ഹോർമൂസ് കടലിടുക്ക് ‘അമേരിക്കൻ ഭൂപ്രദേശം’: ട്രംപിന്റെ അവകാശവാദത്തിനെതിരെ ആഞ്ഞടിച്ച് ഇറാൻ

ഉപരോധവും നാവിക ഉപരോധവും ശക്തമാക്കുന്നതിനിടെ അമേരിക്കയുടെ നീക്കം കൊളോണിയലിസത്തിലേക്കുള്ള മടങ്ങിപ്പോക്കാണെന്ന് ടെഹ്‌റാൻ.

വാഷിംഗ്ടൺ/ടെഹ്‌റാൻ, ഓഗസ്റ്റ് 22, 2026:സ്ട്രാറ്റജിക് നാവിക പാതയായ ഹോർമൂസ് കടലിടുക്ക് “അമേരിക്കൻ ഭൂപ്രദേശമായി” താൻ കാണുന്നുവെന്ന് യുഎസ് പ്രസിഡന്റ് ഡൊണാൾഡ് ട്രംപ്. സൗത്ത് കരോലിനയിലെ സൗത്ത് മൈർട്ടിൽ ബീച്ചിൽ നടന്ന പ്രചാരണ റാലിയിലാണ് ട്രംപിന്റെ പരാമർശം. ഇറാനെ ഒരിക്കലും ആണവായുധം നിർമ്മിക്കാൻ അനുവദിക്കില്ലെന്നും അമേരിക്കൻ നിബന്ധനകൾ അംഗീകരിക്കാൻ ടെഹ്‌റാൻ തയ്യാറാകുന്നില്ലെന്നും ട്രംപ് ആരോപിച്ചു. അതേസമയം, യുഎസിന്റെ പുതിയ സാമ്പത്തിക ഉപരോധങ്ങൾ എല്ലാ പരമാധികാര രാജ്യങ്ങൾക്കുമെതിരെയുള്ള “യുദ്ധപ്രഖ്യാപനമാണെന്ന്” ഇറാൻ വിദേശകാര്യ മന്ത്രാലയം തുറന്നടിച്ചു.

നാവിക പാതയിൽ പൂർണ്ണ നിയന്ത്രണമെന്ന് ട്രംപ്

എയർഫോഴ്സ് വണ്ണിൽ എത്തിയ ശേഷം അനുയായികളെ അഭിസംബോധന ചെയ്യവെയാണ് പേർഷ്യൻ ഉൾക്കടലിലെ അമേരിക്കൻ സൈനിക സാന്നിധ്യത്തെ ട്രംപ് ന്യായീകരിച്ചത്. “ഇറാന്റെ കൈവശം ആണവായുധം എത്താൻ അനുവദിക്കില്ല. യുഎസ് സൈനിക ഇടപെടലിലൂടെ അത് തടയാൻ കഴിഞ്ഞു,” ട്രംപ് അവകാശപ്പെട്ടു.

ഹോർമൂസ് കടലിടുക്കിലെ ഗതാഗതത്തിൽ അമേരിക്കയ്ക്ക് പൂർണ്ണ നിയന്ത്രണമുണ്ടെന്ന് അദ്ദേഹം പറഞ്ഞു. “ഇറാൻ കരാറിലെത്താൻ ആഗ്രഹിക്കുന്നുണ്ട്. എന്നാൽ ഹോർമൂസ് കടലിടുക്കിനെ ഇപ്പോൾ ഒരു അമേരിക്കൻ ഭൂപ്രദേശമായാണ് ഞാൻ കാണുന്നത്,” ട്രംപ് വ്യക്തമാക്കി.

അമേരിക്കൻ നിലപാടിനെതിരെ ആഞ്ഞടിച്ച് ഇറാൻ

അമേരിക്കയുടെ ഉപരോധ നീക്കങ്ങളെയും നാവിക ഉപരോധത്തെയും ഇറാൻ ശക്തമായി അപലപിച്ചു. മറ്റ് രാജ്യങ്ങളുടെ പരമാധികാരത്തിന്മേലുള്ള കടന്നുകയറ്റമാണ് അമേരിക്കയുടെ നീക്കമെന്ന് ഇറാൻ വിദേശകാര്യ മന്ത്രാലയ വക്താവ് ഇസ്മായിൽ ബഗായി പറഞ്ഞു.

മൂന്നാം കക്ഷികളുമായുള്ള വ്യാപാരം തടയാൻ വിദേശ ബാങ്കുകളെയും കമ്പനികളെയും വിമാനത്താവളങ്ങളെയും ഭീഷണിപ്പെടുത്തുന്നത് അന്താരാഷ്ട്ര നിയമങ്ങളുടെ ലംഘനമാണ്. ഇത്തരം നീക്കങ്ങൾക്ക് വഴങ്ങുന്നത് “പൂർണ്ണമായ കൊളോണിയലിസത്തിലേക്ക്” ലോകത്തെ തിരികെ കൊണ്ടുപോകുമെന്നും അദ്ദേഹം മുന്നറിയിപ്പ് നൽകി. കടലിടുക്കിന്മേലുള്ള ട്രംപിന്റെ അവകാശവാദം വെറും ഭ്രമമാണെന്ന് ഇറാൻ സുപ്രീം നാഷണൽ സെക്യൂരിറ്റി കൗൺസിൽ സെക്രട്ടറി മൊഹ്സെൻ റെസായി പ്രതികരിച്ചു.

മധ്യസ്ഥ ചർച്ചകളും അന്താരാഷ്ട്ര എതിർപ്പും

അമേരിക്കയുടെ കടുത്ത നിലപാടുകൾ നിലനിൽക്കെ തന്നെ, കടലിടുക്കിലൂടെയുള്ള കപ്പൽ ഗതാഗതം പുനഃസ്ഥാപിക്കുന്നതിനായി ഇറാന്റെയും ഒമാന്റെയും വിദേശകാര്യ മന്ത്രിമാർ ചർച്ച നടത്തി. മേഖലയിലെ സ്ഥിതിഗതികൾ ശാന്തമാക്കാൻ ഒമാൻ ഉന്നത നയതന്ത്രജ്ഞനുമായി യുഎസ് സ്റ്റേറ്റ് സെക്രട്ടറി മാർക്കോ റൂബിയോയും കൂടിക്കാഴ്ച നടത്തിയിട്ടുണ്ട്.

അതേസമയം, ഇറാന് എതിരെയുള്ള അമേരിക്കയുടെ “ഇക്കണോമിക് ഡി-ഡേ” പ്രചാരണത്തെ ചൈന കടുത്ത ഭാഷയിൽ വിമർശിച്ചു. ഏകപക്ഷീയമായ ഉപരോധങ്ങൾ ആരുടെയും താത്പര്യങ്ങൾ സംരക്ഷിക്കില്ലെന്നും ചൈനീസ് വിദേശകാര്യ മന്ത്രാലയം വ്യക്തമാക്കി.