ഇന്ത്യൻ സോഷ്യൽ സെന്ററിൽ തിരുവാതിരയും സദ്യയും കലാവിരുന്നും; മികച്ച മാവേലി വേഷത്തിന് ലിജിത്തിനെ ആദരിച്ചു
അജ്മാൻ, യുഎഇ : കണ്ണൂർ ജില്ലയിലെ പട്ടുവം ഗ്രാമപഞ്ചായത്തിലെ മുള്ളൂൽ പ്രദേശത്തുനിന്നുള്ള യുഎഇ പ്രവാസികളുടെ വാർഷിക ഓണാഘോഷമായ ‘മുള്ളൂലോണം 2026’ അജ്മാൻ ഇന്ത്യൻ സോഷ്യൽ സെന്ററിൽ സമുചിതമായി നടന്നു.
പ്രവാസജീവിതത്തിന്റെ തിരക്കുകൾക്കിടയിൽ നാടിന്റെ ഓർമകളും സൗഹൃദങ്ങളും പുതുക്കാൻ നൂറുകണക്കിന് കുടുംബങ്ങളാണ് അജ്മാൻ ഇന്ത്യൻ സോഷ്യൽ സെന്ററിലേക്ക് എത്തിയത്. മുള്ളൂൽ പ്രവാസി കൂട്ടായ്മ ഒരുക്കിയ ആഘോഷ പരിപാടികൾ രാവിലെ 11 മണിയോടെ പൂക്കളമൊരുക്കലോടെയാണ് തുടക്കമായത്.
തുടർന്ന് കുടുംബാംഗങ്ങൾ ഒത്തുചേർന്ന് വിഭവസമൃദ്ധമായ പരമ്പരാഗത ഓണസദ്യ ആസ്വദിച്ചു. ഉച്ചയ്ക്ക് ശേഷം മാവേലി മന്നന്റെ വരവറിയിച്ചുകൊണ്ടുള്ള എഴുന്നള്ളത്ത് നടന്നു. ഇതിന് പിന്നാലെ വൈവിധ്യമാർന്ന കലാപരിപാടികൾക്ക് വേദി ഉണർന്നു.
വനിതകൾ അണിനിരന്ന തിരുവാതിരക്കളി, വിവിധ നൃത്തനൃത്യങ്ങൾ, സംഗീതവിരുന്ന്, മുതിർന്നവർക്കും കുട്ടികൾക്കുമായുള്ള രസകരമായ നാടൻ കായിക വിനോദങ്ങൾ എന്നിവ സദസ്യർക്ക് വേറിട്ട അനുഭവമായി. വൈകുന്നേരം 5 മണി വരെ തുടർച്ചയായി പരിപാടികൾ അരങ്ങേറി.
യുഎഇ പ്രവാസി വേദികളിൽ ശ്രദ്ധേയമായ മാവേലി വേഷപ്പകർച്ച നടത്തിയ ലിജിത്തിനെ ചടങ്ങിൽ ഭാരവാഹികൾ പൊന്നാടയണിയിച്ച് ആദരിച്ചു. ഗൾഫ് നാടുകളിൽ പ്രവാസികളായി കഴിയുമ്പോഴും പരസ്പര സഹകരണവും നാട്ടുനന്മകളും കാത്തുസൂക്ഷിക്കാൻ ഇത്തരം ഒത്തുചേരലുകൾ അനിവാര്യമാണെന്ന് സംഘാടക സമിതി അറിയിച്ചു.
