സൂറിച്ച്: മുൻ ഗൂഗിൾ എൻജിനീയർമാർ സ്ഥാപിച്ച ഓട്ടോണമസ് സോഫ്റ്റ്‌വെയർ ടെസ്റ്റിങ് സ്റ്റാർട്ടപ്പായ ക്ലാരന്റ് (Klarent) 8 ദശലക്ഷം ഡോളറിന്റെ (ഏകദേശം 70 കോടി രൂപ) സീഡ് ഫണ്ടിങ് സമാഹരിച്ചു. മൊസൈക് വെഞ്ച്വേഴ്സ് നേതൃത്വം നൽകിയ നിക്ഷേപ റൗണ്ടിൽ മൂൺഫയർ വെഞ്ച്വേഴ്സും ഏതാനും ഏഞ്ചൽ നിക്ഷേപകരും പങ്കാളികളായി. യൂറോപ്പിലെ മികച്ച വളർച്ചയ്ക്കു പിന്നാലെ അമേരിക്കൻ വിപണിയിലേക്ക് വികസിക്കാനാണ് തുക വിനിയോഗിക്കുക.
കോഴിക്കോട് സ്വദേശിയായ അഷീം പനക്കാട്ട് (സിഇഒ), മൊംചിൽ ഇവാനോവ് (സിടിഒ) എന്നിവരാണ് സ്ഥാപകർ. ഗൂഗിളിൽ ലെൻസ്, മാപ്സ് വിഭാഗങ്ങളിൽ പ്രവർത്തിച്ചിരുന്നവരാണ് ഇരുവരും. കണ്ണൂരിൽ ജനിച്ച് സ്കൂൾ വിദ്യാഭ്യാസം പൂർത്തിയാക്കിയ അഷീം, കോഴിക്കോട് എൻഐടിയിൽ നിന്നാണ് ബി.ടെക് ബിരുദം നേടിയത്.
എഐ എഴുതുന്ന കോഡിന്റെ അളവ് വർധിക്കുന്നതോടെ അവ പരിശോധിക്കാനുള്ള സംവിധാനത്തിന്റെ ആവശ്യകത കൂടുമെന്നാണ് കമ്പനിയുടെ വിലയിരുത്തൽ. ജെഡി സ്പോർട്സ്, എൻസെഡ്ഇസഡ്, സിക്‌സ്റ്റ് തുടങ്ങിയവ ക്ലാരന്റിന്റെ ഇടപാടുകാരിൽ ഉൾപ്പെടുന്നു.
