ടിപ്പർ ലോറി ഉൾപ്പെടെയുള്ള ഭാരവാഹനങ്ങൾക്ക് സംസ്ഥാനത്ത് സമയനിയന്ത്രണം; ജില്ലകളിലെ നിയന്ത്രണ സമയം ഇങ്ങനെ

തിരുവനന്തപുരം: ടിപ്പർ ലോറികൾ ഉൾപ്പെടെയുള്ള ഭാരവാഹനങ്ങളുടെ ഗതാഗതത്തിന് സംസ്ഥാനത്ത് ഇന്ന് മുതൽ സമയനിയന്ത്രണം ഏർപ്പെടുത്തി. വിദ്യാർഥികളുടെയും ഓഫീസ് ജീവനക്കാരുടെയും യാത്രാസുരക്ഷ ഉറപ്പാക്കുന്നതിനും തിരക്കേറിയ സമയങ്ങളിലെ ഗതാഗതക്കുരുക്ക് കുറയ്ക്കുന്നതിനുമായാണ് പുതിയ നിയന്ത്രണം നടപ്പാക്കിയത്.

സ്കൂൾ, ഓഫീസ് സമയങ്ങൾ പരിഗണിച്ച് രാവിലെയും വൈകിട്ടുമായാണ് നിയന്ത്രണം ഏർപ്പെടുത്തിയിരിക്കുന്നത്. നിയന്ത്രണം ബാധകമായ സമയങ്ങളിൽ ഭാരവാഹനങ്ങൾ നിശ്ചിത പാർക്കിങ് കേന്ദ്രങ്ങളിലോ അധികൃതർ നിർദേശിക്കുന്ന സ്ഥലങ്ങളിലോ നിർത്തിയിടേണ്ടതായിരിക്കും.

നിയന്ത്രണം കർശനമായി നടപ്പാക്കുന്നതിനായി മോട്ടോർ വാഹന വകുപ്പും പൊലീസും സംയുക്ത പരിശോധന നടത്തും. നിയമലംഘനങ്ങൾ കണ്ടെത്തിയാൽ നടപടികൾ സ്വീകരിക്കുമെന്നും അധികൃതർ മുന്നറിയിപ്പ് നൽകി.

ജില്ലകളിലെ നിയന്ത്രണ സമയം ഇങ്ങനെ

തിരുവനന്തപുരം

• രാവിലെ: 8.00 മുതൽ 10.00 വരെ
• വൈകിട്ട്: 3.00 മുതൽ 4.30 വരെ

കൊല്ലം

• രാവിലെ: 8.30 മുതൽ 10.00 വരെ
• വൈകിട്ട്: 3.30 മുതൽ 4.30 വരെ

പത്തനംതിട്ട

• രാവിലെ: 8.30 മുതൽ 10.00 വരെ
• വൈകിട്ട്: 3.00 മുതൽ 4.30 വരെ

ആലപ്പുഴ

• രാവിലെ: 8.30 മുതൽ 10.00 വരെ
• വൈകിട്ട്: 3.30 മുതൽ 5.00 വരെ

കോട്ടയം

• രാവിലെ: 8.30 മുതൽ 9.30 വരെ
• വൈകിട്ട്: 3.30 മുതൽ 4.30 വരെ

ഇടുക്കി, എറണാകുളം

• രാവിലെ: 8.30 മുതൽ 10.00 വരെ
• വൈകിട്ട്: 4.00 മുതൽ 5.00 വരെ

തൃശൂർ, പാലക്കാട്, മലപ്പുറം, കോഴിക്കോട്, വയനാട്

• രാവിലെ: 8.30 മുതൽ 10.00 വരെ
• വൈകിട്ട്: 3.30 മുതൽ 5.00 വരെ

കണ്ണൂർ

• രാവിലെ: 8.00 മുതൽ 10.00 വരെ
• വൈകിട്ട്: 4.00 മുതൽ 6.00 വരെ

കാസർകോട്

• രാവിലെ: 9.00 മുതൽ 10.00 വരെ
• വൈകിട്ട്: 4.00 മുതൽ 5.00 വരെ

സ്കൂൾ കുട്ടികളുടെ സുരക്ഷയും നഗരപ്രദേശങ്ങളിലെ ഗതാഗത നിയന്ത്രണവും മുൻനിർത്തിയാണ് പുതിയ സമയക്രമം നടപ്പാക്കുന്നതെന്ന് അധികൃതർ അറിയിച്ചു. ചരക്ക് വാഹന ഉടമകളും ഡ്രൈവർമാരും പുതിയ സമയക്രമം കൃത്യമായി പാലിക്കണമെന്ന് മോട്ടോർ വാഹന വകുപ്പ് നിർദേശിച്ചിട്ടുണ്ട്.