ലാറ്റിനമേരിക്കയിലെ പ്രമുഖ സാഹിത്യമേളയായ ഫിൽബോയുടെ 39-ാം പതിപ്പിലാണ് ഷാർജ ചരിത്രനേട്ടം സ്വന്തമാക്കുന്നത്.
ബൊഗോട്ട, സെപ്റ്റംബർ 28, 2026 : ലാറ്റിനമേരിക്കയിലെ ഏറ്റവും വലിയ സാഹിത്യമേളകളിലൊന്നായ കൊളംബിയയിലെ ബൊഗോട്ട രാജ്യാന്തര പുസ്തകോത്സവത്തിൽ (ഫിൽബോ – FILBo 2027) ഷാർജയെ ‘ഗസ്റ്റ് ഓഫ് ഓണർ’ പദവി നൽകി ആദരിക്കും. മേളയുടെ ചരിത്രത്തിൽ ഈ ബഹുമതി സ്വന്തമാക്കുന്ന ആദ്യ അറബ് പ്രതിനിധിയാണ് ഷാർജ.
കൊളംബിയൻ തലസ്ഥാനമായ ബൊഗോട്ടയിലെ സാൻ കാർലോസ് കൊട്ടാരത്തിൽ നടന്ന വാർത്താസമ്മേളനത്തിലാണ് ചരിത്രപരമായ സാംസ്കാരിക സഹകരണം ഔദ്യോഗികമായി പ്രഖ്യാപിച്ചത്. 2027 ഏപ്രിൽ 20 മുതൽ മെയ് 3 വരെ കോർഫെറിയാസ് എക്സിബിഷൻ സെന്ററിലാണ് ഫിൽബോയുടെ 39-ാമത് പതിപ്പ് അരങ്ങേറുന്നത്. ഷാർജ ബുക്ക് അതോറിറ്റിയുടെ (എസ്.ബി.എ) നേതൃത്വത്തിലുള്ള വൻ പ്രതിനിധി സംഘം മേളയിൽ പങ്കെടുക്കും.
ലാറ്റിനമേരിക്കൻ മേഖലയിൽ ഷാർജയുടെ സാംസ്കാരിക സാന്നിധ്യം കൂടുതൽ ശക്തമാക്കുന്നതാണ് ഈ പ്രഖ്യാപനം. നേരത്തെ ബ്രസീലിലെ സാവോപോളോ പുസ്തകമേളയിലും മെക്സിക്കോയിലെ പ്രശസ്തമായ ഗ്വാഡലഹാര രാജ്യാന്തര പുസ്തകോത്സവത്തിലും ഷാർജ അതിഥി രാജ്യമായി ചരിത്രം കുറിച്ചിരുന്നു.
അറബ് ലോകവും ലാറ്റിനമേരിക്കയും തമ്മിലുള്ള ചിന്താപരവും സാഹിത്യപരവുമായ കൈമാറ്റങ്ങൾക്ക് ബൊഗോട്ട വേദിയാകുമെന്ന് ഷാർജ ബുക്ക് അതോറിറ്റി ചെയർപേഴ്സൺ ഷെയ്ഖ ബുദൂർ ബിൻത് സുൽത്താൻ അൽ ഖാസിമി വ്യക്തമാക്കി. “ഇരു പ്രദേശങ്ങൾക്കും സമ്പന്നമായ സാഹിത്യ പാരമ്പര്യമുണ്ട്. എന്നാൽ പരസ്പരം കൂടുതൽ അറിയാനും എഴുത്തുകാരെയും ആശയങ്ങളെയും പരിചയപ്പെടുത്താനും ഇനിയും വലിയ സാധ്യതകൾ ബാക്കിയാണ്. അറബ് സാഹിത്യം സ്പാനിഷ് ഭാഷയിലേക്കും ലാറ്റിനമേരിക്കൻ രചനകൾ അറബ് വായനക്കാരിലേക്കും എത്തിക്കുന്നതിനുള്ള ശാശ്വതമായ സൗഹൃദക്കൂട്ടായ്മയാണ് ബൊഗോട്ടയിൽ ഞങ്ങൾ ലക്ഷ്യമിടുന്നത്,” ഷെയ്ഖ ബുദൂർ പറഞ്ഞു.
