കൂത്തുപറമ്പ് | UAE വാർത്ത
വലിയവെളിച്ചം വ്യവസായ മേഖലയിൽ പ്രവർത്തിക്കുന്ന ഒരു വെളിച്ചെണ്ണ നിർമാണ കമ്പനിയുടെ മലിനജല ശുദ്ധീകരണ പ്ലാന്റിലെ ടാങ്കിൽ വീണ് രണ്ടു വയസ്സുകാരി മരിച്ചു. ലിവന്റോ വെർജിൻ ഓയിൽ കമ്പനിയിൽ ജോലി ചെയ്യുന്ന ജാർഖണ്ഡ് സ്വദേശി ബെനഡിക്ടിന്റെ മകൾ ആസ്മികയാണ് മരിച്ചത്.
വ്യാഴാഴ്ച പുലർച്ചെ 3.30ഓടെയാണ് ദാരുണമായ സംഭവം നടന്നത്. ബെനഡിക്ടും ഭാര്യ പ്രേമകുമാരിയും പ്ലാന്റിൽ ജോലിക്കായി പോയ സമയത്തായിരുന്നു അപകടം. സ്ഥാപനത്തിന്റെ കോമ്പൗണ്ടിനകത്തെ താമസസ്ഥലത്തുനിന്ന് കുട്ടി പുറത്തേക്ക് ഇറങ്ങി നടക്കുന്നതിനിടെ അബദ്ധത്തിൽ മലിനജല ടാങ്കിൽ വീഴുകയായിരുന്നു.
കുട്ടിയെ ഉടൻ പുറത്തെടുത്ത് കൂത്തുപറമ്പ് താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. തുടർന്ന് മൃതദേഹം തലശ്ശേരി ജനറൽ ആശുപത്രി മോർച്ചറിയിലേക്ക് മാറ്റി.
