ദുബായ് : ദുബായ് ഇന്ത്യൻ ഹൈസ്കൂൾ പ്ലസ് വൺ വിദ്യാർഥിനി മാളവികാ രാജേഷിന്റെ റൺ എവേയ്സ് എന്ന ഇംഗ്ലീഷ് നോവൽ ഷാർജ രാജ്യാന്തര പുസ്തകമേളയിൽ പ്രകാശനം ചെയ്തു. മാധ്യമപ്രവർത്തകനും എഴുത്തുകാരനുമായ ഷാബു കിളിത്തട്ടിൽ മാധ്യമപ്രവർത്തകൻ അനൂപ് കീച്ചേരിക്ക് കോപ്പി നൽകി പ്രകാശനം ചെയ്തു. കെ.എം.അബ്ബാസ്, ഇസ്മായീൽ മേലടി, സാദിഖ് കാവിൽ, മഹേഷ് പൗലോസ്, രാഗേഷ് വെങ്കിലാട് എന്നിവർ പ്രസംഗിച്ചു. അമേരിക്കയിലെ രണ്ട് കുട്ടികൾ വീടു വിട്ടോടുന്നതും മനുഷ്യക്കടത്ത് സംഘത്തിൽപ്പെട്ട് സാഹസികമായി രക്ഷപ്പെടുന്നതുമാണ് നോവലിന്റെ പ്രമേയമെന്നു മാളവിക പറഞ്ഞു. പുസ്തകം ഏഴാം നമ്പർ ഹാളിലെ സീ4 സ്റ്റാളിൽ ലഭ്യമാണ്.
