ദുബായ്, ഓഗസ്റ്റ് 5, 2026 : നഗരത്തിലെ യാത്രാസൗകര്യങ്ങൾ കൂടുതൽ എളുപ്പമാക്കുന്നതിന്റെ ഭാഗമായി ജനപ്രിയ ‘ബസ് ഓൺ ഡിമാൻഡ്’ (Bus-On-Demand) സർവീസ് മൂന്ന് പ്രധാന മേഖലകളിലേക്ക് കൂടി വ്യാപിപ്പിച്ച് ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA). അൽ സത്വ, അൽ ഖൂസ്, മിർദിഫ് എന്നീ പ്രദേശങ്ങളിലാണ് പുതിയതായി സർവീസ് ആരംഭിച്ചത്. ഇതോടെ ദുബായിൽ ഈ സ്മാർട്ട് ബസ് സർവീസ് ലഭ്യമാകുന്ന ആകെ മേഖലകളുടെ എണ്ണം 20 ആയി ഉയർന്നു.
2026-ന്റെ ആദ്യ പകുതിയിൽ സേവനത്തിന് ലഭിച്ച വൻ ജനപ്രീതി കണക്കിലെടുത്താണ് നെറ്റ്‌വർക്ക് വിപുലീകരിക്കാൻ ആർ.ടി.എ തീരുമാനിച്ചത്. ജനുവരി മുതൽ ജൂൺ വരെയുള്ള ആറു മാസത്തിനിടെ 5,27,000 ആളുകളാണ് ഈ ബസുകളിൽ യാത്ര ചെയ്തത്. 2025-ലെ ഇതേ കാലയളവിനെ അപേക്ഷിച്ച് യാത്രക്കാരുടെ എണ്ണത്തിൽ 25.1 ശതമാനത്തിന്റെ വളർച്ചയുണ്ടായി. ജൂൺ മാസത്തിൽ മാത്രം 1,05,990 പേർ സർവീസ് ഉപയോഗപ്പെടുത്തി; ഈ വർഷത്തെ ഏറ്റവും ഉയർന്ന പ്രതിമാസ കണക്കാണിത്.
വർധിച്ചുവരുന്ന യാത്രക്കാരുടെ ആവശ്യങ്ങൾ നിറവേറ്റുന്നതിനായി ആർ.ടി.എ തങ്ങളുടെ പ്രവർത്തന മേഖല 54 ശതമാനം വർധിപ്പിക്കുകയും ബസുകളുടെ എണ്ണം 55 ആയി ഉയർത്തുകയും ചെയ്തിട്ടുണ്ട്.
മികച്ച കണക്റ്റിവിറ്റിയും സ്മാർട്ട് യാത്രയും
മെട്രോ, ട്രാമ്പ്, പ്രധാന ബസ് സ്റ്റേഷനുകൾ എന്നിവയെ തൊട്ടടുത്തുള്ള പാർപ്പിട-വാണിജ്യ മേഖലകളുമായി നേരിട്ട് ബന്ധിപ്പിക്കുന്ന ‘ഫസ്റ്റ് ആൻഡ് ലാസ്റ്റ് മൈൽ’ (First-and-Last Mile) ഗതാഗത തന്ത്രത്തിന്റെ ഭാഗമായാണ് ഈ നടപടി.
പരമ്പരാഗത പൊതുബസുകളെപ്പോലെ കൃത്യമായ സമയക്രമമോ നിശ്ചിത ബസ് സ്റ്റോപ്പുകളോ ഈ സർവീസിനില്ല. ആർട്ടിഫിഷ്യൽ ഇന്റലിജൻസ് (AI) അൽഗോരിതം ഉപയോഗിച്ചാണ് ബസുകളുടെ റൂട്ട് നിശ്ചയിക്കുന്നത്. ഒരേ ദിശയിലേക്ക് യാത്ര ചെയ്യുന്ന ആളുകളെ ഒന്നിപ്പിച്ച്, യാത്രക്കാരുടെ നിലവിലെ ലൊക്കേഷന് തൊട്ടടുത്തുള്ള ‘വെർച്വൽ സ്റ്റോപ്പുകളിലേക്ക്’ 13 സീറ്റുകളുള്ള മിനിബസുകൾ എത്തുന്നു.
