നിലവിലുള്ള കരാറുകൾ പുതുക്കുമ്പോഴും പുതിയ വാടകക്കാർക്കും നിയമം ബാധകം; റിയൽ എസ്റ്റേറ്റ് സെന്ററിന്റേതാണ് നിർണായക ഉത്തരവ്
അബുദാബി: യുഎഇ തലസ്ഥാനത്ത് താമസിക്കുന്ന പ്രവാസി മലയാളി കുടുംബങ്ങൾക്കും ബിസിനസ് സംരംഭകർക്കും വലിയ സാമ്പത്തിക ആശ്വാസം നൽകുന്ന സുപ്രധാന പ്രഖ്യാപനവുമായി അബുദാബി റിയൽ എസ്റ്റേറ്റ് സെന്റർ. അബുദാബി എമിറേറ്റിൽ അടുത്ത ഔദ്യോഗിക അറിയിപ്പുണ്ടാകുന്നത് വരെ കെട്ടിട വാടക വർധിപ്പിക്കരുതെന്ന് അധികൃതർ കർശന നിർദ്ദേശം നൽകി. നിലവിലെ പ്രാദേശിക-ആഗോള സാഹചര്യങ്ങളും പൊതുജനങ്ങളുടെ സാമ്പത്തിക സുരക്ഷിതത്വവും മുൻനിർത്തിയാണ് ഈ അടിയന്തര നടപടി.
മേഖലയിലെ നിലവിലെ അസ്ഥിരതയും ജീവിതച്ചെലവും കണക്കിലെടുത്ത് വാടകക്കാരുടെ സാമ്പത്തിക ഭാരം ലഘൂകരിക്കുകയാണ് പുതിയ ഉത്തരവിലൂടെ ലക്ഷ്യമിടുന്നത്. അബുദാബിയിലെ റിയൽ എസ്റ്റേറ്റ് വിപണിയെ കൂടുതൽ സുസ്ഥിരമാക്കാനും പ്രവാസികൾ ഉൾപ്പെടെയുള്ള താമസക്കാർക്ക് സുരക്ഷിതത്വം ഉറപ്പാക്കാനും ഈ തീരുമാനം സഹായിക്കുമെന്നാണ് വിലയിരുത്തൽ.
പുറത്തിറക്കിയ പുതിയ ഉത്തരവിൽ വ്യക്തമാക്കുന്ന പ്രധാന നിർദ്ദേശങ്ങൾ താഴെ പറയുന്നവയാണ്:
- കരാറുകൾ പുതുക്കുമ്പോൾ: നിലവിലുള്ള പാർപ്പിട (Residential), വാണിജ്യ (Commercial), വ്യാവസായിക (Industrial) വാടക കരാറുകൾ പുതുക്കുമ്പോൾ ഒരു ദിർഹം പോലും വർധിപ്പിക്കാൻ പാടുള്ളതല്ല.
- പുതിയ വാടകക്കാർക്കും ബാധകം: മുമ്പ് വാടകയ്ക്ക് നൽകിയിരുന്ന ഫ്ലാറ്റുകളോ, വില്ലകളോ, ഓഫീസുകളോ ഒഴിഞ്ഞ ശേഷം പുതിയ വാടകക്കാരന് നൽകുമ്പോഴും പഴയ നിരക്ക് തന്നെ തുടരണം.
- പേരുമാറ്റിയുള്ള തട്ടിപ്പുകൾക്ക് തടയിടും: പുതിയ പേരിൽ പുതിയ കരാർ ഉണ്ടാക്കിയാലും വാടക തുകയിൽ വർധനവ് വരുത്താൻ അനുവദിക്കില്ല.
പ്രത്യേക ശ്രദ്ധയ്ക്ക്: ഈ നിയന്ത്രണങ്ങൾ അടുത്ത ഔദ്യോഗിക അറിയിപ്പ് വരുന്നത് വരെ പ്രാബല്യത്തിലുണ്ടാകുമെന്ന് റിയൽ എസ്റ്റേറ്റ് സെന്റർ പ്രത്യേകം വ്യക്തമാക്കിയിട്ടുണ്ട്.
കോവിഡിന് ശേഷമുള്ള സാമ്പത്തിക വീണ്ടെടുക്കലിനിടയിലും ആഗോള തലത്തിലുണ്ടായ വിലക്കയറ്റം പ്രവാസികളെ കാര്യമായി ബാധിച്ചിരുന്നു. ശമ്പളവർധനവ് ഇല്ലാതെ വാടക ഇനത്തിൽ വലിയ തുക മാറ്റിവെക്കേണ്ടി വന്നിരുന്ന മിഡിൽ ക്ലാസ് പ്രവാസി കുടുംബങ്ങൾക്കും, ഉയർന്ന പ്രവർത്തനച്ചെലവ് കാരണം പ്രതിസന്ധിയിലായിരുന്ന ചെറുകിട വ്യവസായികൾക്കും അബുദാബി സർക്കാരിന്റെ ഈ പുതിയ തീരുമാനം വലിയൊരു താങ്ങായി മാറും.
