ദുബായ്: യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദിന്റെ ദർശനത്തിന്റെ ഭാഗമായി വളർന്ന അറബ് മീഡിയ ഉച്ചകോടി പ്രൊഫഷണൽ ചർച്ചകൾക്കപ്പുറം മാധ്യമരംഗത്തിന്റെ ഭാവിയെ രൂപപ്പെടുത്തുന്ന തന്ത്രപ്രധാന വേദിയായി മാറിയതായി നാഷണൽ മീഡിയ അതോറിറ്റി ചെയർമാൻ അബ്ദുല്ല അൽ ഹമദ്.
അതിവേഗം മാറിക്കൊണ്ടിരിക്കുന്ന മാധ്യമലോകത്തിന്റെ ഭാവി മുൻകൂട്ടി കാണാനും മാറ്റങ്ങളോട് പ്രതികരിക്കുന്നതിനായി പൊതുവായ കാഴ്ചപ്പാടുകൾ രൂപപ്പെടുത്താനും ഉച്ചകോടി മാധ്യമപ്രവർത്തകരെയും വ്യവസായ രംഗത്തെ പ്രമുഖരെയും ഒരുമിച്ച് കൊണ്ടുവരുന്നതായി അദ്ദേഹം പറഞ്ഞു.
മാധ്യമമേഖല നേരിടുന്ന പുതിയ വെല്ലുവിളികളും അവസരങ്ങളും ചർച്ച ചെയ്യുന്നതിനൊപ്പം, ഭാവിയിലെ മാധ്യമരംഗത്തിന് ആവശ്യമായ ആശയങ്ങളും സഹകരണങ്ങളും രൂപപ്പെടുത്തുന്നതിനുള്ള പ്രധാന വേദിയായാണ് അറബ് മീഡിയ ഉച്ചകോടി മാറുന്നതെന്നും അബ്ദുല്ല അൽ ഹമദ് വ്യക്തമാക്കി.
മാധ്യമരംഗത്തെ അതിവേഗ സാങ്കേതിക മാറ്റങ്ങൾ, പുതിയ ആശയവിനിമയ രീതികൾ, ഡിജിറ്റൽ പരിവർത്തനം എന്നിവയുടെ പശ്ചാത്തലത്തിൽ മേഖലയുടെ ഭാവി സംബന്ധിച്ച സംവാദങ്ങൾക്ക് ഉച്ചകോടി കൂടുതൽ പ്രാധാന്യം നൽകുകയാണ്.
