ദുബായ്:യുഎഇയുടെ ‘നെറ്റ് സീറോ 2050’ ലക്ഷ്യങ്ങളെ പിന്തുണയ്ക്കുന്ന തരത്തിൽ ലുലു ഗ്രൂപ്പ് വമ്പൻ സൗരോർജ്ജ പദ്ധതിയുമായി രംഗത്തെത്തി. പോസിറ്റീവ് സീറോ ഗ്രൂപ്പുമായി സഹകരിച്ച് ദുബായിലും മറ്റു പ്രധാന കേന്ദ്രങ്ങളിലുമുള്ള ലുലു ഹൈപ്പർമാർക്കറ്റുകൾക്കും ലോജിസ്റ്റിക്സ് ഹബുകൾക്കുമാണ് സോളാർ റൂഫ്ടോപ്പ് സംവിധാനങ്ങൾ സ്ഥാപിച്ചിരിക്കുന്നത്. ഈ പദ്ധതി യുഎഇയിലെ സുസ്ഥിരതാ നീക്കങ്ങൾക്ക് ശക്തമായ പിന്തുണ നൽകുമെന്ന് ലുലു അധികൃതർ അറിയിച്ചു.ദുബായ് അൽ വർഖ, ദുബായ് ഇൻവെസ്റ്റ്മെന്റ് പാർക്ക്, റഷീദിയയിലെ ലുലു ഹൈപ്പർമാർക്കറ്റുകൾ, ലുലു സെൻട്രൽ ലോജിസ്റ്റിക്സ് സെൻറർ, ദുബായ് റീജിയണൽ ഓഫീസ് എന്നിവിടങ്ങളിലാണ് സോളാർ റൂഫ്ടോപ്പ് സ്ഥാപിച്ചിരിക്കുന്നത്. ഇതിലൂടെ 37 മില്യൺ കിലോവാട്ടിലധികം ശുദ്ധമായ വൈദ്യുതി ഉൽപാദിപ്പിക്കാനാകുകയും ഏകദേശം 25,000 ടൺ കാർബൺ എമിഷൻ കുറയ്ക്കാനാകുകയും ചെയ്യും. നാല് ലക്ഷത്തിലധികം പുതിയ ചെടികൾ നടുന്നതിന് തുല്യമായ ഗ്രീൻ നേട്ടം പദ്ധതിക്ക് നൽകാൻ കഴിയും എന്ന് അധികൃതർ വ്യക്തമാക്കി.
പദ്ധതിയുടെ ധാരണാപത്രം ദുബായിൽ നടന്ന ചടങ്ങിൽ ലുലു ഗ്രൂപ്പ് ഗ്ലോബൽ ഓപ്പറേഷൻസ് ഡയറക്ടർ സലിം എം.എ, പോസിറ്റീവ് സീറോ ചെയർമാൻ അബ്ദുൽ ഗാഫർ ഹുസൈൻ എന്നിവരുടെ സാന്നിധ്യത്തിൽ ലുലു ബിസിനസ് ഡെവലപ്പ്മെന്റ് റീജിയണൽ ഡയറക്ടർ ഹുസെഫ മൂസ രൂപാവാല, പോസിറ്റീവ് സീറോ സിഇഒ ഡേവിഡ് ഔറായു എന്നിവർ ചേർന്ന് ഒപ്പുവച്ചു. ലുലുവിന്റെ സൗരോർജ്ജ പദ്ധതികൾ യുഎഇയിലെ ഊർജ്ജ സംരക്ഷണത്തിൻറെ പ്രാധാന്യം ഉയർത്തിക്കാട്ടുന്നതാണെന്ന് സലിം എം.എ പറഞ്ഞു.
കാർബൺ എമിഷൻ വൻതോതിൽ കുറയ്ക്കുന്ന പദ്ധതിയിൽ ലുലുവിനൊപ്പം സഹകരിക്കാനായതിൽ അഭിമാനമുണ്ടെന്ന് പോസിറ്റീവ് സീറോ സിഇഒ ഡേവിഡ് ഔറായു അറിയിച്ചു. ദുബായ് സിലിക്കൺ സെൻട്രൽ മാൾ, ബഹ്റൈൻ ലുലു ഹൈപ്പർമാർക്കറ്റുകൾ, ലോജിസ്റ്റിക്സ് വെയർഹൗസുകൾ എന്നിവിടങ്ങളിലും ലുലു ഗ്രൂപ്പിന്റെ സൗരോർജ്ജ പദ്ധതികൾ നടപ്പിലാക്കിയിട്ടുണ്ട്. പ്രവാസി മലയാളികളും ഉപഭോക്താക്കളും പങ്കാളികളായിരിക്കുന്ന ഇത്തരം ഗ്രീൻ നടപടികൾ പ്രദേശത്തിന്റെ സുസ്ഥിര ഭാവിക്കായി മാതൃകയാകുമെന്ന് വിദഗ്ധർ വിലയിരുത്തുന്നു.
