“എറ്റേർണൽ ഗാർഡൻസ്” എന്ന് നാമകരണം ചെയ്തു
റാസൽഖൈമ: ഇന്ത്യൻ പ്രവാസി സമൂഹത്തിനായി റാസല്ഖൈമ ഭരണാധിപന് അനുവദിച്ച ഭൂമിയില് സ്ഥാപിക്കുന്ന ശ്മശാന കേന്ദ്രത്തിന് ‘എറ്റേണല് ഗാര്ഡന്സ്’ (നിത്യശാന്തിയുടെ ഉദ്യാനങ്ങള്) എന്ന് നാമകരണം ചെയ്തതായി റാസല്ഖൈമ ഇന്ത്യന് റിലീഫ് കമ്മിറ്റി (ഐ.ആര്.സി) മാനേജ്മെന്റ് കമ്മിറ്റി അറിയിച്ചു. കഴിഞ്ഞ ആഴ്ച്ച 22/02/2026 റാക് ഹോട്ടലിൽ വച്ച് ഐ.ആര്.സി നൽകിയ സ്വീകരണ ചടങ്ങിൽ ദുബൈ ഇന്ത്യന് കോണ്സല് ജനറല് ഡോ. ഇ. വിഷ്ണുവര്ധന് റെഡ്ഢിയുടെ സാന്നിധ്യത്തിലാണ് ശ്മശാന കേന്ദ്രത്തിന്െറ പേര് നിശ്ചയിച്ചത്. റാസൽഖൈമ ഭരണാധികാരിയും സുപ്രീം കൗൺസിൽ അംഗവുമായ ഹിസ് ഹൈനെസ് ഷെയ്ഖ് സൗദ് ബിൻ സഖർ അൽ ഖാസിമിക്കും റാസൽഖൈമ സർക്കാറിനും ഇന്ത്യൻ സമൂഹത്തിന്റെ പേരിൽ അദ്ദേഹം നന്ദി രേഖപ്പെടുത്തി. അൽ ജസീറ അൽ ഹംറയിലാണ് ശ്മശാന കേന്ദ്രം സ്ഥാപിക്കുന്നതിനായി റാസൽഖൈമ സർക്കാർ ഭൂമി അനുവദിച്ചിരിക്കുന്നത്. എറ്റേർണൽ ഗാർഡൻസിന്റെ നിർമാണം, ഭരണനിർവഹണം, ഭാവി പരിപാലനം എന്നിവയുടെ ചുമതല ഇന്ത്യൻ റിലീഫ് കമ്മിറ്റിയുടെ നേതൃത്വത്തിലുള്ള വിവിധ ഇന്ത്യൻ സംഘടനാ പ്രതിനിധികൾ ഉൾപ്പെട്ട കോർ കമ്മിറ്റിയെ ഏൽപിച്ചതായും ഇന്ത്യന് കോണ്സല് ജനറല് അറിയിച്ചു. ഡോ. നിഷാം നൂറുദ്ദീന്, പത്മരാജ്, ശ്രീധരൻ പ്രസാദ്, അനിൽ വിദ്യാധരൻ, രാജീവ് രഞ്ജൻ സിങ്, സുപ്രിയ ഘോഷ്, പ്രദീപ് വർമ്മ , നാസർ അൽദാന എന്നിവരാണ് കോർ കമ്മിറ്റി അംഗങ്ങൾ..
