വാഗ്ദാനങ്ങളിൽ ഒതുങ്ങാതെ പ്രായോഗിക അടിസ്ഥാന സൗകര്യ വികസനം ഉറപ്പാക്കുകയാണ് ലക്ഷ്യമെന്ന് യു.എ.ഇ വിദേശകാര്യ അസിസ്റ്റന്റ് മന്ത്രി അബ്ദുള്ള അഹമ്മദ് ബലാ അ വ്യക്തമാക്കി.
കിഗാലി, റുവാണ്ട — ഓഗസ്റ്റ് 18, 2026:ആഫ്രിക്കൻ ഭൂഖണ്ഡത്തിലെ രൂക്ഷമായ കുടിവെള്ള ക്ഷാമവും ശുചിത്വ പ്രശ്നങ്ങളും പരിഹരിക്കുന്നതിനായി അന്താരാഷ്ട്ര നിക്ഷേപകരെയും സാങ്കേതിക വിദഗ്ധരെയും ഒരുമിച്ച് അണിനിരത്തുമെന്ന് യുണൈറ്റഡ് അറബ് എമിറേറ്റ്സ് പ്രഖ്യാപിച്ചു.
റുവാണ്ടൻ തലസ്ഥാനമായ കിഗാലിയിൽ നടക്കുന്ന ‘ആഫ്രിക്കൻ വാട്ടർ ആൻഡ് സാനിറ്റേഷൻ സിസ്റ്റംസ് ലീഡർഷിപ്പ് സിമ്പോസിയത്തിൽ’ സംസാരിക്കവെയാണ് യു.എ.ഇ വിദേശകാര്യ അസിസ്റ്റന്റ് മന്ത്രി (ഊർജ, സുസ്ഥിരതാ വിഭാഗം) അബ്ദുള്ള അഹമ്മദ് ബലാ അ രാജ്യത്തിന്റെ നിലപാട് വ്യക്തമാക്കിയത്.
ലോകത്ത് നാൽപ്പതോളം ശതമാനം ആളുകൾ സുരക്ഷിതമായ കുടിവെള്ള ലഭ്യതയില്ലാതെ ബുദ്ധിമുട്ടുമ്പോൾ, ജലസുരക്ഷയെ ഇനി വെറുമൊരു നയരൂപീകരണ വിഷയമായി കാണാൻ കഴിയില്ലെന്ന് അദ്ദേഹം ചൂണ്ടിക്കാട്ടി. ഭക്ഷണം, ഊർജം, സാമ്പത്തിക വളർച്ച, കാലാവസ്ഥാ അതിജീവനം എന്നിവയിലെല്ലാം കുടിവെള്ളത്തിന്റെ പങ്കാളിത്തം നിർണായകമാണ്.
“ഇനി ലക്ഷ്യങ്ങളെക്കുറിച്ച് പ്രസംഗിക്കേണ്ട സമയമല്ല, മറിച്ച് പദ്ധതികൾ പ്രായോഗികമായി നടപ്പിലാക്കുകയാണ് വേണ്ടത്. തന്ത്രപരമായ കൂട്ടുകെട്ടുകൾ, വിദേശ നിക്ഷേപം, പുതിയ സാങ്കേതികവിദ്യകൾ എന്നിവ ഉപയോഗിച്ച് വികസന പദ്ധതികൾ ജനങ്ങളിലേക്ക് എത്തിക്കുകയാണ് ഞങ്ങളുടെ പ്രാഥമിക ലക്ഷ്യം,” അബ്ദുള്ള അഹമ്മദ് ബലാ അ വ്യക്തമാക്കി.
വരുന്ന ഡിസംബറിൽ അബുദാബിയിൽ നടക്കുന്ന ഐക്യരാഷ്ട്രസഭയുടെ ‘2026 യു.എൻ വാട്ടർ കോൺഫറൻസിന്’ യു.എ.ഇയും സെനഗലുമാണ് സഹ-അതിഥേയത്വം വഹിക്കുന്നത്. ഈ ഉച്ചകോടിക്ക് മുന്നോടിയായാണ് ആഫ്രിക്കൻ രാജ്യങ്ങളിലെ അടിസ്ഥാന സൗകര്യ വികസനത്തിന് ആവശ്യമായ ധനസമാഹരണം ലക്ഷ്യമിട്ട് യു.എ.ഇ രംഗത്തിറങ്ങിയിരിക്കുന്നത്.
ആഗോള കുടിവെള്ള പ്രശ്നങ്ങൾ പരിഹരിക്കാൻ 11.9 കോടി ഡോളറിന്റെ ‘മുഹമ്മദ് ബിൻ സായിദ് വാട്ടർ ഇനിഷ്യേറ്റീവ്’, 100 കോടി ആളുകൾക്ക് ശുദ്ധജലം എത്തിക്കാൻ ലക്ഷ്യമിടുന്ന 200 കോടി ഡോളറിന്റെ ‘അബുദാബി ഗ്ലോബൽ വാട്ടർ പ്ലാറ്റ്ഫോം’ എന്നിവ യു.എ.ഇ ഇതിനകം ആരംഭിച്ചിട്ടുണ്ട്. കൂടാതെ, റുവാണ്ടയിലെ കുടിവെള്ള വിതരണ ശൃംഖല ശക്തമാക്കുന്നതിനായി അബുദാബി ഫണ്ട് ഫോർ ഡെവലപ്പ്മെന്റ് കരാറിൽ ഒപ്പുവെച്ചിട്ടുമുണ്ട്.
ഡിസംബറിലെ അബുദാബി ഉച്ചകോടി കേവലം പ്രഖ്യാപനങ്ങളിൽ ഒതുങ്ങാതെ ജനങ്ങളുടെ ജീവിതത്തിൽ നേരിട്ട് മാറ്റമുണ്ടാക്കുന്ന പദ്ധതികൾക്ക് വഴിവെക്കുമെന്നും അദ്ദേഹം കൂട്ടിച്ചേർത്തു.
