വാണിജ്യ സ്ഥാപനങ്ങളിൽ പശ്ചാത്തല സംഗീതം പ്രദർശിപ്പിക്കുന്നതിന് മുൻകൂട്ടി ലൈസൻസ് എടുക്കണമെന്നും റോയൽറ്റി ഫീസ് നൽകണമെന്നും അതോറിറ്റി വ്യക്തമാക്കി.
ദുബായ് — രാജ്യത്തെ കഫേകൾ, ഹോട്ടലുകൾ, റെസ്റ്റോറന്റുകൾ, ഷോപ്പിംഗ് മാളുകൾ എന്നിവയുൾപ്പെടെയുള്ള പൊതു ഇടങ്ങളിൽ സംഗീതം പ്ലേ ചെയ്യുന്നതിന് ഔദ്യോഗിക ലൈസൻസും ഫീസും നിർബന്ധമാക്കി യുഎഇ.
പകർപ്പവകാശ സംരക്ഷണ നിയമങ്ങൾ കർശനമാക്കുന്നതിന്റെ ഭാഗമായാണ് യുഎഇ സാമ്പത്തിക മന്ത്രാലയം നടപടികൾ ശക്തമാക്കിയത്. വാണിജ്യ ആവശ്യങ്ങൾക്കായി പശ്ചാത്തല സംഗീതമോ ലൈവ് പ്രകടനങ്ങളോ ഉപയോഗിക്കുന്ന സ്ഥാപനങ്ങൾ പബ്ലിക് പെർഫോമൻസ് ലൈസൻസ് സ്വന്തമാക്കണം. സംഗീതസംവിധായകർ, ഗായകർ, റെക്കോർഡ് ലേബലുകൾ എന്നിവർക്ക് അർഹമായ റോയൽറ്റി ഉറപ്പാക്കുകയാണ് ഇതിലൂടെ ലക്ഷ്യമിടുന്നത്.
ലൈസൻസ് ഇല്ലാതെ പകർപ്പവകാശമുള്ള സംഗീതം വാണിജ്യ സ്ഥാപനങ്ങളിൽ ഉപയോഗിക്കുന്നത് നിയമലംഘനമായി കണക്കാക്കും. ഇത്തരക്കാർക്കെതിരെ പിഴയടക്കമുള്ള നിയമനടപടികൾ സ്വീകരിക്കുമെന്ന് അധികൃതർ വ്യക്തമാക്കി. സ്ഥാപനത്തിന്റെ വലുപ്പം, ബിസിനസ്സ് സ്വഭാവം, സംഗീത ഉപയോഗത്തിന്റെ രീതി എന്നിവ കണക്കാക്കിയാണ് ലൈസൻസ് ഫീസ് നിശ്ചയിക്കുന്നത്.
അന്താരാഷ്ട്ര ബൗദ്ധിക സ്വത്തവകാശ തത്ത്വങ്ങൾക്ക് അനുസൃതമായി ഗൾഫ് മേഖലയിൽ കലാകാരന്മാരുടെ പകർപ്പവകാശം സംരക്ഷിക്കുന്നതിനുള്ള വിപുലമായ ശ്രമങ്ങളുടെ ഭാഗമായാണ് ഈ നടപടി.