ആപ്പ് ബുക്കിംഗും നിരക്കുകളും
‘Dubai Bus on Demand’ എന്ന സ്മാർട്ട്ഫോൺ ആപ്ലിക്കേഷൻ വഴി യാത്രക്കാർക്ക് ബസ് ബുക്ക് ചെയ്യാം. ആപ്പിൽ രജിസ്റ്റർ ചെയ്ത ശേഷം പിക്ക് അപ്പ് ലൊക്കേഷനും എത്തേണ്ട സ്ഥലവും നൽകിയാൽ തൊട്ടടുത്തുള്ള മിനിബസ് അനുവദിക്കപ്പെടും. ബസിന്റെ തത്സമയ വിവരങ്ങൾ ആപ്പിലൂടെ ട്രാക്ക് ചെയ്യാനും സാധിക്കും.
ഡെബിറ്റ് കാർഡ്, ക്രെഡിറ്റ് കാർഡ്, നോൾ (nol) കാർഡ് എന്നിവ ഉപയോഗിച്ച് ആപ്പിലൂടെത്തന്നെ തുക അടയ്ക്കാം.
- ഒറ്റ സോണിനുള്ളിലെ യാത്രയ്ക്ക്: നിരക്ക് 5 ദിർഹം.
- തൊട്ടടുത്ത സോണുകളിലേക്കുള്ള യാത്രയ്ക്ക് (Inter-zone): നിരക്ക് 7 ദിർഹം.
- ബിസിനസ് ബേ പ്രത്യേക നിരക്ക്: 2 ദിർഹം.
- ഒപ്പം യാത്ര ചെയ്യുന്ന അധിക ആൾക്ക്: ആപ്പിൽ കൂടെ ചേർക്കുന്ന ഓരോ അധിക യാത്രക്കാരനും 4 ദിർഹം.
സർവീസ് ലഭ്യമായ 20 മേഖലകൾ
അൽ ബർഷ, അൽ നഹ്ദ, ദുബായ് സിലിക്കൺ ഒയാസിസ്, ദുബായ് അക്കാദമിക് സിറ്റി, അൽ റിഗ്ഗ, പോർട്ട് സയീദ്, ബിസിനസ് ബേ, ഡൗൺടൗൺ ദുബായ്, ഊദ് മേത്ത, അൽ കറാമ, ബർഷ ഹൈറ്റ്‌സ്, അൽ മൻഖൂൽ, ഡി.ഐ.എഫ്.സി (DIFC), അൽ വർഖ, ദുബായ് ഇൻവെസ്റ്റ്‌മെന്റ് പാർക്ക് (DIP), ജെ.വി.സി (JVC), അൽ ഖുസൈസ് എന്നിവയ്ക്കൊപ്പമാണ് ഇപ്പോൾ അൽ സത്വ, അൽ ഖൂസ്, മിർദിഫ് എന്നീ മേഖലകൾ കൂടി ഉൾപ്പെടുത്തിയത്.
തിങ്കൾ മുതൽ വ്യാഴം വരെയും ശനിയാഴ്ചകളിലും രാവിലെ 5:00 മുതൽ അർദ്ധരാത്രി 12:00 വരെയാണ് സർവീസ്. വാരാന്ത്യ യാത്രകൾ പ്രമാണിച്ച് വെള്ളിയാഴ്ചകളിൽ പുലർച്ചെ 1:00 വരെയും ഞായറാഴ്ചകളിൽ രാവിലെ 8:00 മുതൽ അർദ്ധരാത്രി വരെയും ബസുകൾ ലഭ്യമായിരിക്കും.
