വാദി അൽ അമർദി വരെയുള്ള 5 കിലോമീറ്റർ പാതയിൽ ശേഷി മണിക്കൂറിൽ 16,000 വാഹനങ്ങളായി ഉയരും; യാത്രാസമയത്തിൽ 25 ശതമാനം കുറവ്.
ദുബായ്, ഓഗസ്റ്റ് 27, 2026:ഷാർജയിൽ നിന്ന് ദുബായിലെ വാദി അൽ അമർദി ഭാഗത്തേക്ക് പോകുന്ന വാഹനങ്ങളുടെ തിരക്ക് കുറയ്ക്കുന്നതിനായി എമിറേറ്റ്സ് റോഡിലെ 5 കിലോമീറ്റർ വികസന പാത ഓഗസ്റ്റ് 30-ന് ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി (RTA) ഗതാഗതത്തിനായി തുറന്നുകൊടുക്കും.
നിർദ്ദിഷ്ട റോഡിൽ നിലവിലുള്ള ആറ് വരികൾ എട്ടായി ഉയർത്തുന്നതോടെ, പാതയുടെ ശേഷി 33 ശതമാനം വർധിക്കും. ഇതുവഴി മണിക്കൂറിൽ 12,000 വാഹനങ്ങൾ കടന്നുപോയിരുന്ന സ്ഥാനത്ത് 16,000 വാഹനങ്ങൾക്ക് തടസ്സമില്ലാതെ സഞ്ചരിക്കാനാകും. തിരക്കേറിയ സമയങ്ങളിൽ യാത്രാസമയത്തിൽ 25 ശതമാനം വരെ കുറവുണ്ടാകുമെന്ന് ആർടിഎ വ്യക്തമാക്കി.
ദുബായിയെയും വടക്കൻ എമിറേറ്റ്സുകളെയും ബന്ധിപ്പിക്കുന്ന പ്രധാന ഗതാഗത പാതയായ എമിറേറ്റ്സ് റോഡിലൂടെ പ്രതിദിനം ഇരുഭാഗങ്ങളിലേക്കുമായി 2,40,000-ത്തിലധികം വാഹനങ്ങളാണ് കടന്നുപോകുന്നത്. വ്യാവസായിക മേഖലകൾ, താമസമേഖലകൾ, ചരക്ക് ഗതാഗത കേന്ദ്രങ്ങൾ എന്നിവയെ ബന്ധിപ്പിക്കുന്നതിൽ ഈ പാത നിർണായക പങ്ക് വഹിക്കുന്നു.
മേഖലയിലെ ജനസംഖ്യാ വർധനവും വാണിജ്യ ആവശ്യങ്ങളും മുൻനിർത്തി നടത്തിയ ഗതാഗത പഠനങ്ങളുടെ അടിസ്ഥാനത്തിലാണ് പുതിയ വികസന പദ്ധതി നടപ്പിലാക്കിയത്. മുൻപ് അൽ അവിർ 1-ലേക്കുള്ള പുതിയ പ്രവേശന കവാടവും അൽ അമർദി സ്ട്രീറ്റുമായുള്ള ബന്ധിപ്പിക്കലും പൂർത്തിയായതിന് പിന്നാലെയാണ് പുതിയ പാതയും സജ്ജമായിരിക്കുന്നത്.
