നിക്ഷേപം, വ്യാപാരം, ഊർജം തുടങ്ങിയ മേഖലകളിലെ തന്ത്രപ്രധാന സഹകരണം വിപുലമാക്കാൻ ധാരണ.
മുംബൈ — 20 ഒക്ടോബർ 2026 :യുഎഇ ഉപപ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് അബ്ദുള്ള ബിൻ സായിദ് അൽ നഹ്യാൻ ഇന്ത്യൻ വിദേശകാര്യ മന്ത്രി ഡോ. എസ്. ജയശങ്കറുമായി മുംബൈയിൽ ഉഭയകക്ഷി ചർച്ച നടത്തി. സമഗ്ര സാമ്പത്തിക-തന്ത്രപ്രധാന പങ്കാളിത്തം കൂടുതൽ ശക്തിപ്പെടുത്തുന്നതിൻ്റെ ഭാഗമായാണ് കൂടിക്കാഴ്ച.
ഇന്ത്യയുടെ സാമ്പത്തിക തലസ്ഥാനമായ മുംബൈയിൽ നടന്ന കൂടിക്കാഴ്ചയിൽ ഇരുരാജ്യങ്ങളും തമ്മിലുള്ള ദീർഘകാല സൗഹൃദവും വിവിധ മേഖലകളിലെ സഹകരണവും സമഗ്രമായി വിലയിരുത്തി. വ്യാപാരം, നിക്ഷേപം, സാമ്പത്തിക മേഖല, സാംസ്കാരിക കൈമാറ്റം, ഊർജ സുരക്ഷ തുടങ്ങിയ സുപ്രധാന രംഗങ്ങളിൽ നിലവിലെ പദ്ധതികൾ വേഗത്തിലാക്കാൻ ഇരു നേതാക്കളും തീരുമാനിച്ചു.
പരസ്പര വിശ്വാസത്തിലും പങ്കിട്ട കാഴ്ചപ്പാടുകളിലും അധിഷ്ഠിതമായ ഇന്ത്യ–യുഎഇ ബന്ധം അന്താരാഷ്ട്ര തലത്തിൽ തന്നെ മികച്ചൊരു മാതൃകയാണെന്ന് ഷെയ്ഖ് അബ്ദുള്ള ബിൻ സായിദ് വ്യക്തമാക്കി. സമഗ്ര സാമ്പത്തിക പങ്കാളിത്ത കരാറിലൂടെ (സെപ) കൈവരിച്ച നേട്ടങ്ങൾ മുന്നോട്ട് കൊണ്ടുപോകുന്നതിന് യുഎഇ വലിയ പ്രാധാന്യമാണ് നൽകുന്നതെന്നും ഇരുരാജ്യങ്ങളുടെയും സാമ്പത്തിക വളർച്ച ആഗോള വിപണിക്ക് തന്നെ കരുത്തുപകരുമെന്നും അദ്ദേഹം കൂട്ടിച്ചേർത്തു.
പശ്ചിമേഷ്യൻ സാഹചര്യങ്ങൾ ഉൾപ്പെടെയുള്ള അന്താരാഷ്ട്ര-മേഖലാ സംഭവവികാസങ്ങളും സമാധാനാന്തരീക്ഷം നിലനിർത്താനുള്ള നയതന്ത്ര നീക്കങ്ങളും ചർച്ചയിൽ വിഷയമായി.
ഔദ്യോഗിക സന്ദർശനത്തിനായി മുംബൈയിലെത്തിയ ഷെയ്ഖ് അബ്ദുള്ള ബിൻ സായിദിനെ മഹാരാഷ്ട്ര നൈപുണ്യ വികസന-തൊഴിൽ വകുപ്പ് മന്ത്രി മംഗൾ പ്രഭാത് ലോധയും മുതിർന്ന നയതന്ത്ര ഉദ്യോഗസ്ഥരും ചേർന്ന് വിമാനത്താവളത്തിൽ സ്വീകരിച്ചു
