ഓഗസ്റ്റ് 31-ലെ സുരക്ഷിത ഡ്രൈവിങ് വാഗ്ദാനം പാലിക്കുന്ന ഡ്രൈവർമാർക്ക് 4 ബ്ലാക്ക് പോയിന്റുകൾ വരെ ഒഴിവാക്കി നൽകും.
അബുദാബി — വാഹനമോടിക്കുന്നവർക്ക് തങ്ങളുടെ ലൈസൻസിലുള്ള നാല് ബ്ലാക്ക് പോയിന്റുകൾ വരെ കുറയ്ക്കാൻ അവസരമൊരുക്കി യുഎഇ ആഭ്യന്തര മന്ത്രാലയവും ഫെഡറൽ ട്രെഫിക് കൗൺസിലും. രാജ്യവ്യാപകമായി സംഘടിപ്പിക്കുന്ന വാർഷിക റോഡ് സുരക്ഷാ സംരംഭമായ ‘ഡേ വിത്തൗട്ട് ആക്സിഡന്റ്’ (അപകടരഹിത ദിനം) പ്രചാരണത്തിന്റെ ഭാഗമായാണ് ഈ ആനുകൂല്യം ലഭിക്കുക.
പുതിയ അക്കാദമിക് വർഷം ആരംഭിക്കുന്ന ഓഗസ്റ്റ് 31-നാണ് ഈ വർഷത്തെ അപകടരഹിത ദിനമായി ആചരിക്കുന്നത്. കാമ്പയിനിൽ പങ്കെടുക്കാനുള്ള ഓൺലൈൻ രജിസ്ട്രേഷൻ ഓഗസ്റ്റ് 17 മുതൽ ആരംഭിച്ചു.
ഓഗസ്റ്റ് 31-ന് വിദ്യാലയങ്ങൾ തുറക്കുന്നതോടെ റോഡുകളിൽ ഗതാഗതത്തിരക്ക് വർധിക്കാൻ സാധ്യതയുണ്ട്. ഈ സാഹചര്യത്തിൽ സ്കൂൾ മേഖലകളിലും പ്രധാന റോഡുകളിലും ഡ്രൈവർമാർ കൂടുതൽ ശ്രദ്ധ പുലർത്തണമെന്നും സുരക്ഷിതമായി വാഹനമോടിക്കണമെന്നും അധികൃതർ നിർദേശിക്കുന്നു. അന്നേ ദിവസം ഗതാഗത നിയമലംഘനങ്ങളോ അപകടങ്ങളോ വരുത്താതെ സുരക്ഷിതമായി വാഹനമോടിക്കുമെന്ന് ഉറപ്പുനൽകുന്നവർക്കാണ് നാല് ബ്ലാക്ക് പോയിന്റുകൾ മാറ്റി നൽകുക.
മന്ത്രാലയത്തിന്റെ ഔദ്യോഗിക സോഷ്യൽ മീഡിയ അക്കൗണ്ടുകളിലെ (@MOIUAE) ക്യുആർ കോഡ് സ്കാൻ ചെയ്തോ ലിങ്ക് വഴിയോ ഡ്രൈവർമാർക്ക് രജിസ്റ്റർ ചെയ്യാം. യുഎഇ പാസ് (UAE Pass) ഉപയോഗിച്ച് ലോഗിൻ ചെയ്ത ശേഷം സുരക്ഷിത ഡ്രൈവിങ് പ്രതിജ്ഞയിൽ ഒപ്പുവെക്കണം. രജിസ്ട്രേഷൻ പൂർത്തിയാക്കുന്നവർക്ക് ഇമെയിൽ വഴി പങ്കാളിത്ത സർട്ടിഫിക്കറ്റ് ലഭിക്കും.
വാഹനമോടിക്കുമ്പോൾ മൊബൈൽ ഫോൺ ഉപയോഗിക്കുക, പെട്ടെന്ന് വരിമാറുക (sudden swerving), സീറ്റ് ബെൽറ്റ് ധരിക്കാതിരിക്കുക, കാലാവധി കഴിഞ്ഞ രജിസ്ട്രേഷനോടെ വാഹനമോടിക്കുക തുടങ്ങിയ നിയമലംഘനങ്ങൾക്കാണ് പ്രധാനമായും നാല് ബ്ലാക്ക് പോയിന്റുകൾ ചുമത്തുന്നത്. ആകെ 24 ബ്ലാക്ക് പോയിന്റുകൾ തികയുന്ന ഡ്രൈവർമാരുടെ ലൈസൻസ് റദ്ദാക്കുകയോ കോടതി നടപടികൾക്ക് വിധേയമാക്കുകയോ ചെയ്യും.
