വാഹനം ഓഫാക്കാതെ പോകുന്നത് കുറ്റകരമാണെന്നും മോഷണങ്ങൾക്ക് വഴിവെക്കുമെന്നും മുന്നറിയിപ്പ്
ഷാർജ, സെപ്റ്റംബർ 26, 2026 : ഷാർജയിൽ എൻജിൻ ഓഫാക്കാതെ റോഡരികിൽ നിർത്തിയിട്ടിരുന്ന വാഹനം മോഷ്ടിച്ച പ്രതിയെ പരാതി ലഭിച്ച് രണ്ട് മണിക്കൂറിനകം പൊലീസ് പിടികൂടി. ഉടമയ്ക്ക് സുരക്ഷിതമായി കാർ തിരികെ നൽകിയതായി ഷാർജ പൊലീസ് ശനിയാഴ്ച അറിയിച്ചു.
വ്യാഴാഴ്ച (സെപ്റ്റംബർ 24) വൈകുന്നേരമാണ് കേസിനാസ്പദമായ സംഭവം നടന്നത്. തൻ്റെ കാർ മോഷ്ടിക്കപ്പെട്ടതായി ഒരു സ്ത്രീ ഷാർജ പൊലീസിന്റെ ഓപ്പറേഷൻസ് റൂമിൽ അടിയന്തര സന്ദേശം അറിയിക്കുകയായിരുന്നു. എൻജിൻ പ്രവർത്തിക്കുന്ന അവസ്ഥയിലായിരുന്നു വാഹനം ഉപേക്ഷിച്ചു പോയിരുന്നത്.
വിവരം ലഭിച്ചയുടൻ ഫീൽഡ് പട്രോളിങ് സംഘങ്ങളും പ്രത്യേക അന്വേഷണ വിഭാഗവും തെരച്ചിൽ ആരംഭിച്ചു. ശാസ്ത്രീയ അന്വേഷണത്തിലൂടെ രണ്ട് മണിക്കൂറിനകം പ്രതിയെ കണ്ടെത്തുകയും വാഹനം കസ്റ്റഡിയിലെടുക്കുകയും ചെയ്തു. തുടർനടപടികൾക്കായി പ്രതിയെ ബന്ധപ്പെട്ട പൊലീസ് സ്റ്റേഷനിലേക്ക് മാറ്റി. ഇയാളെ പിന്നീട് പ്രോസിക്യൂഷന് കൈമാറും.
ചെറിയ ആവശ്യങ്ങൾക്കായി പുറത്തിറങ്ങുമ്പോൾ പോലും എൻജിൻ ഓഫാക്കാതെ പോകുന്നത് ഗുരുതരമായ സുരക്ഷാ വീഴ്ചയാണെന്ന് ഷാർജ പൊലീസ് മുന്നറിയിപ്പ് നൽകി. ഇത്തരം അശ്രദ്ധകൾ അവസരവാദികളായ മോഷ്ടാക്കൾക്ക് കാര്യങ്ങൾ എളുപ്പമാക്കും.
വാഹനം ഓഫാക്കാതെ പോകുന്നത് യുഎഇ ഫെഡറൽ ഗതാഗത നിയമപ്രകാരം പിഴ ചുമത്താവുന്ന കുറ്റമാണ്. എടിഎമ്മുകളിൽ കയറുമ്പോഴോ പെട്രോൾ പമ്പുകളിലെയും ഗ്രോസറികളിലെയും ചെറിയ പർച്ചേസുകൾക്കോ പോകുമ്പോഴോ പോലും കാറിന്റെ ഇഗ്നിഷൻ ഓഫ് ചെയ്യണമെന്നും ഡോറുകൾ കൃത്യമായി ലോക്ക് ചെയ്തിട്ടുണ്ടെന്ന് ഉറപ്പാക്കണമെന്നും അധികൃതർ വ്യക്തമാക്കി.
വിലപിടിപ്പുള്ള സാധനങ്ങൾ കാറിനുള്ളിൽ ആളുകൾ കാണുന്ന രീതിയിൽ വെക്കരുതെന്നും നിർദേശമുണ്ട്. എന്തെങ്കിലും തരത്തിലുള്ള അടിയന്തര സാഹചര്യങ്ങൾ ഉണ്ടായാൽ 999 എന്ന നമ്പറിലും, അന്വേഷണങ്ങൾക്കും അടിയന്തരമല്ലാത്ത സേവനങ്ങൾക്കുമായി 901 എന്ന നമ്പറിലും ബന്ധപ്പെടണമെന്ന് ഷാർജ പൊലീസ് ഓർമിപ്പിച്ചു.
