മ്യൂണിക് വിമാനത്താവളത്തിൽ മിഡിൽ ഈസ്റ്റ് യാത്രക്കാർക്കായി 95,000 ചതുരശ്ര മീറ്റർ ടെർമിനൽ പിയർ; ദുബായ് എടിഎമ്മിൽ ടൂറിസം സാധ്യതകൾ അവതരിപ്പിച്ച് ജർമനി.
ദുബായ്, സെപ്റ്റംബർ 14, 2026 : ജർമനിയിലെത്തുന്ന ഗൾഫ് സഹകരണ കൗൺസിൽ (ജിസിസി) രാജ്യങ്ങളിൽ നിന്നുള്ള വിനോദസഞ്ചാരികൾ കഴിഞ്ഞ വർഷം ചെലവിട്ടത് 300 കോടി യൂറോ (ഏകദേശം 27,000 കോടിയിലധികം രൂപ). വിദേശ വിനോദസഞ്ചാരികളുടെ ശരാശരി ചെലവിനേക്കാൾ 30 ശതമാനത്തിലധികം അധികമാണിത്. ദുബായ് വേൾഡ് ട്രേഡ് സെന്ററിൽ ആരംഭിച്ച അറേബ്യൻ ട്രാവൽ മാർക്കറ്റിലാണ് (എടിഎം 2026) ജർമൻ നാഷണൽ ടൂറിസ്റ്റ് ഓഫീസ് ഈ കണക്കുകൾ വ്യക്തമാക്കിയത്.
2022-നെ അപേക്ഷിച്ച് 2025-ൽ ജിസിസി സന്ദർശകരുടെ രാത്രികാല താമസങ്ങളിൽ ഒൻപത് ശതമാനം വർധനവുണ്ടായി. ആകെ 12 ലക്ഷം നൈറ്റ് സ്റ്റേകളാണ് രേഖപ്പെടുത്തിയത്. ഇതോടെ ജർമനിയുടെ മൂന്നാമത്തെ വലിയ വിദേശ വിപണിയായി ഗൾഫ് മേഖല മാറി.
2026 ജനുവരിയിൽ 68,455 താമസങ്ങളോടെ 4.7 ശതമാനം വർധന രേഖപ്പെടുത്തിയിരുന്നു. എന്നാൽ തുടർന്നുണ്ടായ വ്യോമയാന തടസ്സങ്ങൾ സന്ദർശകരുടെ വരവിനെ നേരിയ തോതിൽ ബാധിച്ചു. സർവീസുകൾ പഴയപടിയാകുന്നതോടെ വലിയ തോതിലുള്ള വിനോദസഞ്ചാര തിരിച്ചുവരവ് ഉണ്ടാകുമെന്നാണ് ടൂറിസം അധികൃതരുടെ കണക്കുകൂട്ടൽ.
ഗൾഫ് യാത്രക്കാരെ ലക്ഷ്യമിട്ട് മ്യൂണിക് അന്താരാഷ്ട്ര വിമാനത്താവളത്തിൽ വിപുലമായ സൗകര്യങ്ങളാണ് ഏർപ്പെടുത്തുന്നത്. മിഡിൽ ഈസ്റ്റിൽ നിന്നുള്ള വിമാനങ്ങൾക്കായി 95,000 ചതുരശ്ര മീറ്ററിലുള്ള പുതിയ ടെർമിനൽ 1 പിയർ സജ്ജമാക്കുന്നു. പ്രതിവർഷം 60 ലക്ഷം യാത്രക്കാരെ ഉൾക്കൊള്ളാൻ ശേഷിയുള്ളതാണ് ഈ കേന്ദ്രം. 2025-ൽ മ്യൂണിക്കിനും ഗൾഫ് രാജ്യങ്ങൾക്കുമിടയിൽ 16 ലക്ഷം പേർ യാത്ര ചെയ്തിട്ടുണ്ട്. വിമാനത്താവളത്തിന്റെ ആകെ ദീർഘദൂര സർവീസുകളുടെ 18 ശതമാനമാണിത്. നിലവിൽ മേഖലയിലെ പത്ത് രാജ്യങ്ങളിലെ 15 കേന്ദ്രങ്ങളിലേക്ക് 15 എയർലൈനുകൾ മ്യൂണിക്കിൽ നിന്ന് സർവീസ് നടത്തുന്നുണ്ട്.
അറബ് സഞ്ചാരികളെ സഹായിക്കുന്നതിനും മെഡിക്കൽ ടൂറിസം ഉൾപ്പെടെയുള്ള ആവശ്യങ്ങൾക്കുമായി ബവേറിയൻ-അറബ് സൊസൈറ്റി മ്യൂണിക് വിമാനത്താവളത്തിൽ പ്രത്യേക ഓഫീസ് പ്രവർത്തനം തുടങ്ങി. കുടുംബ യാത്രകൾ, ആഡംബര പര്യടനങ്ങൾ, ചികിത്സാ ടൂറിസം എന്നിവയ്ക്ക് കൂടുതൽ പ്രാധാന്യം നൽകാനാണ് പദ്ധതി.
2026–2027 കാലയളവിലേക്ക് വിപുലമായ ക്യാംപെയ്നുകളാണ് ജർമൻ ടൂറിസം ബോർഡ് പ്രഖ്യാപിച്ചിരിക്കുന്നത്. ബൈറോയ്ത്തിലെ വാഗ്നർ ഫെസ്റ്റിവലിന്റെ 150-ാം വാർഷികം, ബീഥോവന്റെ 200-ാം ചരമവാർഷികത്തോടനുബന്ധിച്ചുള്ള ബിടിഎച്ച്വിഎൻ 2027 (BTHVN 2027), കാസലിലെ സമകാലിക കലാപ്രദർശനമായ ഡോക്യുമെന്റ 16, റൂർ മേഖലയിലെ അന്താരാഷ്ട്ര ഗാർഡൻ എക്സിബിഷൻ (ഐജിഎ 2027) എന്നിവ മുൻനിർത്തിയാണ് പ്രചാരണം.
വിസിറ്റ് ബെർലിൻ, ലുഫ്താൻസ ഗ്രൂപ്പ്, വാല്യൂ റീട്ടെയിൽ മാനേജ്മെന്റ്, സ്റ്റുഡിയോസസ് ഇൻകമിംഗ് എന്നിവയുടെ പ്രതിനിധികളും ദുബായിൽ നടക്കുന്ന എടിഎമ്മിൽ പങ്കെടുക്കുന്നുണ്ട്. സെപ്റ്റംബർ 17 വരെയാണ് പ്രദർശനം.
