ജനറേറ്റീവ് എഐ ഉപയോഗിച്ച് നിർമ്മിക്കുന്ന ഗാനങ്ങൾക്ക് ചാർട്ടുകളിൽ ഇടം നേടാൻ ഇനി മനുഷ്യ നിർമ്മിതിയും നിയമപരമായ ലൈസൻസും നിർബന്ധം.
അബുദാബി, ഓഗസ്റ്റ് 19, 2026:മിഡിൽ ഈസ്റ്റ്, ഉത്തരാഫ്രിക്കൻ (MENA) രാജ്യങ്ങളിലെ ഔദ്യോഗിക സംഗീത ചാർട്ടുകളിൽ ഇടംപിടിക്കുന്ന ഗാനങ്ങൾക്ക് ജനറേറ്റീവ് ആർട്ടിഫിഷ്യൽ ഇന്റലിജൻസ് (GenAI) ഉപയോഗവുമായി ബന്ധപ്പെട്ട് പുതിയ നിബന്ധനകൾ പ്രാബല്യത്തിൽ വന്നു.
ഇന്റർനാഷണൽ ഫെഡറേഷൻ ഓഫ് ദി ഫോണോഗ്രാഫിക് ഇൻഡസ്ട്രി (IFPI) മുൻകൈയെടുത്ത് തയാറാക്കിയ പുതിയ മാർഗ്ഗനിർദ്ദേശങ്ങൾ യുഎഇ, സൗദി അറേബ്യ, ഈജിപ്ത് തുടങ്ങി 13 മേഖലകളിലെ ഔദ്യോഗിക സംഗീത ചാർട്ടുകൾക്ക് ബാധകമായിരിക്കും. സോണി മ്യൂസിക്, യൂണിവേഴ്സൽ മ്യൂസിക് ഗ്രൂപ്പ്, വാർണർ മ്യൂസിക് ഗ്രൂപ്പ് എന്നീ പ്രമുഖ സംഗീത നിർമ്മാണ കമ്പനികളുടെ പിന്തുണയോടെയാണ് ഈ നിയന്ത്രണങ്ങൾ നടപ്പിലാക്കുന്നത്.
പുതിയ നിയമപ്രകാരം, എഐ സാങ്കേതികവിദ്യ ഉപയോഗിച്ച് നിർമ്മിക്കുന്ന ഒരു ഗാനം ഔദ്യോഗിക ചാർട്ടുകളിൽ ഉൾപ്പെടുത്തണമെങ്കിൽ മൂന്ന് പ്രധാന നിബന്ധനകൾ പാലിക്കണം. ഗാനത്തിന്റെ ഭൂരിഭാഗവും മനുഷ്യന്റെ സർഗ്ഗാത്മക സൃഷ്ടിയായിരിക്കണം, ഉപയോഗിച്ച എഐ പ്ലാറ്റ്‌ഫോം പൂർണ്ണമായും അനുമതി ഉള്ളതും നിയമപരവുമായിരിക്കണം, കൂടാതെ കൃത്രിമമായി സ്ട്രീമിംഗ് കണക്കുകളിൽ മാറ്റം വരുത്തിയിട്ടില്ലെന്ന് ഉറപ്പാക്കുകയും വേണം.
കലാകാരന്മാരുടെ അനുമതിയില്ലാതെ അവരുടെ സംഗീതം ഉപയോഗിച്ച് പരിശീലനം നൽകിയ എഐ മോഡലുകൾ സ്ട്രീമിംഗ് പ്ലാറ്റ്‌ഫോമുകളിൽ വ്യാപകമാകുന്ന പശ്ചാത്തലത്തിലാണ് ഈ നടപടി. പകർപ്പവകാശ ലംഘനം തടയുന്നതിനും യഥാർത്ഥ കലാകാരന്മാരുടെ അവകാശങ്ങൾ സംരക്ഷിക്കുന്നതിനുമാണ് ഈ മാറ്റങ്ങൾ ലക്ഷ്യമിടുന്നത്.
മാനുഷികമായ സർഗ്ഗാത്മകതയെയും കലാകാരന്മാരുടെ പരിശ്രമത്തെയും ആദരിക്കാനാണ് സംഗീത ചാർട്ടുകൾ നിലകൊള്ളുന്നതെന്ന് IFPI ചീഫ് എക്സിക്യൂട്ടീവ് വിക്ടോറിയ ഓക്ലി പറഞ്ഞു. പുതിയ സാങ്കേതികവിദ്യകളെ സ്വാഗതം ചെയ്യുമ്പോൾ തന്നെ കലാകാരന്മാരുടെ അവകാശങ്ങൾ സംരക്ഷിക്കപ്പെടേണ്ടതുണ്ടെന്ന് IFPI മെന റീജിയണൽ ഡയറക്ടർ റവാൻ അൽ-ദബ്ബാസും വ്യക്തമാക്കി.
