2025-ൽ ഇരുരാജ്യങ്ങളും തമ്മിലുള്ള ഉഭയകക്ഷി വ്യാപാരം 4.2 ബില്യൺ ഡോളറിലെത്തി; റെക്കോർഡ് വേഗത്തിൽ ചർച്ചകൾ പൂർത്തിയാക്കി പുതിയ തന്ത്രപ്രധാന കരാർ
കാനഡ / അബുദാബി, യു.എ.ഇ : യുണൈറ്റഡ് അറബ് എമിറേറ്റും (യു.എ.ഇ) കാനഡയും തമ്മിലുള്ള സമഗ്ര സാമ്പത്തിക പങ്കാളിത്ത കരാർ (CEPA) ചർച്ചകൾ വിജയികരമായി പൂർത്തിയായി. ഇരു രാജ്യങ്ങളും തമ്മിലുള്ള വ്യാപാര-സാമ്പത്തിക ബന്ധത്തിലെ നിർണ്ണായക നാഴികക്കല്ലാണിത്. യു.എ.ഇയുടെ സേപാ (CEPA) പദ്ധതി ചരിത്രത്തിലും കാനഡയുടെ വിദേശ വ്യാപാര ചരിത്രത്തിലും ഏറ്റവും വേഗത്തിൽ ചർച്ച പൂർത്തിയാക്കി ഒപ്പുവെക്കുന്ന കരാർ എന്ന അപൂർവ്വ നേട്ടവും ഈ പങ്കാളിത്തത്തിന് ലഭിച്ചു.
കാനഡ സന്ദർശനത്തിനെത്തിയ യു.എ.ഇ വിദേശ വ്യാപാര കാര്യ സഹമന്ത്രി ഡോ. താനി ബിൻ അഹമ്മദ് അൽ സിയൂദിയും കാനഡയുടെ അന്താരാഷ്ട്ര വ്യാപാര മന്ത്രി മനിന്ദർ സിദ്ധുവും ചേർന്നാണ് തന്ത്രപ്രധാനമായ ഈ കരാർ പ്രഖ്യാപനം നടത്തിയത്.
വ്യവസായ രംഗത്തെ വൻ കുതിച്ചുചാട്ടം
2025-ൽ യു.എ.ഇയും കാനഡയും തമ്മിലുള്ള വ്യാപാര ഇടപാടുകൾ 21 ശതമാനം വളർച്ചയോടെ 4.2 ബില്യൺ ഡോളറിലെത്തിയിരുന്നു. പുതിയ കരാർ നിലവിൽ വരുന്നതോടെ ഇറക്കുമതി-കയറ്റുമതി തീരുവകൾ കുറയുകയും, ചുവപ്പുനാട കുരുക്കുകൾ ഒഴിവാകുകയും ചെയ്യും.
വ്യോമയാനം, കൃഷി, സമുദ്രവിഭവങ്ങൾ, ശുദ്ധ ഊർജ്ജം, ഡാറ്റാ സെന്ററുകൾ, ഖനനം, എൽ.എൻ.ജി (LNG) ഫെസിലിറ്റികൾ തുടങ്ങി വിവിധ തന്ത്രപ്രധാന മേഖലകളിലേക്ക് കോടിക്കണക്കിന് ഡോളറിന്റെ പുതിയ നിക്ഷേപങ്ങൾ ഒഴുകാൻ ഈ കരാർ വഴിയൊരുക്കും.
നേതാക്കളുടെ വാക്കുകൾ
“യു.എ.ഇയും കാനഡയും തമ്മിലുള്ള നിർണ്ണായകമായ തന്ത്രപ്രധാന ബന്ധത്തിന്റെ പ്രതിഫലനമാണ് ഈ കരാർ. ക്ലീൻ എനർജി, അഡ്വാൻസ്ഡ് ടെക്നോളജി, ഡാറ്റാ സെന്ററുകൾ, വ്യോമയാനം, മൈനിംഗ് എന്നീ മേഖലകളിൽ ഇരു രാജ്യങ്ങളിലെയും വ്യവസായ സമൂഹങ്ങൾക്ക് വലിയ അവസരങ്ങളാണ് ഇത് തുറന്നുനൽകുന്നത്.” — ഡോ. താനി ബിൻ അഹമ്മദ് അൽ സിയൂദി, യു.എ.ഇ വിദേശ വ്യാപാര കാര്യ സഹമന്ത്രി
“കാനഡയുടെ ചരിത്രത്തിൽ തന്നെ ഏറ്റവും വേഗത്തിൽ ചർച്ച പൂർത്തിയാക്കിയ കരാറാണിത്. യു.എ.ഇയെ ഒരു പ്രമുഖ റീജിയണൽ കമേഴ്സ്യൽ ഹബ്ബായി ഉപയോഗപ്പെടുത്തി കനേഡിയൻ കമ്പനികൾക്ക് പ്രവർത്തനം വ്യാപിപ്പിക്കാൻ ഇത് സഹായിക്കും.” — മനിന്ദർ സിദ്ധു, കനേഡിയൻ അന്താരാഷ്ട്ര വ്യാപാര മന്ത്രി
സാമ്പത്തിക ലക്ഷ്യങ്ങൾ
2021 സെപ്റ്റംബറിൽ സേപാ പദ്ധതി ആരംഭിച്ച ശേഷം 38 രാജ്യങ്ങളുമായാണ് യു.എ.ഇ ഇതുവരെ കരാറുകളിൽ ഒപ്പുവെച്ചത്. 2031-ഓടെ രാജ്യത്തിന്റെ സാമ്പത്തിക അടിത്തറ 800 ബില്യൺ ഡോളറായി ഉയർത്തുക എന്ന യു.എ.ഇയുടെ ബൃഹത്തായ പദ്ധതിക്ക് കാനഡയുമായുള്ള ഈ പുതിയ പങ്കാളിത്തം വൻ കരുത്തേകും.
