അബുദാബി പ്രഖ്യാപനത്തിന് യൂറോപ്യൻ യൂണിയന്റെ അംഗീകാരം; അഞ്ചു വർഷത്തെ ആഗോള കർമപദ്ധതിക്ക് രൂപം നൽകി യുഎൻ ഉച്ചകോടി.
ബ്രസൽസ് / അബുദാബി:അതിർത്തികൾ കടന്നുള്ള സംഘടിത കുറ്റകൃത്യങ്ങൾ, ഭീകരവാദം, മനുഷ്യക്കടത്ത് എന്നിവ നേരിടാൻ അടുത്ത അഞ്ചു വർഷത്തേക്കുള്ള ആഗോള കർമപദ്ധതിക്ക് അബുദാബിയിൽ നടന്ന യുഎൻ കുറ്റകൃത്യ പ്രതിരോധ സമ്മേളനത്തിൽ (UN Crime Congress) അംഗീകാരം. യൂറോപ്യൻ യൂണിയൻ നയരൂപീകരണത്തിൽ നിർണായക പങ്കുവഹിച്ച സമ്മേളനം ‘അബുദാബി ഡിക്ലറേഷൻ’ ഔദ്യോഗികമായി അംഗീകരിച്ചു.
സെപ്റ്റംബർ 26 മുതൽ ഒക്ടോബർ 1 വരെ അബുദാബിയിൽ നടന്ന പതിനഞ്ചാമത് യുഎൻ ക്രൈം കോൺഗ്രസിന്റെ തീരുമാനങ്ങൾ വ്യക്തമാക്കിക്കൊണ്ട് യൂറോപ്യൻ എക്സ്റ്റേണൽ ആക്ഷൻ സർവീസ് (EEAS) ബ്രസൽസിൽ വിശദാംശങ്ങൾ പുറത്തുവിട്ടു. ആഗോളതലത്തിൽ വർധിച്ചുവരുന്ന സൈബർ സാമ്പത്തിക തട്ടിപ്പുകൾ, മനുഷ്യക്കടത്ത്, പരിസ്ഥിതി കുറ്റകൃത്യങ്ങൾ എന്നിവ തടയുന്നതിനുള്ള രാജ്യാന്തര സഹകരണം കൂടുതൽ ശക്തമാക്കാൻ ഉച്ചകോടി ആഹ്വാനം ചെയ്തു.
സമ്മേളനത്തിന്റെ ഭാഗമായി യൂറോപ്യൻ യൂണിയന്റെ ജുഡീഷ്യൽ ഏജൻസിയായ യൂറോജസ്റ്റും (Eurojust) യുഎഇ നീതിന്യായ മന്ത്രാലയവും തമ്മിൽ നിർണായക സഹകരണ കരാർ ഒപ്പുവെച്ചു. യൂറോജസ്റ്റ് പ്രസിഡന്റ് മൈക്കൽ ഷ്മിഡും യുഎഇ നീതികാര്യ മന്ത്രി അബ്ദുല്ല സുൽത്താൻ ബിൻ അവാദ് അൽ നുഐമിയുമാണ് കരാറിൽ ഒപ്പുവെച്ചത്. അന്താരാഷ്ട്ര സാമ്പത്തിക തട്ടിപ്പുകൾ, കള്ളപ്പണം വെളുപ്പിക്കൽ, ഒളിവിൽ കഴിയുന്ന കുറ്റവാളികളെ നിയമത്തിന് മുന്നിൽ എത്തിക്കൽ തുടങ്ങിയ വിഷയങ്ങളിൽ യൂറോപ്യൻ രാജ്യങ്ങളും യുഎഇയും തമ്മിൽ അതിവേഗ വിവരക്കൈമാറ്റവും അന്വേഷണ സഹകരണവും ഉറപ്പാക്കാൻ ഈ കരാർ വഴിയൊരുക്കും.
കുറ്റകൃത്യങ്ങൾക്കെതിരെയുള്ള നടപടികൾ മനുഷ്യാവകാശങ്ങളും നിയമവാഴ്ചയും പൂർണമായി പാലിച്ചുകൊണ്ടാവണമെന്ന് ജനറൽ ഡിബേറ്റിൽ പങ്കെടുത്ത യൂറോപ്യൻ യൂണിയൻ അംബാസഡർ കാൾ ഹാലെർഗാർഡ് വ്യക്തമാക്കി. ഡിജിറ്റൽ സാങ്കേതികവിദ്യകൾ ക്രിമിനൽ സംഘങ്ങൾ വ്യാപകമായി ദുരുപയോഗം ചെയ്യുന്ന പുതിയ കാലത്ത് രാജ്യങ്ങൾ ഒറ്റതിരിഞ്ഞു നടത്തുന്ന അന്വേഷണങ്ങൾക്ക് പരിമിതിയുണ്ടെന്ന് അദ്ദേഹം ചൂണ്ടിക്കാട്ടി.
കുറ്റാന്വേഷണവും നീതിന്യായ സംവിധാനങ്ങളും ആധുനികവൽക്കരിക്കുന്നതിനായി ‘പ്ലെഡ്ജ് ഫോർ ജസ്റ്റിസ്’ (Pledge4Justice) പദ്ധതിക്ക് യൂറോപ്യൻ യൂണിയൻ രൂപം നൽകി. ഇതിന്റെ ഭാഗമായി തെമിസ് (Themis), ഇന്റർസെപ്റ്റ് (Intercept) എന്നീ പുതിയ സംരംഭങ്ങൾ ആരംഭിക്കും. നിലവിലുള്ള ജസ്റ്റ് ഫോർ ഓൾ (JUST4ALL), പ്ലീഡ് II (PLEAD II), ഇയു-ആക്ട് (EU-ACT) പദ്ധതികൾക്ക് പുറമെയാണിത്.
അഭയാർഥി കടത്ത് തടയൽ, ഇരകളുടെ അവകാശ സംരക്ഷണം, സ്ത്രീകൾക്കും കുട്ടികൾക്കും അനുകൂലമായ നിയമ സംവിധാനങ്ങൾ, തടവുശിക്ഷയ്ക്ക് മാനുഷികമായ ബദലുകൾ കണ്ടെത്തൽ തുടങ്ങിയ വിഷയങ്ങളിൽ യൂറോപ്യൻ കമ്മീഷൻ പ്രതിനിധികളായ ഒലിവിയർ ഒനിഡി, ടോമാസോ ചിയാംപാരിനി എന്നിവർ ചർച്ചകൾക്ക് നേതൃത്വം നൽകി. അബുദാബി പ്രഖ്യാപനത്തിലെ നിർദേശങ്ങൾ വരും വർഷങ്ങളിൽ കൃത്യമായ നിയമ നിർമാണങ്ങളാക്കി മാറ്റുമെന്ന് യൂറോപ്യൻ യൂണിയൻ അറിയിച്ചു.
