ഷാർജയിൽ ചൈനീസ് കൾച്ചറൽ ഇൻസ്റ്റിറ്റ്യൂട്ട് വരുന്നു; എഐ, വ്യവസായ മേഖലകളിൽ സഹകരണം വിപുലമാക്കാൻ ധാരണ

ഷാർജ സർക്കാർ ബന്ധ വകുപ്പും ചൈനീസ് കോൺസുലേറ്റും തമ്മിൽ ചർച്ച നടത്തി; ഇരുരാജ്യങ്ങളും തമ്മിലുള്ള വാണിജ്യ, സാങ്കേതിക ബന്ധം കൂടുതൽ ശക്തിപ്പെടുത്തും.

ഷാർജ — 09 ഒക്ടോബർ 2026 : ഷാർജയിൽ ചൈനീസ് ഭാഷയും സംസ്കാരവും പഠിപ്പിക്കുന്നതിനായി പ്രത്യേക കൾച്ചറൽ ഇൻസ്റ്റിറ്റ്യൂട്ട് സ്ഥാപിക്കുന്നതിനും നിർമ്മിതബുദ്ധി (എഐ), നൂതന നിർമ്മാണ വ്യവസായം തുടങ്ങിയ മുൻനിര മേഖലകളിൽ ഉഭയകക്ഷി സഹകരണം കൂടുതൽ വ്യാപിപ്പിക്കുന്നതിനും ഷാർജയും ചൈനയും തമ്മിൽ ധാരണയായി.

ഷാർജ ഡിപ്പാർട്ട്‌മെൻ്റ് ഓഫ് ഗവൺമെൻ്റ് റിലേഷൻസ് (ഡിജിആർ) ചെയർമാനും ഇക്കണോമിക് ഇൻ്റഗ്രേഷൻ ഉന്നതാധികാര സമിതി അധ്യക്ഷനുമായ ഷെയ്ഖ് ഫഹീം ബിൻ സുൽത്താൻ അൽ ഖാസിമിയും ദുബായിലെയും വടക്കൻ എമിറേറ്റുകളിലെയും ചൈനീസ് കോൺസൽ ജനറൽ ഔ ബോഖിയാനും തമ്മിൽ നടത്തിയ കൂടിക്കാഴ്ചയിലാണ് നിർണായക വിഷയങ്ങൾ ചർച്ചയായത്.

ഷാർജയിൽ ആരംഭിക്കാൻ നിർദേശിച്ച കൾച്ചറൽ ഇൻസ്റ്റിറ്റ്യൂട്ട് വഴി ചൈനീസ് ഭാഷാ പഠനത്തിനും സാംസ്കാരിക വിനിമയത്തിനും സൗകര്യമൊരുങ്ങും. ഇരു രാജ്യങ്ങളിലെയും ജനങ്ങൾ തമ്മിലുള്ള സമ്പർക്കം വർധിപ്പിക്കാനും ടൂറിസം, വിദ്യാഭ്യാസം, വ്യവസായം എന്നീ രംഗങ്ങളിലെ ബന്ധം ശക്തിപ്പെടുത്താനും ഈ സംരംഭം ലക്ഷ്യമിടുന്നു.

യുഎഇയിൽ നിന്നും ചൈനയിലേക്കുമുള്ള സന്ദർശകരുടെ എണ്ണത്തിൽ വലിയ വർധനവാണ് സമീപകാലത്ത് രേഖപ്പെടുത്തിയത്. നേരിട്ടുള്ള വിമാന സർവീസുകൾ വർധിച്ചതോടെ 2024-ൽ പത്തുലക്ഷത്തിലധികം ചൈനീസ് വിനോദസഞ്ചാരികളാണ് യുഎഇ സന്ദർശിച്ചത്. 2025-ൽ യുഎഇ പൗരന്മാരുടെ ചൈന സന്ദർശനത്തിൽ മുൻവർഷത്തെ അപേക്ഷിച്ച് 113 ശതമാനം വളർച്ചയുമുണ്ടായി.

സാംസ്കാരിക സഹകരണത്തിനൊപ്പം ഭാവി സമ്പദ്‌വ്യവസ്ഥയെ നയിക്കുന്ന സാങ്കേതിക പങ്കാളിത്തത്തിനും കൂടിക്കാഴ്ചയിൽ മുൻഗണന ലഭിച്ചു. ഡാറ്റാ സെൻ്ററുകൾ, ആർട്ടിഫിഷ്യൽ ഇൻ്റലിജൻസ്, ഓട്ടോമൊബൈൽ നിർമ്മാണം, ആരോഗ്യ സംരക്ഷണം, ഗവേഷണ വികസന പദ്ധതികൾ (R&D) തുടങ്ങിയ മേഖലകളിലാണ് ഇരുപക്ഷവും പുതിയ സാധ്യതകൾ വിലയിരുത്തിയത്.

