ദുബൈ: എമിറേറ്റിലെ പ്രധാന ബീച്ചുകളിലും പാർക്കുകളിലും ഡ്രോൺ ഡെലിവറി സേവനം ആരംഭിക്കുന്നതിനായി ചൈനീസ് ടെക് കമ്പനിയായ കീറ്റയുമായി കരാർ ഒപ്പുവെച്ച് ദുബൈ മുനിസിപ്പാലിറ്റി.
ആദ്യ ഘട്ടത്തിൽ തെരഞ്ഞെടുത്ത ബീച്ചുകളിലും പാർക്കുകളിലുമായിരിക്കും സേവനം ആരംഭിക്കുക. ഈ വർഷം അവസാനത്തോടെ സർവിസ് പ്രവർത്തനം ആരംഭിക്കാനാണ് ലക്ഷ്യമിടുന്നത്. തുടർന്ന് ഘട്ടംഘട്ടമായി ദുബൈയിലെ കൂടുതൽ പൊതു ഇടങ്ങളിലേക്കും സേവനം വ്യാപിപ്പിക്കും.
പൊതു ഇടങ്ങളിൽ നൂതന സാങ്കേതിക വിദ്യകൾ സംയോജിപ്പിക്കുന്നതിനായി ദുബൈ മുനിസിപ്പാലിറ്റി നടപ്പാക്കുന്ന പദ്ധതികളുടെ ഭാഗമായാണ് ഈ നീക്കം. നവീകരണം, സ്മാർട്ട് ഗതാഗതം, ഭാവിനഗര വികസനം എന്നീ മേഖലകളിൽ ദുബൈയുടെ ആഗോള നേതൃത്വത്തെ കൂടുതൽ ശക്തിപ്പെടുത്തുകയാണ് ലക്ഷ്യമെന്ന് അധികൃതർ വ്യക്തമാക്കി.
ബീച്ചുകളിലും പാർക്കുകളിലും സന്ദർശകർക്ക് ഭക്ഷണവും മറ്റു സാധനങ്ങളും വേഗത്തിൽ എത്തിക്കുന്നതിനായിരിക്കും ഡ്രോൺ ഡെലിവറി സംവിധാനം ഉപയോഗിക്കുക. അടുത്ത വർഷത്തോടെ പൊതുസൗകര്യ മേഖലകളിൽ സാങ്കേതിക അധിഷ്ഠിത ഡെലിവറി സേവനങ്ങൾ വ്യാപകമാക്കാനും പദ്ധതിയുണ്ട്.
