പ്രവാസികൾക്ക് ജാഗ്രത; ജൂൺ മാസത്തിൽ കാലാവധി തീരുന്നവർ എത്രയും വേഗം പോളിസി പുതുക്കണം
അബുദാബി: യുഎഇയിലെ സ്വദേശികളും വിദേശികളുമായ ജീവനക്കാർക്ക് നിർബന്ധമാക്കിയ തൊഴിൽ നഷ്ട ഇൻഷുറൻസ് പോളിസികൾ (ILOE) യഥാസമയം പുതുക്കണമെന്ന് മാനവശേഷി സ്വദേശിവൽക്കരണ മന്ത്രാലയത്തിന്റെ കർശന നിർദേശം. മുൻവർഷങ്ങളിൽ ഭൂരിഭാഗം ജീവനക്കാരും ജൂൺ മാസത്തിലാണ് ഇൻഷുറൻസ് പദ്ധതിയുടെ ഭാഗമായത് എന്നതിനാൽ, പലരുടെയും പോളിസി കാലാവധി ഇപ്പോൾ അവസാനിക്കുകയാണ്. കൃത്യസമയത്ത് പുതുക്കാത്തവർ വലിയ തുക പിഴയായി ഒടുക്കേണ്ടി വരുമെന്ന് മന്ത്രാലയം ഓർമ്മിപ്പിച്ചു.
പോളിസി പുതുക്കുന്നതിൽ വീഴ്ച വരുത്തുന്നവർക്ക് 200 ദിർഹമാണ് പിഴ ചുമത്തുക. ഇതുവരെ ഇൻഷുറൻസ് പരിരക്ഷയിൽ അംഗമാകാത്തവർക്ക് 400 ദിർഹം പിഴ നൽകേണ്ടി വരും. ജീവനക്കാരുടെ ശമ്പളത്തിൽ നിന്നോ മറ്റ് സർവീസ് ആനുകൂല്യങ്ങളിൽ നിന്നോ ഈ തുക ഈടാക്കാനാണ് തീരുമാനം. കൂടാതെ, ഇൻഷുറൻസ് പുതുക്കാത്തവർക്ക് യുഎഇയിൽ പുതിയ തൊഴിൽ പെർമിറ്റുകൾ അനുവദിക്കില്ലെന്നും അധികൃതർ വ്യക്തമാക്കി.
35 കോടി ദിർഹത്തിന്റെ സാമ്പത്തിക സഹായം
2023 ജനുവരിയിലാണ് യുഎഇയിൽ തൊഴിൽ നഷ്ട ഇൻഷുറൻസ് പദ്ധതിക്ക് തുടക്കമിട്ടത്. നിലവിൽ രാജ്യത്തെ 90 ശതമാനത്തിലധികം ജീവനക്കാരും ഈ പദ്ധതിയുടെ ഭാഗമായിക്കഴിഞ്ഞതായി മന്ത്രാലയം അറിയിച്ചു. ജോലി നഷ്ടപ്പെടുന്ന പ്രവാസികൾ അടക്കമുള്ള ജീവനക്കാർക്ക് പെട്ടെന്നുണ്ടാകുന്ന സാമ്പത്തിക പ്രതിസന്ധി മറികടക്കാൻ സഹായിക്കുന്നതാണ് ഈ ഇൻഷുറൻസ് സ്കീം. പദ്ധതി ആരംഭിച്ച് ഇതുവരെ 35 കോടി ദിർഹത്തിന്റെ സാമ്പത്തിക ആനുകൂല്യം അർഹരായവർക്ക് വിതരണം ചെയ്തതായും മന്ത്രാലയത്തിന്റെ കണക്കുകൾ വ്യക്തമാക്കുന്നു.
ആനുകൂല്യങ്ങൾ എങ്ങനെ?
ഇൻഷുറൻസ് എടുത്ത് 12 മാസം പൂർത്തിയാക്കിയ ഒരു ജീവനക്കാരന് ജോലി നഷ്ടപ്പെടുകയാണെങ്കിൽ, അയാളുടെ അടിസ്ഥാന ശമ്പളത്തിന്റെ 60 ശതമാനം തുക തുടർച്ചയായ മൂന്ന് മാസത്തേക്ക് സാമ്പത്തിക സഹായമായി ലഭിക്കും.
- വിഭാഗം 1 (മാസശമ്പളം 10,000 ദിർഹം വരെയുള്ളവർ): ഈ വിഭാഗത്തിൽപ്പെട്ടവർക്ക് പ്രതിമാസം പരമാവധി 10,000 ദിർഹം വരെ സഹായം ലഭിക്കും.
- വിഭാഗം 2 (മാസശമ്പളം 10,000 ദിർഹത്തിന് മുകളിലുള്ളവർ): ഈ വിഭാഗത്തിലുള്ളവർക്ക് പ്രതിമാസം പരമാവധി 20,000 ദിർഹം വരെയാണ് ലഭിക്കുക.
തൊഴിൽ വിപണിയിലെ അപ്രതീക്ഷിത മാറ്റങ്ങളിലും ജീവനക്കാർക്ക് പൂർണ്ണ ആത്മവിശ്വാസവും ഉയർന്ന സുരക്ഷയും നൽകുക എന്നതാണ് കുറഞ്ഞ പ്രീമിയത്തിലുള്ള ഈ പദ്ധതിയിലൂടെ യുഎഇ ലക്ഷ്യമിടുന്നത്.
അഞ്ച് മിനിറ്റിൽ പുതുക്കാം
ജീവനക്കാർക്ക് വളരെ ലളിതമായി സ്വന്തം നിലയിൽ തന്നെ പോളിസി പുതുക്കാനാകും. www.iloe.ae എന്ന ഔദ്യോഗിക വെബ്സൈറ്റ് വഴിയോ, ഐഎൽഒഇ (ILOE) മൊബൈൽ ആപ്ലിക്കേഷൻ വഴിയോ അഞ്ച് മിനിറ്റിനുള്ളിൽ നടപടികൾ പൂർത്തിയാക്കാം. ഇതുകൂടാതെ അൽ അൻസാരി എക്സ്ചേഞ്ച്, തഷീൽ, തൗജീഹ് കേന്ദ്രങ്ങൾ വഴിയും പോളിസി പുതുക്കാനുള്ള സൗകര്യമുണ്ട്.
