ദുബായ് കലണ്ടറിൽ ഇടംനേടുന്ന ആദ്യ മലയാളം സ്റ്റേജ് ഇവന്റായി ‘ഹല മോഹൻലാൽ – എ കംപ്ലീറ്റ് ലാലേട്ടൻ ഷോ’
ദുബായ്, ഒക്ടോബർ 24, 2026 : യുഎഇയുടെ 55-ാമത് ദേശീയ ദിനാഘോഷങ്ങളുടെ ഭാഗമായി പ്രമുഖ ചലച്ചിത്ര താരം മോഹൻലാൽ നയിക്കുന്ന മെഗാ സ്റ്റേജ് ഷോ ‘ഹല മോഹൻലാൽ – എ കംപ്ലീറ്റ് ലാലേട്ടൻ ഷോ’ ഡിസംബർ 2 ബുധനാഴ്ച ദുബായ് കൊക്കക്കോള അരീനയിൽ അരങ്ങേറും.
ദുബായ് ഡിപ്പാർട്ട്മെന്റ് ഓഫ് ഇക്കണോമി ആൻഡ് ടൂറിസത്തിന്റെ ഔദ്യോഗിക ‘ദുബായ് കലണ്ടർ ഓഫ് ഇവന്റ്സി’ൽ ഉൾപ്പെടുത്തുന്ന ആദ്യ മലയാള വിനോദ പരിപാടിയാണിത്. യുഎഇയിലെ ഇന്ത്യൻ പ്രവാസി സമൂഹത്തിന്റെ ആദരവായി സംഘടിപ്പിക്കുന്ന ഈ സംഗീത-നൃത്ത സന്ധ്യയുടെ ഒരുക്കങ്ങൾ പൂർത്തിയായതായി സംഘാടകരായ ഇക്വിറ്റി പ്ലസ് അറിയിച്ചു.
പ്രേക്ഷകരുടെ പ്രിയ നടി മഞ്ജു വാര്യരാണ് മോഹൻലാലിനൊപ്പം വേദിയിൽ പ്രധാന ആകർഷണമായെത്തുന്നത്. ഇരുവരും ഒന്നിക്കുന്ന പ്രത്യേക നൃത്താവിഷ്കാരങ്ങളും രംഗാവിഷ്കാരങ്ങളും അരങ്ങിലെത്തും.
ഹാസ്യവേദികളിലും ചലച്ചിത്രങ്ങളിലും ശ്രദ്ധേയരായ കലാഭവൻ ഷാജോൺ, അസീസ് നെടുമങ്ങാട്, നിയാസ് ബക്കർ, വിനോദ് കോവൂർ, റിയാസ് നർമകല, സൗമ്യ ഭാഗ്യൻ പിള്ള എന്നിവർ അണിനിരക്കുന്ന സ്കിറ്റുകളും പരിപാടിയുടെ ഭാഗമാണ്.
സംഗീത ലോകത്തെ പ്രമുഖ ഗായകരായ സിതാര കൃഷ്ണകുമാർ, വിധു പ്രതാപ്, ഷാഫി കൊല്ലം എന്നിവർ നയിക്കുന്ന സംഗീതവിരുന്നും ഒരുക്കിയിട്ടുണ്ട്. ഇതിനുപുറമെ സാനിയ ഇയ്യപ്പൻ, റംസാൻ, മോക്ഷ, ഡയാന ഹമീദ് എന്നിവരടങ്ങുന്ന നൃത്തസംഘം വേദിയിൽ ചടുലമായ പ്രകടനങ്ങൾ കാഴ്ചവെക്കും.
പതിനേഴായിരത്തോളം ആളുകളെ ഉൾക്കൊള്ളാൻ ശേഷിയുള്ള സിറ്റി വാക്കിലെ കൊക്കക്കോള അരീനയിലാണ് പരിപാടി നടക്കുന്നത്. ദീർഘിച്ച ദേശീയ ദിന അവധി ദിനങ്ങളിൽ പ്രവാസി കുടുംബങ്ങൾക്ക് ഒത്തുകൂടാനുള്ള സാംസ്കാരിക വേദിയായാണ് ഷോ രൂപകൽപ്പന ചെയ്തിരിക്കുന്നത്.
പരിപാടിയുടെ ടിക്കറ്റ് വിൽപന ഔദ്യോഗികമായി ആരംഭിച്ചു. coca-cola-arena.com, Platinumlist എന്നീ പ്ലാറ്റ്‌ഫോമുകൾ വഴി ടിക്കറ്റുകൾ ലഭ്യമാണ്. പ്രാരംഭഘട്ട ബുക്കിംഗിന് നിശ്ചിത വിഭാഗങ്ങളിൽ 20 ശതമാനം ഇളവും പ്രഖ്യാപിച്ചിട്ടുണ്ട്.