പുസ്തകങ്ങളെയും വിജ്ഞാനത്തെയും മുൻനിർത്തി ഷാർജ നാല് പതിറ്റാണ്ടിലേറെയായി നടത്തുന്ന സാംസ്കാരിക മുന്നേറ്റങ്ങൾ മാതൃകാപരമാണെന്ന് കൊളംബിയൻ സാംസ്കാരിക, കല, വിജ്ഞാന വകുപ്പ് മന്ത്രി പോള ആൻഡ്രിയ ഹോൾഗിൻ മൊറേനോ പറഞ്ഞു. മിഡിൽ ഈസ്റ്റുമായുള്ള സാഹിത്യ വിനിമയം കൊളംബിയൻ പ്രസാധകർക്കും എഴുത്തുകാർക്കും വലിയ വിപണി സാധ്യതകൾ തുറന്നുനൽകുമെന്ന് അവർ ചൂണ്ടിക്കാട്ടി.
കൊളംബിയയിലെ യുഎഇ അംബാസഡർ മുഹമ്മദ് അബ്ദുല്ല അൽ ശംസി, ഷാർജ ബുക്ക് അതോറിറ്റി സിഇഒ അഹമ്മദ് ബിൻ റക്കാദ് അൽ ആമേരി, കൊളംബിയൻ ബുക്ക് ചേംബർ എക്സിക്യൂട്ടീവ് പ്രസിഡന്റ് ഡോ. എമിറോ അരിസ്റ്റിസാബൽ ആൽവരസ്, കോർഫെറിയാസ് സിഇഒ ഡോ. ആൻഡ്രെസ് ലോപ്പസ് വാൽഡെറാമ, ഫിൽബോ ഡയറക്ടർ അഡ്രിയാന സെസിലിയ ആഞ്ചൽ ഫൊറേറോ എന്നിവർ വാർത്താസമ്മേളനത്തിൽ സന്നിഹിതരായിരുന്നു.
ഗബ്രിയേൽ ഗാർസിയ മാർക്വേസിന്റെ പ്രശസ്ത നോവലായ ‘ഏകാന്തതയുടെ നൂറുവർഷങ്ങൾ’ അടക്കമുള്ള കൃതികളിൽ അറബ് സംസ്കാരത്തിന്റെ സ്വാധീനം കാണാമെന്നും ഇരുദേശങ്ങളും തമ്മിലുള്ള മനുഷ്യബന്ധത്തിന് ആഴത്തിലുള്ള ചരിത്രമുണ്ടെന്നും അഹമ്മദ് ബിൻ റക്കാദ് അൽ ആമേരി ചൂണ്ടിക്കാട്ടി. ഷാർജ ഭരണാധികാരി ഡോ. ഷെയ്ഖ് സുൽത്താൻ ബിൻ മുഹമ്മദ് അൽ ഖാസിമിയുടെ സാംസ്കാരിക കാഴ്ചപ്പാടാണ് അന്താരാഷ്ട്രതലത്തിൽ പുതിയ വാതായനങ്ങൾ തുറക്കുന്നതെന്നും അദ്ദേഹം കൂട്ടിച്ചേർത്തു.
1988-ൽ കൊളംബിയൻ ബുക്ക് ചേംബറും കോർഫെറിയാസും ചേർന്ന് ആരംഭിച്ച ഫിൽബോ, സ്പാനിഷ് സംസാരിക്കുന്ന ലോകത്തെ പ്രധാന സാഹിത്യ വിപണികളിൽ ഒന്നാണ്. 2027 ലെ മേളയ്ക്കായി സമഗ്രമായ സാംസ്കാരിക വിനിമയ പരിപാടികളും പുസ്തക പകർപ്പവകാശ വിതരണ ചർച്ചകളും ഷാർജ ബുക്ക് അതോറിറ്റി ഒരുക്കും.
