കടലിൽ ഗതിമാറി വീണ ഇറാനിയൻ ബാലിസ്റ്റിക് മിസൈലുകളെത്തുടർന്ന് മേഖലയിൽ ജാഗ്രത ശക്തമാക്കി.
ദുബായ്:മേഖലാ സമുദ്രപാത ലക്ഷ്യമിട്ട് തൊടുത്തുവിട്ട രണ്ട് ഇറാനിയൻ ബാലിസ്റ്റിക് മിസൈലുകൾ കടലിൽ വീണതിനെത്തുടർന്ന് ഇറാനുമായുള്ള എല്ലാവിധ വാണിജ്യ, വ്യാപാര, ധനകാര്യ ഇടപാടുകളും യുഎഇ അടിയന്തരമായി നിർത്തിവെച്ചു. പുനരറിയിപ്പ് ഉണ്ടാകുന്നതുവരെ നിരോധനം തുടരുമെന്ന് അധികൃതർ അറിയിച്ചു.
ഇറാൻ അയച്ച മിസൈലുകൾ കരയിൽ പതിച്ചിട്ടില്ലെന്നും ആളപായമോ നാശനഷ്ടങ്ങളോ റിപ്പോർട്ട് ചെയ്തിട്ടില്ലെന്നും യുഎഇ പ്രതിരോധ വിഭാഗം സ്ഥിരീകരിച്ചു. അന്താരാഷ്ട്ര കപ്പൽ ഗതാഗതത്തിന് ഭീഷണിയുയർന്ന സാഹചര്യത്തിൽ രാജ്യത്തുടനീളം സുരക്ഷാ വിഭാഗങ്ങൾ കടുത്ത ജാഗ്രതയിലാണ്.
ഇറാനുമായി നിലവിൽ യാതൊരു നയതന്ത്ര ചർച്ചകൾക്കും പദ്ധതിയില്ലെന്ന് യുഎസ് പ്രസിഡന്റ് ഡൊണാൾഡ് ട്രംപ് വ്യക്തമാക്കി. ഹോർമുസ് കടലിടുക്കിൽ കപ്പൽ ഗതാഗതം കുറഞ്ഞിട്ടുണ്ടെങ്കിലും പാത തുറന്നുപ്രവർത്തിക്കുന്നുണ്ടെന്നാണ് യുഎസ് നിലപാട്.
അതേസമയം, അമേരിക്കയും ഇറാനും തമ്മിലുള്ള ഔദ്യോഗിക ചർച്ചകൾ പുനരാരംഭിക്കുന്നതിന് മുൻപായി ഹോർമുസ് കടലിടുക്കുമായി ബന്ധപ്പെട്ട് ഇറാനും ഒമാനും തമ്മിലുള്ള ഉഭയകക്ഷി ധാരണയ്ക്കായി മധ്യസ്ഥർ കാത്തിരിക്കുകയാണെന്ന് ഖത്തർ വിദേശകാര്യ മന്ത്രാലയം അറിയിച്ചു.
