സഹിഷ്ണുതയുടെയും ഐക്യത്തിന്റെയും സന്ദേശം ഉയർത്തി വിപുലമായ അസംബ്ലി; പ്രിൻസിപ്പൽ പതാക ഉയർത്തി
ദുബായ്, യുഎഇ — യുഎഇ പതാകദിനത്തോടനുബന്ധിച്ച് ദുബായ് സുന്നി സെന്റർ ഫോർ ഇസ്ലാമിക് എജ്യുക്കേഷനിൽ വിപുലമായ അസംബ്ലി സംഘടിപ്പിച്ചു. രാജ്യത്തിന്റെ വികസന സ്വപ്നങ്ങളുടെയും ആത്മാഭിമാനത്തിന്റെയും മൂല്യങ്ങളുടെയും പ്രതീകമാണ് ദേശീയ പതാകയെന്ന് ചടങ്ങിൽ അധ്യാപകരും വിദ്യാർഥികളും അനുസ്മരിച്ചു.
ദശലക്ഷക്കണക്കിന് പ്രവാസികളുടെ സ്വപ്നങ്ങൾക്ക് തണലൊരുക്കുന്ന യുഎഇ സഹിഷ്ണുതയുടെയും ഐക്യത്തിന്റെയും പുരോഗതിയുടെയും മാതൃകയാണെന്നും, ഈ മൂല്യങ്ങളാണ് പതാകദിനം പ്രതിഫലിപ്പിക്കുന്നതെന്നും യോഗം വിലയിരുത്തി. യുഎഇയുടെ ദേശീയ പതാക വെറുമൊരു വർണ്ണത്തുണിയല്ല, മറിച്ച് ഒരു ജനതയുടെ സ്വപ്നങ്ങളും ആത്മാവുമാണ് നെയ്തുചേർത്തിരിക്കുന്നതെന്ന് പ്രഭാഷകർ വ്യക്തമാക്കി.
രാഷ്ട്രപിതാവ് പരേതനായ ശൈഖ് സായിദ് ബിൻ സുൽത്താൻ അൽ നഹ്യാന്റെയും, ഭരണാധികാരികളുടെയും, രാജ്യത്തിന്റെ പുരോഗതിക്കായി ജീവൻ സമർപ്പിച്ച രക്തസാക്ഷികളുടെയും സ്മരണകൾക്ക് ചടങ്ങിൽ ആദരമർപ്പിച്ചു. പ്രവാസികളെ ചേർത്തുപിടിക്കുന്ന രാജ്യത്തിന്റെ ക്ഷേമത്തിനും ശാന്തിക്കും വേണ്ടി പ്രാർഥിക്കാനും സംഭാവനകൾ നൽകാനും വിദ്യാർഥികൾ പ്രതിജ്ഞാബദ്ധരാകണമെന്ന് ഓർമ്മിപ്പിച്ചു.
പ്രിൻസിപ്പൽ പി.പി. ഇബ്രാഹിം ഫൈസി ദേശീയ പതാക ഉയർത്തി. എം.എ. സലാം റഹ്മാനി പതാകദിന സന്ദേശം നൽകി.
അധ്യാപകരായ ബഷീർ മൗലവി, ഹംസ മൗലവി, റിയാസ് അശ്അരി, അബൂബക്കർ ദാരിമി, ശംസുദ്ദീൻ അൽ ഖാസിമി, മുസ്തഫ ദാരിമി, ജാഫർ മാസ്റ്റർ, ശരീഫ് അഷ്റഫി, അഫീഫ് ദാരിമി, ശബീർ ബാഖവി, സലീം അസ്നവി, ശാഫി ദാരിമി, ശിബിലി സനഈ, ജൗഹർ ദാരിമി, സാലിഹ് ഫൈസി എന്നിവരും ട്രാൻസ്പോർട്ടേഷൻ വിഭാഗം ജീവനക്കാരും ചടങ്ങിൽ സംബന്ധിച്ചു.
