധികൃതർ അറിയിച്ചു.
പരിസ്ഥിതി സംരക്ഷണത്തിനും സുസ്ഥിര വികസന ലക്ഷ്യങ്ങൾ കൈവരിക്കുന്നതിനുമായി ആധുനികവും ഹരിതവുമായ ഗതാഗത സംവിധാനങ്ങൾ വ്യാപിപ്പിക്കുകയാണ് ലക്ഷ്യമെന്ന് റാസൽഖൈമ ട്രാൻസ്പോർട്ട് അതോറിറ്റി ഡയറക്ടർ ജനറൽ എഞ്ചിനീയർ ഇസ്മായിൽ ഹസ്സൻ അൽ ബലൂഷി പറഞ്ഞു. അതിവേഗം വളരുന്ന നഗരമായ റാസൽഖൈമയിൽ ആഗോള നിലവാരത്തിലുള്ള പൊതുഗതാഗത സംവിധാനം ഒരുക്കാനുള്ള ശ്രമങ്ങൾ തുടരുമെന്നും അദ്ദേഹം വ്യക്തമാക്കി.
അതേസമയം, യാത്രക്കാർക്ക് യാത്രാ വിവരങ്ങൾ എളുപ്പത്തിൽ ലഭ്യമാക്കുന്നതിനായി ‘സായർ’ സ്മാർട്ട് ആപ്ലിക്കേഷൻ ഉപയോഗിക്കാനും അധികൃതർ നിർദേശിച്ചു. ബസ് ഷെഡ്യൂളുകൾ പരിശോധിക്കാനും റൂട്ടുകൾ തത്സമയം നിരീക്ഷിക്കാനും യാത്രകൾ മുൻകൂട്ടി ആസൂത്രണം ചെയ്യാനുമുള്ള സൗകര്യം ആപ്പിലൂടെ ലഭിക്കും.
