ഐആർസി സംഘടിപ്പിച്ച സ്വീകരണത്തിൽ പ്രവാസി സംഘടനകളുടെയും വ്യവസായ രംഗത്തെയും പ്രമുഖർ പങ്കെടുത്തു
റാസൽഖൈമ, യു.എ.ഇ — റാസൽഖൈമയിലെ പ്രവാസി സമൂഹവുമായും വ്യാപാര-വ്യവസായ രംഗത്തെ പ്രമുഖരുമായും ദുബായിലെ ഇന്ത്യൻ കോൺസുൽ ജനറൽ ഡോ. ഇ. വിഷ്ണു വർധൻ റെഡ്ഡി കൂടിക്കാഴ്ച നടത്തി.
ഇന്ത്യൻ റിലീഫ് കമ്മിറ്റിയുടെ (ഐആർസി) നേതൃത്വത്തിൽ ചൊവ്വാഴ്ച വൈകിട്ട് റാസൽഖൈമ ഹോട്ടലിലാണ് സ്വീകരണ ചടങ്ങ് സംഘടിപ്പിച്ചത്. പ്രവാസി ക്ഷേമം, അടിയന്തര കോൺസുലാർ സേവനങ്ങൾ, സാമൂഹിക സുരക്ഷ എന്നിവ മുൻനിർത്തി തുറന്ന ചർച്ചകൾ നടന്നു.
ചടങ്ങിൽ ഐആർസി പ്രസിഡന്റ് ഡോ. നിഷാം നൂറുദ്ദീൻ സ്വാഗതം ആശംസിച്ചു. വടക്കൻ എമിറേറ്റുകളിലെ സാധാരണക്കാരായ പ്രവാസികൾ നേരിടുന്ന പ്രശ്നങ്ങൾ വേഗത്തിൽ പരിഹരിക്കാൻ കോൺസുലേറ്റുമായി ചേർന്നു പ്രവർത്തിക്കുമെന്ന് സംഘടനാ ഭാരവാഹികൾ വ്യക്തമാക്കി.
ജനറൽ സെക്രട്ടറി സുമേഷ് മഠത്തിൽ, ട്രഷറർ ഡോ. മാത്യു കെ.എം, അഡ്മിൻ കോഓർഡിനേറ്റർ പത്മരാജ് എന്നിവർ യോഗത്തിൽ സന്നിഹിതരായിരുന്നു. മേഖലയിലെ പ്രമുഖ ആരോഗ്യ പ്രവർത്തകരായ ഡോ. ജോർജ് ജേക്കബ്, ഡോ. ഡൊമിനിക്, ഡോ. അജിത് ചെറിയാൻ തുടങ്ങിയവരും ചർച്ചകളിൽ പങ്കെടുത്തു. പ്രവാസി തൊഴിലാളികൾക്കായുള്ള മെഡിക്കൽ സഹായം, പ്രതിസന്ധിഘട്ടങ്ങളിലെ പിന്തുണ തുടങ്ങിയ കാര്യങ്ങൾ പ്രതിനിധികൾ കോൺസുൽ ജനറലിന്റെ ശ്രദ്ധയിൽപ്പെടുത്തി.
റാസൽഖൈമ ഉൾപ്പെടെയുള്ള വടക്കൻ എമിറേറ്റുകളിൽ കോൺസുലാർ സേവനങ്ങൾ കാര്യക്ഷമമായി എത്തിക്കുന്നതിന് സാമൂഹിക സംഘടനകളുമായുള്ള ഏകോപനം ശക്തമായി തുടരുമെന്ന് കോൺസുലേറ്റ് വൃത്തങ്ങൾ സൂചിപ്പിച്ചു.
