നവംബർ 18-ന് നടക്കുന്ന സമ്മേളനത്തിൽ വിദഗ്ധരും ബിസിനസ് പ്രമുഖരും പങ്കെടുക്കും; തൊഴിൽസമ്മർദ്ദവും കാര്യക്ഷമതയും പ്രധാന ചർച്ചാവിഷയങ്ങൾ.
ദുബായ്, യുഎഇ — ജീവനക്കാരുടെ മാനസികാരോഗ്യം സംരക്ഷിക്കുന്നതിനും തൊഴിലിടങ്ങളിലെ കാര്യക്ഷമത ഉറപ്പാക്കുന്നതിനുമുള്ള പ്രായോഗിക നയങ്ങൾ ചർച്ച ചെയ്യാൻ യുഎഇയിൽ ബിസിനസ്-എച്ച്ആർ പ്രമുഖർ ഒത്തുചേരുന്നു. ഇൻഷുറൻസ് മാർക്കറ്റ് ഡോട്ട് എഇയും (InsuranceMarket.ae) ഗൾഫ് ന്യൂസും സംയുക്തമായി സംഘടിപ്പിക്കുന്ന ‘വർക്ക് റീഇമാജിൻഡ് യുഎഇ’ ഫോറം നവംബർ 18-നാണ് നടക്കുക.
ഭാവി തൊഴിൽമേഖലയുമായി ബന്ധപ്പെട്ട വിഷയങ്ങൾ ചർച്ച ചെയ്യുന്ന നാല് ഘട്ടങ്ങളുള്ള പരമ്പരയിലെ മൂന്നാമത് എഡിഷനാണിത്. ഡിജിറ്റൽ ക്ഷീണം, അമിത ജോലിഭാരം, ജീവനക്കാരെ നിലനിർത്തൽ തുടങ്ങിയ വെല്ലുവിളികൾ സ്ഥാപനങ്ങൾ നേരിടുന്ന പശ്ചാത്തലത്തിൽ, തൊഴിലിടങ്ങളിലെ ആരോഗ്യകരമായ അന്തരീക്ഷം ബിസിനസ് വളർച്ചയ്ക്ക് അത്യന്താപേക്ഷിതമാണെന്ന വിലയിരുത്തലിലാണ് ഈ ഫോറം സംഘടിപ്പിക്കുന്നത്.
തൊഴിലിടങ്ങളിലെ വെൽ-ബീയിംഗ് കേവലം എച്ച്ആർ വിഭാഗത്തിന്റെ മാത്രം ചുമതലയായി കാണാതെ പ്രധാന ബിസിനസ് മുൻഗണനയായി സ്ഥാപനങ്ങൾ അംഗീകരിക്കണമെന്ന് ആൽഫ്രഡ് ഹോൾഡിംഗ്സ് സ്ഥാപകനും ചെയർമാനുമായ അവിനാശ് ബാബുർ വ്യക്തമാക്കി. ജീവനക്കാർക്ക് അർഹമായ പരിഗണനയും വളർച്ചയ്ക്കുള്ള അവസരങ്ങളും ഉറപ്പാക്കുമ്പോൾ മാത്രമേ സ്ഥാപനങ്ങളിൽ സ്വാഭാവികമായ മികച്ച തൊഴിൽ സംസ്കാരം രൂപപ്പെടൂ എന്ന് അദ്ദേഹം ചൂണ്ടിക്കാട്ടി. ജീവനക്കാരുടെ പിന്തുണയും സ്ഥാപനത്തിന്റെ ദീർഘകാല വിജയവും പരസ്പരപൂരകമാണെന്നും അദ്ദേഹം കൂട്ടിച്ചേർത്തു.
ജീവനക്കാരുടെ തെരഞ്ഞെടുപ്പ് ഘട്ടം മുതൽ വിരമിക്കൽ വരെയുള്ള വിവിധ ഘട്ടങ്ങളിൽ മാനസിക സമ്മർദ്ദങ്ങൾ എങ്ങനെ നേരത്തെ തിരിച്ചറിയാമെന്നും പരിഹരിക്കാമെന്നും സമ്മേളനത്തിൽ ചർച്ച ചെയ്യും. തുടർച്ചയായ യോഗങ്ങൾ, ഡിജിറ്റൽ സന്ദേശങ്ങളുടെ ആധിക്യം എന്നിവ ജീവനക്കാരുടെ ശ്രദ്ധയെയും ഉൽപ്പാദനക്ഷമതയെയും ബാധിക്കുന്ന സാഹചര്യത്തിൽ, ഓൺലൈനിൽ ചെലവഴിക്കുന്ന സമയത്തിന് പകരം പ്രവൃത്തിയുടെ ഗുണനിലവാരം മാനദണ്ഡമാക്കാനുള്ള വഴികളും ഫോറം വിലയിരുത്തും.
