ഇറാനെതിരെ വീണ്ടും സൈനിക നടപടിക്ക് ഒരുങ്ങി യുഎസ്; മുന്നൊരുക്കം പൂർത്തിയാക്കാൻ പെന്റഗൺ നിർദേശം

ആണവ-ഊർജ കേന്ദ്രങ്ങൾ ലക്ഷ്യമിട്ട് വ്യോമാക്രമണത്തിന് പദ്ധതി; അന്തിമ തീരുമാനമെടുത്തിട്ടില്ലെന്ന് വൈറ്റ് ഹൗസ്

വാഷിങ്ടൺ : ഇറാനെതിരെ നിർണായക വ്യോമാക്രമണം പുനരാരംഭിക്കുന്നതിനുള്ള സൈനിക മുന്നൊരുക്കങ്ങൾ പൂർത്തിയാക്കാൻ യുഎസ് പ്രതിരോധ വകുപ്പ് സെൻട്രൽ കമാൻഡിന് (CENTCOM) നിർദേശം നൽകി. പ്രസിഡന്റ് ഡോണൾഡ് ട്രംപ് ഇതുവരെ അന്തിമ ഉത്തരവ് പുറപ്പെടുവിച്ചിട്ടില്ലെങ്കിലും ഏത് നിമിഷവും ആക്രമണം നടത്താൻ സജ്ജമായിരിക്കാനാണ് പെന്റഗണിന്റെ നിർദേശം.

ഇറാന്റെ ആണവ കേന്ദ്രങ്ങൾ, എണ്ണ-ഊർജ നിലയങ്ങൾ, പ്രധാന പശ്ചാത്തല സൗകര്യങ്ങൾ എന്നിവ ലക്ഷ്യമിട്ട് വിപുലമായ ആക്രമണ പദ്ധതികളാണ് പെന്റഗൺ തയാറാക്കിയിട്ടുള്ളതെന്ന് യുഎസ് മാധ്യമങ്ങൾ റിപ്പോർട്ട് ചെയ്തു. നവംബർ മൂന്നിന് നടക്കുന്ന യുഎസ് ഇടക്കാല തിരഞ്ഞെടുപ്പിനും ഒക്ടോബർ അവസാന വാരത്തിലെ ഇസ്രയേൽ തിരഞ്ഞെടുപ്പിനും തൊട്ടുമുമ്പോ ശേഷമോ സംയുക്ത സൈനിക നീക്കം ഉണ്ടായേക്കാമെന്നാണ് നയതന്ത്ര വൃത്തങ്ങൾ നൽകുന്ന സൂചന.

ഖത്തർ വഴി യുഎസ് മുന്നോട്ടുവെച്ച ആണവ കരാർ വ്യവസ്ഥകളോട് ഇറാൻ ഇതുവരെ അനുകൂലമായി പ്രതികരിച്ചിട്ടില്ല. ചർച്ചകൾ സ്തംഭിച്ച പശ്ചാത്തലത്തിൽ യുഎസ് ദേശീയ സുരക്ഷാ ഉപദേഷ്ടാക്കളും വിദേശകാര്യ സെക്രട്ടറി മാർക്കോ റൂബിയോയും ക്യാമ്പ് ഡേവിഡിൽ അടിയന്തര യോഗം ചേർന്ന് പശ്ചിമേഷ്യൻ സാഹചര്യം വിലയിരുത്തിയിരുന്നു.

ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവുമായി ട്രംപ് ഈയാഴ്ച രണ്ട് തവണ ഫോണിൽ ചർച്ച നടത്തി. സൈനിക നടപടി ആരംഭിച്ചാൽ യുഎസും ഇസ്രയേലും സംയുക്തമായി രംഗത്തിറങ്ങാനാണ് സാധ്യത. മൂന്നാമതൊരു സർപ്രൈസ് ആക്രമണം ഒഴിവാക്കാൻ ഇറാൻ പ്രത്യാക്രമണത്തിന് മുതിർന്നേക്കുമെന്നും, ഇസ്രയേലിന് നേരെ ബാലിസ്റ്റിക് മിസൈലുകൾ പ്രയോഗിച്ചേക്കുമെന്നും രഹസ്യാന്വേഷണ ഏജൻസികൾ മുന്നറിയിപ്പ് നൽകുന്നു.

പ്രസിഡന്റിന് മുൻപിൽ എല്ലാ സൈനിക സാധ്യതകളും സമർപ്പിക്കുക എന്നത് പ്രതിരോധ വകുപ്പിന്റെ ചുമതലയാണെന്ന് പെന്റഗൺ വക്താക്കൾ വ്യക്തമാക്കി. ഹോർമുസ് കടലിടുക്കിലെ നാവിക നിയന്ത്രണവും തകർന്ന ഇറാന്റെ സമ്പദ്‌വ്യവസ്ഥയും യുഎസിന് അനുകൂലമായ മേൽക്കൈ നൽകുന്നുണ്ടെന്നാണ് വൈറ്റ് ഹൗസിന്റെ വിലയിരുത്തൽ.

ഇറാൻ ആണവായുധം നിർമിക്കുന്നത് പൂർണമായും തടയുമെന്നും കാര്യങ്ങൾ വേഗത്തിൽ അവസാനിപ്പിക്കുമെന്നും ടെക്സസിലേക്ക് തിരിക്കും മുൻപ് മാധ്യമങ്ങളോട് സംസാരിക്കവെ ട്രംപ് പറഞ്ഞു. പേർഷ്യൻ ഗൾഫിലും ഹോർമുസ് കടലിടുക്കിലും യുഎസ് നാവികസേന ശക്തമായ ഉപരോധം ഏർപ്പെടുത്തിയിരിക്കുകയാണെന്നും നിയമവിരുദ്ധമായി നീങ്ങുന്ന കപ്പലുകൾക്കെതിരെ കർശന നടപടിയെടുക്കുമെന്നും ട്രംപ് വ്യക്തമാക്കി.