ഡിജിറ്റൽ ഇൻഫ്രാസ്ട്രക്ചർ, ഓട്ടോമേഷൻ, സ്മാർട്ട് മൊബിലിറ്റി രംഗങ്ങളിലെ ചൈനയുടെ വിപുലമായ വൈദഗ്ധ്യം പ്രയോജനപ്പെടുത്താനാണ് ഷാർജ ലക്ഷ്യമിടുന്നത്. നിലവിൽ ഷാർജയുടെ മൊത്തം ആഭ്യന്തര ഉത്പാദനത്തിൻ്റെ (ജിഡിപി) 17 ശതമാനത്തോളം സംഭാവന ചെയ്യുന്നത് വ്യാവസായിക നിർമ്മാണ മേഖലയാണ്. ഗ്രീൻ ടെക്നോളജി, അഡ്വാൻസ്ഡ് മാനുഫാക്ചറിംഗ് എന്നിവയിൽ ഷാർജയുടെ മുൻഗണനാ ആഗോള പങ്കാളികളിൽ മുൻനിരയിലാണ് ചൈന.

സാമ്പത്തിക ഇടപാടുകൾക്കപ്പുറം വിജ്ഞാനവും സ്ഥാപനപരമായ പങ്കാളിത്തവും ദീർഘകാലാടിസ്ഥാനത്തിൽ വളർത്തിയെടുക്കുകയാണ് ഷാർജയുടെ രാജ്യാന്തര നയമെന്ന് ഷെയ്ഖ് ഫഹീം അൽ ഖാസിമി വ്യക്തമാക്കി. എഐ, ആരോഗ്യ സംരക്ഷണം, സ്മാർട്ട് നിർമ്മാണം തുടങ്ങിയ ജനജീവിതത്തെ നേരിട്ട് സ്വാധീനിക്കുന്ന മേഖലകളിൽ ചൈനയുമായി ചേർന്ന് പ്രവർത്തിക്കാൻ വിപുലമായ സാധ്യതകളുണ്ടെന്നും നിർദിഷ്ട കൾച്ചറൽ ഇൻസ്റ്റിറ്റ്യൂട്ട് ഇരു സമൂഹങ്ങളും തമ്മിലുള്ള ആശയവിനിമയം കൂടുതൽ സുഗമമാക്കുമെന്നും അദ്ദേഹം കൂട്ടിച്ചേർത്തു.

യോഗത്തിൽ ഡിജിആർ ഡയറക്ടർ ഷെയ്ഖ് മജീദ് അൽ ഖാസിമി, ഔദ്യോഗിക പ്രതിനിധി സംഘങ്ങളുടെ മേധാവി ഷെയ്ഖ് മുഹമ്മദ് അൽ ഖാസിമി, ഇൻ്റർനാഷണൽ റിലേഷൻസ് മാനേജർ അലി അൽ കെത്ബി, ഇൻ്റർനാഷണൽ കൾച്ചറൽ സെൻ്റർ മാനേജർ അംജദ് അൽ ഖസീർ എന്നിവരും പങ്കെടുത്തു. ചൈനീസ് പക്ഷത്തുനിന്ന് പ്രോട്ടോക്കോൾ-പബ്ലിക് ഡിപ്ലോമസി ഡയറക്ടർ ലിയാങ് ജിങ്, അഡ്മിനിസ്ട്രേറ്റീവ് ഓഫീസ് ഡയറക്ടർ യു ഷുവാങ് എന്നിവർ സംബന്ധിച്ചു.

കഴിഞ്ഞ ഏതാനും വർഷങ്ങളായി ചൈനയുമായി ശക്തമായ ഭരണതല ബന്ധമാണ് ഷാർജ പുലർത്തുന്നത്. 2024 ജൂണിൽ ഷാൻഡോങ് പ്രവിശ്യാ സർക്കാരുമായി ഡിജിആർ ധാരണാപത്രം ഒപ്പുവെച്ചിരുന്നു. ഇതിൻ്റെ തുടർച്ചയായി 2025 ഡിസംബറിൽ ഷാൻഡോങ് പ്രതിനിധി സംഘം ഷാർജയിലെത്തുകയും ചെയ്തു. തുടർന്ന് 2026 ജൂണിൽ ഷെയ്ഖ് ഫഹീമിൻ്റെ നേതൃത്വത്തിലുള്ള സർക്കാർ-വാണിജ്യ പ്രതിനിധി സംഘം ഗ്വാങ്‌ഡോങ് പ്രവിശ്യ സന്ദർശിച്ച് പ്രമുഖ ചൈനീസ് ടെക് കമ്പനികളുമായി ചർച്ചകൾ നടത്തിയിരുന്നു.

നിലവിൽ ഇരുവിഭാഗങ്ങളും തമ്മിലുള്ള വ്യാപാര ബന്ധം ശക്തമായ നിലയിലാണ്. 2025-ൽ ഷാർജയും ചൈനയും തമ്മിലുള്ള ഉഭയകക്ഷി വ്യാപാരം ഏകദേശം 630 കോടി ദിർഹത്തിലെത്തി (6.3 ബില്യൺ ദിർഹം). കൂടാതെ, 2026 ജൂണിലെ കണക്കനുസരിച്ച് 851 ചൈനീസ് കമ്പനികളാണ് ഷാർജയിൽ രജിസ്റ്റർ ചെയ്ത് പ്രവർത്തിക്കുന്നത്.