ശബരിമല മുൻ മേൽശാന്തി ബ്രഹ്മശ്രീ പി.എൻ. മഹേഷ് നമ്പൂതിരി ചടങ്ങുകൾക്ക് മുഖ്യകാർമ്മികത്വം വഹിക്കും
അജ്മാൻ, യു.എ.ഇ — അയ്യപ്പ സേവാ സമിതി യു.എ.ഇയുടെ ഇരുപത്തിയഞ്ചാമത് അയ്യപ്പപൂജാ മഹോത്സവം നവംബർ 21, 22 തീയതികളിൽ അജ്മാൻ ഇന്ത്യൻ അസോസിയേഷൻ ഹാളിൽ നടക്കും. സംഘടനയുടെ രജതജൂബിലി ആഘോഷങ്ങളുടെ ഭാഗമായാണ് രണ്ടു ദിവസത്തെ മഹോത്സവം സംഘടിപ്പിക്കുന്നത്.
ശബരിമല മുൻ മേൽശാന്തിയും മുഖ്യ ആചാര്യനുമായ ബ്രഹ്മശ്രീ പി.എൻ. മഹേഷ് നമ്പൂതിരി ചടങ്ങുകൾക്ക് മുഖ്യകാർമ്മികത്വം വഹിക്കുമെന്ന് ഭാരവാഹികൾ അറിയിച്ചു.
നവംബർ 21 ശനിയാഴ്ച വൈകുന്നേരം 5.30-ന് ഭഗവതി സേവ, ലളിതാസഹസ്രനാമ പാരായണം എന്നിവയോടെ ചടങ്ങുകൾക്ക് തുടക്കമാകും. 6.30-ന് അയ്യപ്പ സേവാ സമിതി യു.എ.ഇ അവതരിപ്പിക്കുന്ന നാമസങ്കീർത്തനം നടക്കും. തുടർന്ന് 7 മണിക്ക് താലപ്പൊലിയും ചെണ്ടമേളവും സോപാന സംഗീതവും അകമ്പടിയേകുന്ന അയ്യപ്പ വിഗ്രഹത്തിൻ്റെ എഴുന്നള്ളത്തും 7.15-ന് കൊടിയേറ്റവും നടക്കും. രാത്രി 8 മണിക്ക് പ്രസാദ ഊട്ടോടെ (അന്നദാനം) ആദ്യ ദിവസത്തെ ചടങ്ങുകൾ സമാപിക്കും.
ഞായറാഴ്ച (നവംബർ 22) പുലർച്ചെ 5 മണിക്ക് മഹാഗണപതി ഹോമവും ഉഷപൂജയും നടക്കും. രാവിലെ 8 മണിക്ക് ബ്രഹ്മശ്രീ പി.എൻ. മഹേഷ് നമ്പൂതിരിയുടെ മുഖ്യകാർമ്മികത്വത്തിൽ അഷ്ടലക്ഷ്മി പൂജ നടക്കും. ഉച്ചയ്ക്ക് 2 മണിക്ക് മഞ്ഞപ്ര മോഹനനും സംഘവും അവതരിപ്പിക്കുന്ന നാമസങ്കീർത്തനം അരങ്ങേറും.
ചിന്തുപാട്ട്, സോപാന സംഗീതം, പഞ്ചവാദ്യം, നൃത്താവിഷ്കാരം എന്നിവയും ആഘോഷങ്ങളുടെ ഭാഗമായി നടക്കും. ഉച്ചപൂജ, ആദ്ധ്യാത്മിക സദസ്സ്, കർപ്പൂരാഴി, പടിപൂജ, ദീപാരാധന, പുഷ്പാഭിഷേകം, കൊടിയിറക്കൽ, ഹരിവരാസനം എന്നിവയോടെ മഹോത്സവത്തിന് സമാപനമാകും. രണ്ടു ദിവസവും ഭക്തജനങ്ങൾക്കായി അന്നദാനം ഒരുക്കിയിട്ടുണ്ടെന്ന് അയ്യപ്പ സേവാ സമിതി ഭാരവാഹികൾ അറിയിച്ചു.









