സാമ്പത്തിക സഹകരണം വിപുലീകരിക്കാനും പശ്ചിമേഷ്യൻ സമാധാന ശ്രമങ്ങൾ ശക്തിപ്പെടുത്താനും ധാരണ
അബുദാബി : യുഎഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാനും കനേഡിയൻ പ്രധാനമന്ത്രി മാർക്ക് കാർണിയും തമ്മിൽ ഫോണിലൂടെ ഉഭയകക്ഷി ചർച്ച നടത്തി. നിർമിത ബുദ്ധി (എഐ), നൂതന സാങ്കേതികവിദ്യ, നിക്ഷേപം എന്നീ സുപ്രധാന മേഖലകളിലെ സഹകരണം കൂടുതൽ വിപുലീകരിക്കാൻ ഇരു നേതാക്കളും ധാരണയിലെത്തി.
വെള്ളിയാഴ്ച നടന്ന സംഭാഷണത്തിൽ ഇരുരാജ്യങ്ങളും തമ്മിലുള്ള സൗഹൃദ ബന്ധവും സാമ്പത്തിക സഹകരണവും കൂടുതൽ ദൃഢമാക്കുന്നതിനുള്ള നടപടികൾ നേതാക്കൾ വിലയിരുത്തി. യുഎഇ വാർത്താ ഏജൻസിയായ വാം (WAM) ആണ് ഔദ്യോഗിക വാർത്ത പുറത്തുവിട്ടത്.
സാമ്പത്തിക വളർച്ചയ്ക്ക് ആക്കം കൂട്ടുന്ന നിർമിത ബുദ്ധി, ആധുനിക സാങ്കേതികവിദ്യ, ഡിജിറ്റൽ ഇൻഫ്രാസ്ട്രക്ചർ എന്നീ മുൻഗണനാ മേഖലകളിൽ സംയുക്ത നിക്ഷേപ സാധ്യതകൾ കണ്ടെത്താൻ ഇരുനേതാക്കളും തീരുമാനിച്ചു. ഇരുരാജ്യങ്ങളിലെയും ജനങ്ങൾക്ക് പ്രയോജനപ്പെടുന്ന ദീർഘകാല സുസ്ഥിര സാമ്പത്തിക പങ്കാളിത്തം ഉറപ്പാക്കുമെന്ന് ശൈഖ് മുഹമ്മദും മാർക്ക് കാർണിയും വ്യക്തമാക്കി.
പശ്ചിമേഷ്യൻ മേഖലയിലെ ഏറ്റവും പുതിയ സംഭവവികാസങ്ങളും സംഭാഷണത്തിൽ ചർച്ചയായി. മേഖലയിലെ സമാധാനവും സുരക്ഷയും സ്ഥിരതയും ഉറപ്പാക്കാനുള്ള അന്താരാഷ്ട്ര ശ്രമങ്ങളെക്കുറിച്ച് ഇരുവരും അഭിപ്രായങ്ങൾ പങ്കുവെച്ചു. നയതന്ത്ര തലത്തിലുള്ള സമാധാന ശ്രമങ്ങൾക്കും ജനങ്ങളുടെ സുസ്ഥിര വികസനത്തിനും പൂർണ പിന്തുണ നൽകുമെന്നും ഇരുനേതാക്കളും അടിവരയിട്ടു.
ഗൾഫ് മേഖലയും കാനഡയും തമ്മിലുള്ള വാണിജ്യ, വ്യവസായ ബന്ധങ്ങൾ ശക്തിപ്പെടുന്ന പശ്ചാത്തലത്തിലാണ് ഈ ഉന്നതതല ചർച്ച നടന്നത്.
